بسم الله الرحمن الرحيم
السلام عليكم ورحمه الله بركاته « أنا نِفسي أصلي بجد بس .. » .. أسباب كتير بقى و افتح القوس .. بُص مِ الآخر .. لازم تخرج من هنا « بتصلي » .. الپوست دا هدية من ربنا ليك .. فا أنت محتاجه حتى لو بتصلي .. يلا بينا ..
1) لازم تعرف « مَن هو الله » .. هتقولي ما أنا عارف .. هقولك معرفتك بيه قليلة جدا .. شوية معلومات عامة .. و دا مش الصح .. اقرأ عن ربنا و أسمائه و صفاته و قدرته و كل حاجة .. طَب ليه ؟ ..
2) لما تعرفه أكتر .. هتحبه أكتر .. فا تحب الصلاة .. و تخلَّص الظهر و أنت مشتاق لصلاة العصر و سايب قلبك تحت عرش الرحمن .. و لما تحبه هيحبك فا يقربك منه أكتر و يخليك تدوق لذة الخشوع ..
3) لما تعرفه أكتر .. هتخاف منه أكتر .. فا تصلي برضه .. الخوف لوحده هيخليك تيأس من رحمته فا تضيع .. و الحب بس هيخليك تطمن فا تخربها ذنوب .. لازم حب و خوف سوا .. التوازن دا مهم جدا ..
4) يعني مثلا لما تعرف أنه يعلَم أن فرعون هيموت ع الكفر و مع ذلك بعتله رُسُل و قال : " فقولا له قولًا لَيِّنًا لعله يتذكر أو يخشى " .. و بعت له 9 آيات رغم أنه ادَّعى أنه رب و إله .. هتحس برحمته ..
5) و لما تعرف عقوبة فرعون في الدنيا و الآخرة و إصراره ع الكفر و قد إيه ربنا ضرب بيه مثل قوي للنموذج الظالم الكافر المستكبر .. ساعتها هتخاف على نفسك أنت كمان و تظبط الأداء .. فا تصلي ..
6) افهم يعني إيه صلاة .. معانيها .. حكمتها .. مش مجرد شوية حركات و كلام بنقوله و خلاص .. و لما تحس أنه فرضها عليك عشان بيحبك ساعتها هتصلي بقلب تاني خالص .. قلب خاشع ..
7) اقرأ عن فضل الصلاة و ثوابها .. الذنوب بتسقط من على ظهرك في الركوع و السجود .. التسبيح و التكبير .. الخطوات اللي بترفع درجاتك و تزود حسناتك و تغفر سيئاتك .. فضائل كتير بقى كدا ..
8) اقرأ عن عقوبة ترك الصلاة .. النبي قال أن ترك الصلاة كُفر .. و العذاب اللي في القبر و جهنم .. " ما سلككم في سقَر * قالوا لَم نكُ من المصلين " .. و أنت مش مستحمل حر الصيف .. فا إيه بقى ؟ ..
9) طبعا فضائل الصلاة كتير جدا و العقوبات كتير برضه .. أنا بس بفتحلك سِكَك .. و أنت دوَّر و اقرأ و افهم حجم المصيبة اللي أنت فيها .. و حجم الثواب اللي بيضيع منك ع الفاضي .. ارحم نفسك ..
10) المسلسلات و الأفلام و الأغاني و الجو دا .. ذنوب بتكتف قلبك عن الصلاة و ساعات بتأخَّر الصلاة بسببها فا تضيع منك .. لازم تتوب منها .. و أي حاجة تخليك تفكِس للصلاة .. افكِسلها ..
11) لو حاسس أنك مش قادر تتوب من الذنوب دي .. الصلاة أصلا هتساعدك .. " إنَّ الصلاة تنهَىٰ عن الفحشاء و المنكر " .. فا كل ما تصلي ذنوبك تقِل .. فا تصلي أكتر و تخشع أكتر و هكذا بقى ..
12) عشان تحافظ ع الفرض و تحميه .. كَتَّر من النوافل حواليه .. مهو لما تحافظ على سُنة الظهر .. وِش هتحافظ ع الظهر نفسه .. و أصلا لما تحب ربنا أكتر هتلاقيك بتعملها لوحدك .. أيوة بقا :wink: ..
13) بالنسبة للرجالة .. صلِّ في المسجد .. لو كسلت هتلاقي نفسك بتأخَّر الصلاة و بتسقط منك .. و ترجع تقع تاني و تكتئب و تقول مفيش فايدة و أنا ضايع و الجو دا .. الصلاة في المسجد واجبة ..
14) بالنسبة للبنات .. صلي في أول الوقت .. ما تأخريش الصلاة عشان ملبوخة في أي حاجة لأنك هتتفاجئي بصوت الأذان اللي بعدها فا تكتئبي أنتي كمان و تكسلي خالص .. و نرجع للصفر ..
15) الـ Default بتاع المسلم أنه بيصلي .. مفيش Option تاني .. حتى لو أنت خاربها .. و كل يوم الصبح بتقتل واحد ع الريق و تزني آخر النهار .. انزل صلي و اطلع .. بس ما تسيبش الصلاة ..
16) ربنا هيختبرك في الأول كتير .. صحابك في الـ PlayStation .. صاحباتِك في الجامعة .. تريقة بقى و عم الشيخ و ست الحاجَّة .. كوتشي يتسرق .. ابتلاءات هتحصل فا ما تقولش دا من الصلاة ..
17) اسمع قرآن كتير .. و ركز ع الفهم .. كل ما تفهم آيات و تطبقها في حياتك كل ما إيمانك هيزيد .. فا تحافظ ع الصلاة و خشوعك يزيد .. القرآن بيغسل القلب من الذنوب .. و سيب الأغاني أرجوك ..
18) ركز ع الجنة و النار .. كل ما تقرأ عن الجنة هتحبها فا تشتاق و تصبر .. و كل ما تقرأ عن النار هتخاف فا تظبط الأداء .. ترغيب و ترهيب مع بعض .. و شوف صُحبة صالحة تشجعك .. هارِش ؟ ..
19) ما تقولش هبدأ أصلي من بكرة .. دا مدخل شيطان :joy: .. قوم دلوقتي .. توضأ .. و ع الصلاة وش .. و مفيش حاجة اسمها أصلي حافظت ع الصلاة قفش فا بطلت قفش .. مدخل شيطان برضه ..
20) لما ربنا يكرمك و تحافظ ع الصلاة .. ما تفرحش بنفسك و أنا جامد بقى و كدا عشان ما تقعش .. لازم تنسب الفضل لربنا .. مش شطارة منك .. أمال احنا بنقول " إياك نعبد و إياك نستعين " ليه ؟ ..
21 ) معظم الحاجات دي حصلت مع ناس كتير من اللي بيصلوا لحد ما فهموا التيتة .. أنا بحاول أديك الزتونة .. الشيطان هيفضل يزرع جواك اليأس و الضياع كل شوية .. فكك منه أنت فيك أمل ..
22) أقترح تشوف سلسلة « كيف تتعامل مع الله ؟ » لمشاري الخراز ع ا
لـ YouTube هتخليك تحب ربنا و تعرفه أكتر .. و شوف له كمان سلسلة « كيف تتلذذ بصلاتك ؟ » .. هو أسلوبه روعة و هادي جدا ..
23) اقرأ كتاب « أول مرة أصلي » لدكتور خالد أبو شادي .. تأملات عن تفاصيل الوضوء و الصلاة بالأحاديث .. أسلوبه سهل و جميل .. اسمع « لماذا لا تصلي » للشيخ يعقوب .. في أجيال تابوا بسببه ..
وبس كدا
أنا نفسي أصلي بجد
تنبيه اداري
قد تكوني مهتمة بالمواضيع التالية ايضاً