أو

الدخول بواسطة حسابك بمواقع التواصل

#1

افتراضي قصة حقيقية مؤثرة جدااااا عن الصداقة

قصة حقيقية مؤثرة جدااااا عن الصداقة

قصة خالد وبندر
هذه القصة الوحيييدة التى أبكتنى وأثرت فى كثيييير هى طويييلة لذلك قسم لأجزاء

قصة محزنة .. تصور حياة وصداقة شابين .. القصة رائعة .. ولو كانت مبنية على الطاعة لكانت أجمل وأجمل ..
فالصحبة الصالحة هي الحياة "ولا تخلو القصة من العيوب "
قصة حقيقية مؤثرة جدااااا عن الصداقة
هذه القصه بلسان بندرالجزء الأول :
"
الجزء الأول
خالد الغالي"
الصداقة من أقوى العلاقات الإنسانية .. علاقة يميزها أنها تجمع عدة مشاعر وأحاسيس في إطارها مثل المحبة والتضحية وغيرها ..
يمكن أغلبنا أو أقدر أقول يمكن كلنا حصلت له مواقف مع أصدقاءه منها الحلو ومنها المر.. منها اللي تقوي العلاقة ومنها اللي تنهيها
قصتي تتكلم عن هالموضوع.. تقدرون تقولون إنها تحمل مشاعر أكثر منها أحداث لكني قررت بعد تفكير طويل إني اعرضها للناس عشان يستفيدون منها
احنا كمجتمع للرجال حدود الصداقة غالبا معروفة عندنا واغلبها تكون للوناسة والمصلحة .. انا ما اقول الكل بس اكثرها
لكن اللي صار معي شي ثاني وهاذي قصتي ..
في عام 1408هـ كنا تونا منتقلين لمدينة الرياض والدراسة بدت من اسبوعين .. تقريبا كنت في سنة رابعة ابتدائي .. دخلت فصلي الجديد وسوا الاستاذ تعارف بسيط بيني وبين الطلاب ..
لما جا وقت الراحة طلع الجميع الا انا .. دخل ولد اسمراني شعره حوسة واسنانه الاربع الامامية اللي متكسر واللي طايح .. مشمر اكمامه ووجهه كله مخوش .. وحالته لله .. الا انه رغم كل هالبلاوي فيه شي يخليها مو باينة...!!
قعد يحوس في شنطته ساعة وكل دقيقة يطلع خرابيط وكل شوي يرفع عينه عندي .. واخيرا طلع منها نبيطة .. وقبل لا يطلع التفت علي وكان من النوع اللي كنه بينطحك وهو يطالع .. منزل راسه شوي ومعبس طول الوقت بس كانت بريئة اكثر من ان تكون مرعبة !!
وقال بلدغة طفولية سببها واضح وهو اسنانه اللي حالتها صعبة : انت الحين ليش جالس لحالك ؟؟ ..
كانت هذي اول جملة سمعتها من الانسان اللي صار بعد كذا أغلى البشر على قلبي ..
كان معروف عني اني انطوائي ومنعزل .. هاذي طبيعتي حتى اني اتوتر لما يكلمني احد ما اعرفه
رديت عليه : بس كذا انا ما ابي اطلع وبعدين انا ما اعرف احد هنا .. وبنفس النظرات اللي والله اعلم كانت عاده عنده .. تعال معي وانا اعرفك على نص اللي في المدرسة .. كان يجرني من يدي وانا اسحبها بخوف .. لا لا انا كذا مرتاح قلت لك مابي اطلع .. لكن الولد اصر لين طلعني معه بالغصب .. وزي ما قال عرفني على نص المدرسة تقريبا لكن تبون الصدق حسيت اني تعلقت فيه هو !!
يمكن عشان شخصيته عكسي تماما
اجتماعي .. خفيف دم ,والكل يحبه ويحاول يتقرب منه صحيح انه كان شيطاني ومشاغب لكنه ما كان يتعدى على احد!!
حسيت اني مبهور بشخصيته ورغم انه ذكي جدا إلا انه فالدراسة ما كان بالحيل بس كان يعرف يمشي عمره من يومه صغير ..
وعلى كثر الاولاد اللي يعرفهم الا انه بعد تعلق فيني فوق ما تتصورون صرنا ما نتفارق ابد ولا يشوفون واحد فينا بدون الثاني .. مرت السنوات وصداقتي تزداد قوتهامع خالد .. مرت علينا سنين الطفولة والمراهقة وحنا سوا ودخلنا الجامعة وتخرجنا وحنا ما عمرنا تفارقنا.. حتى في السفر ما اذكر ان واحد سافر بدون الثاني الا اذا كانت السفرة مع الاهل.. اغلب الناس اللي يعرفونا يحاولون ياخذونا قدوه وكثير منهم يضربون بنا المثل في صداقتنا , يمكن تتساءلون وش سر هالصداقة العميقة؟؟
شي واحد كنا نطبقه بدون ما نحس من يوم حنا صغار , شي عجزت أغلب الناس انها تفهمه في تعاملها مع بعض , وهو ان كل واحد فينا كان متقبل الثاني بكل ما فيه من العيوب ولا عمر واحد فينا حاول يغير الثاني ويمشيه على طريقته برغم الاختلاف الكبير بيننا ..
خالد كان فيلسوف بالفطرة وبسبب علاقاته الكثيرة , وكنت اتعلم منه كثير لما اسأله كيف يقدر يجمع كل هالناس حوله كان يقول كلمات بسيطة لكن تركت فيني اثر كبير كان يقول : اسمع يا بندر الناس لها مشاكلها وكل واحد فهالدنيا صدقني منشغل في نفسه ولا احد تهمه مشاكلك فاذا تبي الناس يحبونك انسى نفسك وفكر فيهم وكيف تساعدهم في حياتهم بقد ما تقدر .
قصتي الاساسية اللي ابيها توصلكم مو في كيفيى صداقتنا لأني مهما شرحت ماراح اقدر اوصلكم مدى عمقها لكن الحدث اللي قلب حياتي ولا أظن ترجع زي ما كانت ..
في يوم اربعاء جاني خالد للاسترحة اللي نجتمع فيها مع الشباب والفرحة مبينة في عيونه وسحبني من بينهم .. تعال بندر ابيك في كلمة راس .. لما صرنا برى .. عندي لك مفاجأة .. وابتسم ..
انا ذاك الوقت اللي يشوف وجهي يقول خبل .. اناظر فيه وفاتح فمي .. كمل كلامه .. ابشرك الوالدة خطبت لي !!
في هاللحظة حسيت كأن احد عطاني كف على وجهي .. ايييييييييييييش!!
طالعني بنفس طريقته يومه صغير واللي ما تغيرت ابدا .. وراك تقولها كذا كنك مو مبسوط .. وبارتباك رديت .. لا مبسوط بس انت فاجأتني وصدمتني صراحة!! ما عمرك جبت طاري للزواج ... !!!




ضحك وهو يغمز .. عارف بس الوالدة اقترحت علي الموضوع وقلت لها مافي مانع , توقعت ان السالفة كلام او عالاقل بتاخذ وقت بس ماشاء الله عليها .. يومين الا هي جايتني تقول ترى لقينالك ..
الظاهر انها حاطتها في بالها من زمان .. وبعدين ما عاد إلا خير .. والاشرايك ؟!!
يعني للحين ماشفت البنت يا خلود .. افا عليك بس يا بندر !!! الحين اقولك توي داري وجيتك بسرعة , الوالدة تقول انهم حددوا يوم الاثنين عشان اجيهم اشوفها ..
تفاجأت .. الله بهالسرعة ؟؟!! .. مو اقولك شكل السالفة مطبوخة من قبل .. على كلٍّ .. الله يوفقك ان شاء الله .. عقبالك _يالرمت_<خالد لما كان صغير كان يحاول يناديني بكلمة الروميت الانجليزية لكنه كان يقولها بهالطريقة ومشت معنا كذا صارت زي اللقب بيني وبينه >
اغتصبت ابتسامة .. لا وين تو الناس علي .. المهم الحين خلنا نرجع للشباب لا يبدى التعليق ..
وبتعجب ممزوج بغضب مصطنع رد خالد .. لحظة لحظة
بندروه الحين اقولك خطبت وزحمة ولا تعزمني على شي بهالمناسبة ؟؟!! عالاقل ودني لكوفي شوب ياخي !!
ضحكت .. لا يا عمي الحين قهوة وبعد شوي الااحنا في واحد من هالمطاعم حقتك اللي فواتيرها تكسر الظهر تراي اعرفك زين خلاص عشرة عمر .. رد .. والله انك قعيطي مستخسر فيني ؟؟ .. وقعدنا نضحك , حطيت يدي على كتفه .. ولا يهمك يا خالد .. اذا صار شي اكيد, ابشر بذيك العشوة اللي يحبها قلبك في المطعم اللي تختاره وش تبي بعد؟؟! "كان ودي اعزمه بس النفسية عدم ".. رد بغمزه .. ما تقصر اصيل يا بندر بس اهم شي لا تفشلنا مثل ذاك اليوم !!
افشلك !! متى ياويلك من الله ؟؟! .. عطاني نظرة اللي مو مصدق .. معقولة نسيت ذاك اليوم يوم يمدح لنا خوينا سامي ذاك المطعم ., قلنا لازم نجربه ونشوف .. لما تذكرت الموقف بديت اضحك .. اوووووووه الله يقلع شرك وش ذكرك بهالموقف الحين .. ابتسم خالد ويده على وجهه .. تذكر؟؟ يومها طلبنا عصير وطقيت الصدر يعني انت اللي بتدفع ويوم جا الحساب جت معه المصيبة .. والله لو انك شايف وجهك يا بندريوم شفت الفاتورة تقول صابين عليك مويه باردة .. انحرجت .. لا والله !! على الاقل احسن من اللي قعد يتفلسف ويسوي روحه ابو العريف , لا وتأشر بيدك بعد كننا في ملعب , وبديت اقلد صوته ونظرته المعروفة ... لو سمحت الفاتورة مو لنا حنا طلبنا عصير بس !! والله لو انك شايف وجهك انت يوم رد عليك .. "نعم يا سيد هذي فاتورة العصير بس " الحين من اللي طلع فشل الثاني ؟! .. ابتسمت .. اذكر مابقي في جيوبنا شي ماطلعناه .. ويالله كفى ولقطنا وجيهنا وطلعنا وحنا نتصدد لا احد يشوفنا .. وطوال ما كنت اعيد القصة وخالد ميت من الضحك .. كان يسعدنا ان حنا نعيد الذكريات اللي مثل هذي .. المهم رجعنا عند الشباب ..
من بدا موضوع الخطبة حسيت انه خلاص ماراح يرجع شي زي اول , تضايقت مرة بس ما ادري وش اللي فكرت فيه ..يعني مستحيل نقعد كذا بدون زواج للابد .. كان واقع لازم ارضى فيه ..
لما رجعنا داخل كان مستانس , يلعب , يضحك وينكت , صحيح هاذي عادته لكن اليوم كان بزيادة .. اما انا كنت عكسه تماما .. حسيت اني بافقد هالانسان ..
الشخص الوحيد اللي اعتبرته صديقي




الفصـــــــل الثاني
جاني للبيت !!
خفت يكون صاير شي .. خير خالد عسى ما شر .. عسى ما .. وبتوتر واضح في صوته.. ابد والله احس اني متوتر شوي .. ابتسمت له .. يابن الحلال شده وتزول زي غيرها .. ابتسم وقال .. وشرايك تجي معي !! قعدت اطالعه ابي اتأكد انه جاد .. انت صاحي !! وين اجي معك ؟؟! .. طيب تعال وخلك فالسيارة بس .. شديت على يده وحطيت عيني في عينه وقلت : يابن الحلال رح لحالك وانا بستناك في البيت طيب!! .. كان يطقطق اصابعه .. ادعي لي يالرمت ..
ما يحتاج قول الله يوفقك ويسنع دربك ان شاء الله , يالله عاد الحين رح وحلق وتكشخ تلقاك شهر ما دخلت الحلاق على هالوجه .. كنت احاول اضحكه لانه واضح انه متوتر .. طيب اجي عندك عشان تشوف شكلي قبل اروح لهم .. كتمت ضحكتي .. انا لله وانا اليه راجعون ؟!! انت وبعدين معك يا عمي اصلا البنت اول ما تشوف عيونك بتوافق لا تشيل هم وتوكل على ربك .. الله يستر مادري وش فيني خايف يا عمي ؟! < كلمة يا عمي معروف اني دايم اقولها فاذا قالها خلود لي يعني خلك معي او افزع لي زي ما تقولون كانت كلمات بيننا > .. عادي كل العالم يتوترون في هالموقف بس انت شد حيلك ولا تتأخر على الجماعة .. طلع من عندي ,
وبعد العشا كنت انا اللي مادري وش اسوي بعمري من التوتر وكل شوي ادق عليه لدرجة ان ريم اختي حاولت تهديني .. ما صارت يا بندر يمكن انت متوتر اكثر منه .. يا ريم هذا خالد تعرفين يعني وشو خالد هذا اقرب لي من نفسي .. والله عارفة بتعلمني فيكم بس اذكر الله وهد الوضع شوي .. ما بقى عندي صبر وطلعت للشارع استناه , بعد حوالي الساعة شفت سيارته مقبلة بسرعة جنونية كالعادة لدرجة انه بغى يدخلني تحتها لولا اني بعدت بسرعة , نزل وشوي ويناقز من الفرحة .. وبرعب صرخت فيه .. خلووووووووووود !!! انت خبل بغيت اروح تحت سيارتك .. ناظرني نظرات جديدة علي وابتسم .. سألته .. ها بشر ؟؟ .. لمني الرجال وعرفت انها دخلت مزاجه لدرجة انه ما عاد يدري وينه فيه , المشكلة انه يتكلم ولا فهمت من اللي قال ولا حرف , كنت اعرفه عاطفي بس ما توقعت انه يتعلق لها الدرجة وبها السرعة .. فرحت له لما شفت كل هالسعادة فيه
لكني بديت اتخيل وشلون بيصير حالنا بعد هالتغير اللي ما طرى على بال , يمكن تستغربون ليش كنت متخوف كثير بس صدقوني لما يكون عندك انسان موجه لك كل ذرة في كيانه وكل فكره معك ولفترة طويلة من عمرك وفجأة يجي من يشاركك فيه , صدقوني تتلخبط حياتك ولو كانت المشاركة بسيطة وشلون لو جا الانسان اللي بيصير منافس لك؟! مو حب تملك لكنها عادة وغلا كبير .. قطع حبل افكاري خالد وهو يقول : على فكرة بندر في شي ابي اقول لك اياه .. وجهه وهو يقول هالكلام ذكرني بوجهه لما جا يعلمني انه سرق شاهي وحليب من غرفة المدير واحنا صغار , قلت بابتسامة .. وش مسوي بعد هالمرة ؟؟ .. مسكني بيدي وجلسنا على رصيف بيتنا حسيت الموضوع جد قال : صراحة يا بندر انا ما قلت لهم اني ادخن ؟!! لحظة قبل لا تقول شي اصلا هم ما سألوا إلا اليوم وانحرجت وقلت لهم لا ما أدخن خبرك خفت يرفضون .. افا ليش يا خالد تبدى حياتك بكذبة تافهة ؟! .. ومن قال لك انها كذبة ؟! اصلا انا نويت اني اوقف سجاير .. انا لما قال لي كذا ضحكت !! تذكرت السنين اللي كنت احاول فيه انه يوقف وكيف انه حاول كم يوم ولا قدر , وفالاخير لما اشوفه يعاني نستسلم , لكن من عيونه واضح انه كان مصر ومصمم هالمرة على هالشي والله العالم .
بندر اكيد بيجون يوم ويسألونك انت بالذات من بد الشباب عشان كذا حبيت اعطيك خبر .. مو شرط يا خالد بالعكس كثير ناس ما يفضلون يسألون الاصدقاء المقربين وطبعا واضح السبب , لكن لو جاني احد وسألني عنك ما راح اكذب عليه بقوله هالكلمتين يالرمت : خالد صديقي من سنين والف النعم فيه بس انا متفق معه لما نتزوج محد يعطي معلومات عن الثاني عشان الاحراج لان زي ما الواحد يقول الحسنات لازم يقول السيئات ما في كامل في هالدنيا هذا زواج مو لعبة وحنا ما نبي نضطر لها الشي , بس اذا تبي العلم باختصار لو طلبني اختي عطيته اياها وهذا كل اللي عندي .. لما انتهيت من كلامي ربت على كتفي وقال ريحت بالي ماخاب ظني فيك يالرمت انا اشهد اني عرفت من اخاوي , توادعنا وركب سيارته , دليت البيت وانا احس بضيقة شديدة صحيح دخلنا ال26 ذاك الوقت يعني طبيعي اللي قاعد يصير لكن ماادري وش اللي كان صاير معي كان يكلمني كل يوم عن المستجدات اللي صارت ويسألني اذا كان احد جاني من اهل البنت وانا اقول له للحين ما شفت احد وحتى لما نتقابل طول الوقت يتكلم فهالموضوع , بيني وبينكم بديت اطفش صار كل كلامه عن زواجه لكن اللي معجبني في هالسالفة كلها اصراره على ترك التدخين صحيح حالته كاسرة خاطري يعني الصداع ما تركه ابد وعيونه دايم حمر ونفسه في خشمه طول الوقت والربع كلهم يحطمونه يقولون اول ما تتزوج بترجع لا تتعب نفسك , بس في تقدم قعد اسبوع وشوي بدون ولا سيجارة , كان مصر على هالبنت وما يبي شي يوقف في طريقه وخالد صديقي واعرفه زين اذا حط شي في باله يجيبه ..


إظهار التوقيع
توقيع : جزائرية تركية
#2

افتراضي رد: قصة حقيقية مؤثرة جدااااا عن الصداقة

الفصل الثالـــــــــــــــــــــــث
يوم الخميس زي عادتنا كنا مجتمعين انا والربع فالاستراحة وخالد للحين ما جا صار دايم يتأخر لكن عمره ما تركنا , كنا جالسين بعضنا يلعب ورقه والباقين يسولفون , انا كنت العب
وسمعنا صفقة الباب اللي برى وبما ان خالد اللي ناقصنا عرفنا انه هو , وبدى التعليق اللي يقول جانا العريس والثاني يقول الله يعينا عليه من اول ما وقف سجاير وهو نار شابه , قلت لهم : كلش الا خويي عاد لحد يغلط عليه وانا موجود .. وقعدنا نضحك , فتح باب الغرفة والتفت اسلم عليه ما حسيت الا واحد يرفعني من القلابي ويلزقني عالجدار بقوة , لما حاولت اعرف من هو الا هو خالد كان معصب ويصرخ في وجهي ويدفع جسمي عالجدار بطريقة عنيفة , كنت مصدوم واطالع فيه مو فاهم شاللي صاير حتى ربعنا يطالعون بتعجب ولما استوعبوا ان السالفة هوشة قاموا يفكونه عني , في هاللحظة انا للحين ما بعد استوعبت الموقف بس يوم شفتهم يسحبونه عني حسيت انهم اوجعوه بديت ابعدهم معه واحاول احميه بيديني كنت خايف عليه وجسمه صار احمر من تسحيبهم الشديد وانا لهاللحظة ما ادري وش صاير لكنهم كانوا اكثر منا وقدروا يمسكون كل واحد في جهه , سامي كان يسأل خالد بعصبية : انت صاحي ؟!! وش جاك انهبلت ؟! وش صاير ؟! ورد خالد بصوت انسان ثاني ماعرفه وياليته ما تكلم : اسأل هالجبان اللي قدامكم وش سوى لا تسألوني انا .. في هالوقت بديت استوعب الموقف .. خالد قدامي في حالة عمري ما شفته فيها , معصب والكلام يطلع مقطع منه بسبب تنفسه السريع , نظرته ما غيرها تطل من عيونه بس الحقد حل محل البراءة ؟؟ كان كل شوي يحاول يتخلص من يدينهم عشان يضربني !!تصوروا !! بعد كل هالعمر وهالعشره يضربني انا بندر عمره ورفيق دربه , قلت له وانا احاول اقرب عنده اهديه : وش بلاك يا خالد انا وش سويت يا خوي ؟! رجع يحاول يتهجم علي وابعدوني عنه بسرعة .. لا تقول يا خوي انا لاني اخوك ولا اتشرف اكون اخوك وبصوت تخالطه البحة من شدة الصراخ وهو يمسك راسه بين يدينه بعصبية .. وبعدين لا تقول وش سويت يا حقير لا تنرفزني زيادة .. خفت عليه كان يصارخ ما يتكلم ويطلع كلمات زي السم .. لما ما تكون قد الكلام اللي تقوله لاتقعد تتفلسف علي يا اكبر كذاب .. قال سامي : خالد وش هالكلام ؟!! كبر عقلك وخلنا نفهم القصة .. صرخ فيه .. انتم لاتتدخلون ورجع يطالعني وهو يضرب على صدره بقهر واضح .. انت ما شفتني اموت في اليوم عشرين مرة وانا احاول بكل ما فيني اني اوقف سجاير ليش تقولهم اني كنت ادخن ليش ؟! .. كنت هاللحظة زي الغبي وعيوني بتطلع من مكانها رديت .. خالد انا قلت لك محد جاني ولا احد سألني .. كلامي زاد ثورته وقام يتحرك زي المجنون .. هذا اللي يبي يذبحني , بندر لا تكذب لاتكذب ما ابي اسمع منك ولا كلمة صحيح انهم رفضوني بس ما يهم البنت بدالها الف وبدت نبرة صوته تخف حدتها .. لكن انت ليش سويت كذا يا بندر ليش ؟! الكلام اللي قلت لي ذاك اليوم كان كله كذب وتمثيل ؟!! على الاقل ليش توعدني وتخلف لو قلت انك بتعلمهم كان تفهمت الموضوع , انت حطيتني في اصعب موقف , معقولة استخسرت السعادة اللي انا كنت عايشها ولا قدرت تستحمل فكرة اني ابعد عنك شوي !! معقولة يا بندر انت من بد هالعالم كلهم تسوي فيني كذا هذا جزاي اني عزيتك ؟؟! .. رجعت النبرة العالية .. ما توقعتك كذا ابدا انت انسان اناني تعرف يعني ايش اناني ؟! حاولت اتمالك نفسي ورديت بصوت هادي قد ما اقدر .. بس لا تكمل لاتقول كلام تندم عليه بعدين يا خالد لا تظلمني وانا اخوك .. ضحك بسخرية .. اندم !! اندم على ايش والا ايش ؟! على العشره الحلوه اللي كانت بيننا والا على 16 سنة اللي ضيعتها من حياتي على واحد مثلك والا عالانسان اللي توقعته صديقي وما طلع .. وقبل ما يكمل كلمته هالمرة انا اللي تخلصت من يدينهم وهجمت عليه ورميته عالارض , ولما ثبته تحتي رفعت يدي لكنها وقفت وكل عضلة فيني ترجف رجفة فظيعة , لان اللي تحتي كان خالد , خالد الرفيق !! خالد الغالي !! يارب انا وش قاعد اسوي معقول امد يدي عليه ؟! صرخت في وجهه .. اسمع يا خالد كل الكلام اللي قلته ممكن اتغاضى عنه عشان المعزة اللي لك بقلب ولاني متأكد انه فيه سوء فهم فالموضوع اما انها توصل فيك انك تقول اللي بيننا ما كان شي فهذا اللي ماراح اسمح لك تقوله فاااااهم ؟! .. خلص يدينه من يديني ودفعني من فوقه .. اقول ابعد عني بس .. وقف وانا للحين على الارض .. اسمع يا بندر هي كلمة ورد غطاها ماعاد ابي اشوفك ولا عاد ابي اسمع صوتك او حتى طاريك وكل اللي كان بيننا اليوم انتهى , الانسان المخادع اللي ما يقدر الصداقة ماله مكان في حياتي ابد , واذا كنت سويت هالحركة خايف انك تفقد جزء مني يا طفل ابيك تدري الحين انك فقدتني للابد ..
طلع من الاستراحة بنفس الحال اللي دخل فيه واشرت لسامي وانا احس بارهاق شديد : اطلع معه الله يعافيك لا يسوق السيارة وهو على هالحال بعد هو مب ناقص جنون فالسواقة لكنه رجع بعد دقايق يقول انه ماقدر يلحقه..
انتشر الهدوء بعد طلعة خالد وكانوا كلهم يطالعوني مو عارفين وش يقولون , كانوا مصدومين مثلي واكثر , وقفت ويدي على قلبي حسيت اني مخنوق وانا احاول استجمع القوة اللي باقية فيني قلت : عذرا يا شباب متأسف على الفصل البايخ اللي صار قبل شوي , يالله انا ماشي .. سألني سامي بتردد واضح : لحظة قبل ما تمشي يا بندر صحيح الكلام اللي قاله خالد ؟! هزيت راسي بأسى وانا امسك دموعي اللي عصتها شيمة الرجال وبابتسامة رديت : ليش استغرب منكم انكم تصدقون هالكلام فيني اذا كان خالد خوي الروح قدر يصدقه ؟!!!! مع السلامة .. وطلعت , لحقني سامي .. خلني اوصلك للبيت يا بندر تراك على طريقي .. شكله حاس بتأنيب ضمير وراحمني وهذا اللي ما احبه رديت .. لا مشكور انا بخير لا تشغل بالك .. وركبت السيارة ومشيت.
فالبيت الوالدة وريم كانوا فالصالة لما دخلت , واستغربوا رجوعي بدري .. بعد السلام سألت الوالدة باهتمام : بندر يمه وش فيك ؟! .. ريم بعد قالت شي زاد الالم اللي في قلبي : عسى ما شر يا بندر خالد فيه شي ؟؟؟ .. حاولت امثل اني معصب .. انتي ما تفهمين ؟!! كم مرة اقولك يا رويم لا تتفاولين على العالم , يا جماعة كل اللي صار ان احنا تفرقنا بدري الليلة عادي وشفيكم ؟! .. قالت الوالدة .. ياولدي وجهك متغير انا امك واحس فيك قلي يا امي من اللي مضيق صدرك ؟!.. قالت ريم : لا يكون متطاق مع واحد من العيال ؟؟ قالت امي .. وش دعوى ما تعودنا منك يا وليدي هالحركات ؟!!
كنت عارف ان شكل ثيابي يدل على اني توي طالع من هوشة .. قلت لهم : ريحوا بالكم تهاوشت مع واحد من الشباب بس جت سليمة خلاص عاد فكوني , قالت ريم: اكيد بتجي سليمة اذا كان خلود المرعب ابو المشاكل هو اللي دايم يفزع معك المفروض محد يقرب لمك , هزت راسها كنها تذكرت شيء مو حلو .. يمه منه ذاك الولد شراني ياكثر ماصيحني وحسرني وحنا صغار , تذكرين يمه ذيك الايام؟! .. ابتسمت امي .. اول سنتين من نقلتنا للرياض ما كنت اربط شعرك دايم تجيني تصيحين من تمعيطه لشعرك .. قالت ريم .. وتضحكين بعد يمه المشكلة ان ولدك ذا كان يطقني معه ما كني اخته الحمد لله والشكر .. قالت امي .. صحيح ان خالد كان شيطان وهو صغير بس والله ان الولد والنعم فيه شوفي وش صار الحين .. آلمني كلامها زيادة بس سويت الوضع عادي ووجهت كلامي لريم.. وانتي وش تبين ما عندك الا خالد وخالد ؟! بعدين تستاهلين رازة وجهك عند العيال فالشارع دايم وهو معتبرك اخته .. حسيت اني احرجتها وردت .. انا والا انت اللي ما عنده الا خالد ؟!! .. قطعت الحوار ورحت لغرفتي ..
إظهار التوقيع
توقيع : جزائرية تركية
#3

افتراضي رد: قصة حقيقية مؤثرة جدااااا عن الصداقة

الفصل الرابع
قعدت في فراشي استرجع اللي صار معقولة خالد يسوي معي كذا ويقول عني هالكلام , وبدون حتى ما يفكر وقدام هالعالم كلهم ؟!! لا اكيد انا احلم اصلا اللي شفته اليوم انسان ما اعرفه !!! ورغم الاهانة اللي كنت احس فيها والجرح اللي في قلبي الا اني دست على مشاعري ورحت ادق عليه لازم افهم وش اللي مضايقه لها الدرجة ليش ؟؟ لانه مو اي احد لكنه للأسف عطاني مشغول بعدين قفل جواله !!
جلست في بيتنا ثلاث ايام لارحت للاستراحة كالعادة ولا استقبلت مكالمات من احد حتى اهلي مستغربين , لكن لان طبعي كتوم ما قدروا يعرفون اي شي .
كانت هاذي اول ثلاث ايام ما اشوف خالد فيها واحنا في نفس المكان مرت علي كنها ثلاث سنوات , ورغم اللي سواه معي الا انه وحشني حيل واشتقت له ذاك الشوق اللي تحسه يوجعك مو بس نفسي الا تحس شئ يألمك من جد اذا فاهميني !!! , لكنه الله يسامحه ما حاول يعطيني اي فرصة عشان اتصل عليه .
اتصلوا الشباب من الاستراحة وكانوا حاطينه عالسبيكر وسلموا علي وسألوا عن احوالي
عاد واحد منهم اسمه ماجد قال : وينك من زمان عنك يارجال كبر راسك علينا والا عشان خويلد ما عاد يج.. قلبي انقيض بس رديت .. والله يا طلال انا مقدر موقفك وخوفك على اخوك واعرف ان قلوبكم على بعض دايم وصدقني اخر شي اتمناه ان خالتي يضيق صدرها وانت عارف زين اني اعتبرها امي الثانية لكن انا ما غلطت معه ابد , هو اللي جاني ونسف كل شي حلو بيننا في لحظة غضب .. طيب ما تبي تعرف وش القصة وليش خالد سوى معك كذا ؟ .. مهما كانت القصة ما تعطيه الحق انه يسوي اللي سواه ترانا ما عدنا صغار وانا اخوك , بالله هاذي طريقة يعاملني فيها ؟!! والله اني ماشفته يسوي كذا مع الناس اللي كان يتهاوش معهم وهو مراهق , خالد قدر يقول عني كلام يجرح بدون ما يراعي اي شي ويصدق فيني كذبه بدون حتى ما يعطيني فرصة ادافع عن نفسي .. تنهد طلال .. ياخوك اللي صار ان اهل البنت قبل لا نحدد الملكه رفضوا فجأة يقولون انهم عرفوا انه يدخن او عالاقل كان يدخن ولا عندهم استعداد انهم يجازفون , ومن ضمن الكلام فهمنا ان اللي قالهم بندر وانجن خالد لما سمع اسمك وكان مصدوم وقعد يصارخ يقول كيف يسوي فيني كذا وهو وعدني ؟! وطلع وصار اللي صار لكن اللي فهمناه بعدين انه طلع بندر ولد جيرانا بس تبي الصراحة ما احد من اخواني جا على باله كلنا رحنا لك على طول لما سمعنا الاسم .. ضحكت بتعجب وانا اقول في قلبي " هذا الشي التافه هو اللي خلاك تظلم خويك يا خالد ؟!!" رديت على طلال .. والله هذا مو ذنبي ولا هو عذر للي سواه معي خالد ظلمني وكسر في داخلي شي عمره ما يتصلح والله انه غالي وانا مسامحه ياطلال ولا ابي شي منه بس صدقني ما اقدر _ وحسيت اني ماعاد اقدر اكمل _ بنبرة هادئة رد طلال .. على كلٍّ انا حبيت افهمك اللي صار وانتم رجال وفاهمين وش تسوون وانا ما اقدر الومك على شي بس هذا اخوي يا بندر ولازم احاول اسوي اي شي .. اعذرني ياطلال ياليتك جيتني في شي ثاني والله رقبتي سداده .. اصيل ما تقصر يا بندر اشوفك على خير .. مع السلامة .. لما عرفت التفاصيل ضاق خلقي زيادة كنت اتمنى ان الموضوع يكون اكبر يعني معقولة يسوي كل ذاك الفصل عشان تشابه اسماء ؟! شي يحز فالخاطر صراحة صحيح ان خالد معروف عنه عصبي ولا يقدر يضبط نفسه بس هالكلام المفروض ما ينطبق علي , على الاقل مو بهالطريقة اللي صارت !! باختصار حسيت اني مثلي مثل غيري بالنسبة لخالد ...
فاليوم الثاني جت الوالدة تصحيني الساعة 10 الصبح .. يمه بندر اصحى خالد عند الباب .. كنت متوقع ان هالشي بيصير وحاسب حسابه .. قولي له نايم .. قلتها وانا اغطي راسي بالبطانية .. حاولت تسحبها من فوقي .. يوه اقولك خالد عند الباب وش بلاك يا ولدي .. على صوتي شوي .. عارف انه خالد سمعتك من المرة الاولى وانا اقولك ناااايم .. تعجبت الوالدة من تصرفي لأني اول مرة اسويها لكني ماعطيتها فرصة عشان تستفسر , طلعت من غرفتي وانانطيت من فراشي للشباك على طول , كنت اشوف سيارته لكن ماقدرت اشوفه حاولت منا ومنا مافي مجال .
صار يمر على بيتنا يوميا الظهر والليل وانا اتهرب منه واصرفه ولا عمري طلعت له , ودروا اهلي ان بيني وبينه شي اصلا واضح مايبي لها ذكاء , اما جوالي صار مايسكت سواء مكالمات من خالد او من الناس اللي يحاولون يصلحون بيننا ومسجات طول الوقت حتى اذا قفلته وفتحت الثاني او سوا كان يدق عليهم على طول , مادري العب على مين هذا خالد اللي يعرفني زين ويعرف كل ارقامي وحتى لو كان عندي رقم محد يعرفه فهالكلام ما ينطبق عليه ..ي صرت انت بعد ما تجي ؟!
سمعت كأن احد ضربه وسكته المهم قلت : معليش يا شباب انا هاليومين ما اعتقد اني بجي للاستراحة مالي نفس سامحوني .. قال سامي : وشرايك نجيك للبيت اذا ما عندك مانع ؟! .. استغربت بس رديت .. بالعكس حياكم الله اي وقت البيت بيتكم .. خلاص اذا شفنا يوم مناسب بندق عليك .. خير ان شاء الله , الله يحييكم اي وقت .. مع السلامة ..
بعد شوي دق خالد !!!!!!!!! معقولة ماني مصدق عيوني وش القصة ؟! قعدت ساعة اطالع الاسم ابي اتأكد انه فعلا هو , لكن للأسف سويت شي بظل ندمان عليه طول عمري , عطيته مشغول وقفلت الجوال , ليش سويت كذا ما ادري اظن انها كانت ردة فعل طبيعية بعد اللي صار لي معه وما اعتقد احد يلومني , يمكن ابي ارد له اللي سواه او كنت عارف لو رديت انه بيكون لي فضل عليه وهذا اللي ما ابيه المهم هذا اللي صار , لكن الوضع استمر صار يدق علي وانا ما ارد كنت اعاند قلبي قبل لا اعانده هو , صار يرسل مسجات يترجاني فيها اني ارد لكن اللي فهمته من بعض المسجات انه يبيني اسامحه لانه اكتشف انه غلط بحقي ومن هالكلام اللي خلى عنادي يزيد ..
بعد يومين دق علي طلال اخو خالد الكبير هو بعد صديق عزيز يجلس معنا من فترة لفترة فالاستراحة وكنت اغليه من غلى اخوه واحترمه كثير ولا قدرت اصفطه رغم اني عارف سبب المكالمة ورديت : مرحبا طلال .. هلا وغلا وش اخبارك وعلومك يا بندر ؟ .. ابد والله تمام .. انت اخبارك واخبار الاهل ؟ .. تسلم كلهم تمام , بندر يا خوي ..!!
سم ؟ .... سم الله عدوك , انا داق عليك عشان موضوع خالد انا عارف انك ما تبي احد يتدخل فالموضوع حتى خالد مو راضي يتكلم انا عرفت من الشباب وفكرت كثير قبل اكلمك لكني ما قدرت اشوف حالة اخوي كذا واصفط يديني , الصراحة من ذاك اليوم وهو مو خالد اللي نعرفه ولايروح ولا يجي ماعاد يسولف ولا يضحك حتى الاكل دايم ما يشتهي !! والوالدة ضايق صدرها عليه تحسب انه زعلان على البنت وتقول لاخواني وين بندر عنه محد بيوسع صدره الا هو !! , صار طول الوقت في غرفته خاصة لما عرف انه مالك يد فاللي صار , وليتها جت على كذا خالد رجع يدخن بعد بس هالمرة بشكل يخوف يا بندر
إظهار التوقيع
توقيع : جزائرية تركية
#4

افتراضي رد: قصة حقيقية مؤثرة جدااااا عن الصداقة

الفصـــــــــــــــــل الخامــــــــــــــــــــس
ذاك اليوم اشتقت له ورجعت بي الذكريات لايام الابتدائي ويا كثر المواقف اللي حصلت لنا لان اللي يصادق واحد مثل خالد تتحول حياته لمغامرة , مرة في الصف السادس اذا ما خاب ظني كان الاستاذ مسوي مسابقة اللي يفوز بيصير "العريف" اللي ينظم الفصل اذا ما كان الاستاذ موجود ..!! والله ايام وحشتني , المهم انا كنت ميت عشان اصير هالعريف اجي بدري , واشارك , وصاير مؤدب " ثقيل دم على قولة خالد " كان مايحب الاشخاص اللي مثلي يهتمون بالدراسة ويحبون المدرسين او يتمصلحون عندهم على قولته بس سبحان اللي جمعنا مع بعض كان يقول ....... ليش تبي تصير عريف ؟!! ترى العيال بيكرهونك .. ما اهتميت لكلامه ورديت .. ابي اصير كيفي !! بعدين ياغبي بخليك تطلع وتدخل على كيفك .. لا مو لازم انا اسوي اللي ابي حتى لو ما كنت انت العريف ... المهم قبل لا يختار الاستاذ بيومين شريت بلونات وجبتها للمدرسة , خالد كان مريض وغايب بس انا والشلة رحنا ومليناها مويه واول ما انتهى الدوام رميناها من فوق وانحشنا , يمكن بتقولون وين الولد المؤدب لكن انا بعد خالد صارت تجيني طلعات , توقعت الموضوع محد بيدري عنه لكن من بكره اول ماجيت الصبح قالولي العيال ان الاستاذ يسأل عن اللي جاب البالونات وسوى الحركه اللي امس , هنا انا قلت على العريف السلام , هالاستاذ ما يصدق , رحت لخالد اللي متجمعين عليه كل العيال بما انه كان غايب امس , علمته باللي صاير وهو يدري انا وش سويت امس لاني قلت له السالفة واحنا جايين للمدرسة , قال خلاص ولا يهمك انا اتفاهم مع الاستاذ كنت اعتمد عليه كثير , لما بدت الحصة دخل الاستاذ وبنبره كانت تخلينا ننتفض .. اللي رمى البالونات امس يوقف .. محد رد فالبداية كان ماسك مسطرة وش كبرها الله يسامحه .. شوفوا لو ما تكلمتوا بعاقب الفصل كله .. ناظرت خالد وانا بموت من الروعه ابتسم وغمز لي بعدين وقف .. انا يا أستاذ .. قالها كنه محرر القدس !! قرب الاستاذ من عنده وسحب اذنه .. والله اني عارف انه ما في غيرك يا خالد يسوي هالحركات , انت متى بتعقل ليش ما تصير مثل اخوانك او مثل صديقك بندر جننتني معك يا ولد ...!!
الصراحة ما توقعت ان خالد بيتحمل اللي صار بدالي ؟؟! فعلا كنت مستغرب والدليل اني قاعد اتفرج وهو يتعاقب وانا ساكت !! طبعا الاستاذ كسر المسطرة على يدينه يا حرام وانا احس ان عقلي بيطير من المنظر بعدين وداه للمدير .. في نفس الحصة اختارني الاستاذ عريف وطبعا ماتهنيت فالخبر لاني مادري وش صاير مع خالد ذاك الوقت .. لما انتهت الحصة كان واقف قدام غرفة المشرف وحوله بعض الاولاد , يوم شافني ركض ولمني .... احلى ىىىىى اخيرا وصلت اللي تبي مع وجهك .. انا ما كنت اقدر اتكلم اشوف يدينه حمر من الطق ويفركها على جسمه ووجهه الاسمر تخالطه حمرة بسبب المرض وهو يضحك .. قلت وانا متنرفز يمكن من الاحراج .. خالد ليش سويت كذا انا ما قلت لك – قاطعني .. يابن الناس يعني اول مرة انطق خلاص مشها يالله لازم نحفل اليوم .. من بعد اللي صار عمرنا ما تكلمنا عن هالسالفة شكله نساها او ما اعتبرها شئ بس عمري ما نسيت صحيح اننا كنا صغار لكن فزعته هاذي لا يمكن انساها ..
هالذكريات شوقتني له ورحت اتفرج على صورنا وعلى اشرطة الفيديو , عجبني كيف كنا مرة قريبين من بعض ولا في مكان يطلع فيه واحد الا الثاني جنبه , اغلب الاشرطة ما قد شفتها من قبل كانوا حوالي العشرين شريط شي لسفراتنا وشي لطلعات البر وكلها شفتها في يوم واحد ورى بعض , اكتشفت اني طول الوقت اطالع فيه هو حتى فالصور عيني عليه بس , وطوال وقت عرض الاشرطة وانا اضحك عليه كان بطبعه خفيف دم محد فهالدنيا يخليني ابتسم او اضحك او حتى يجنني مثل ما يسوي , واحد من الاشرطة كان فيه مقطع أثّر فيني كثير كنا مخيمين فالصمان واحد من الشباب يصور ومعه خالد , مروا على اغلب الشباب , اللي ينصبون الخيام واللي ينزلون الاغراض وخالد كان ماخذ دور المقدم عشان يتهرب من الشغل كالعادة هو واللي معه وقعد يسوي مقابلات معاهم ويستهبل عليهم وانا اضحك طول الوقت على طريقة كلامه وتعليقاته لما جا دوري كنت قاعد اشب الفحم و معطيه ظهري قرب مني ... عاد جينا الحين لاغلى انسان ... كنت مشغول باللي معي .. هلا هلا خلود , مسوي فيها مذيع يعني ؟!! ماودك تساعدني بدال هالخرابيط ازعجت العالم يا عمي .. كان يوجه كلامه للكاميرا وحاط يده على ظهري وانا مو معطيه وجه .. هالولد اللي تشوفونه عرفته من يوم احنا صغار عزيز وغالي علي ولا ابدله بكنوز الارض ... قاله اللي يصور : ما اقدر انا على هالكلام !! يابعدي هاللي انت كاشخ فيه وتمدحه من الصبح حتى ما عطاك وجه وانت تتكلم .. طالعني بنظرات ما انتبهت لها ذاك الوقت كانت تحمل معاني حلوه .. كمل كلامه .. والله لو ايش يصير ما يتغير شي من غلاه .. تجمعت الدموع وانا اسمع كلامه مع اني ذاك الوقت واضح اني ما انتبهت لاي كلمه جتني مشاعر متضاربة كنت اقول في نفسي " كلام رائع لكن ما طبقته يا خالد باللي سويته فيني " , سكرت الفيديو ورحت انام او بالاصح احاول انام .
يوم الثلاثاء رجعت للبيت متأخر ولما وصلت عند الباب شفت سيارته , كان يستنى داخلها والله وحده اللي يدري من متى , وعلى ما يبدو لي من طريقة قعدته وتكتيفة يدينه انه نايم لأن راسه مايل على جنب بس شكله متغير مرة !! اول شي لحيته بدت تطلع , شعره تركه يطول بدون ما يرتبه وهاذي مو عادته ابد , واضح ان جسمه ضعف يعني كأنه واحد توه طالع من السجن ...
وقفت سيارتي لكنه ما حس ما ادري وش اللي خلاني اصفق باب سيارتي بقوه عشان ينتبه ... يمكن ما كنت ابغى انتظاره يطول , فز من نومته ونزل بسرعه , ناداني وصوته تخالطه بحه واضحه , وخالد من النوع اللي صوته يروح بسرعه اذا صارخ او اذا صار مريض حسيت بتعبه , لكني ما التفت له وسويت روحي ما اسمع ودخلت البيت , الرجال قعد يطق الباب زي المجنون لدرجة اني خفت يصحي الجيران ويفضحنا قدام العالم وانا واقف عنده من داخل منزل راسي واسمعه .. افتح يا بندر خلني اكلمك الله يعافيك لا تسوي فيني كذا يا بندر .. كان كل مره ينادي فيها باسمي بصوته اللي مره تسمع الكلمة ومره ما تسمعها اتألم بس من جد ما ادري وش قوة القلب اللي جت لي فجأة وخلتني اتماسك ولا اطلع له كل ما مر الوقت زاد عنادي , بعد فترة سمعت صوت جسمه ينسحب على بابنا كنه يقعد فالارض , رحت اركض بافتح الباب خفت انه صار له شي , لكن سمعت صوته يكلم نفسه لانه متوقع اني دخلت داخل خلاص .... سامحني يا بندر انا آسف والله اسف ... وانا اسمعه كنت كني اسمع اعتذار من طفل متأكد ان اللي قدامه ماراح يسامحه , جلست على الارض وحطيت راسي بين يديني وسندت ظهري للباب من داخل , وانا افكر في نفسي " معقولة اللي قاعد يصير معنا يارب ؟!! " والله دنيا غريبة , وجلسنا ساكتين , بعد فترة سمعته يتحرك ويركب سيارته .
بعد يومين جاني واحد من ربع الثانوية اسمه نواف كانت علاقته قويه مع خالد والى الحين وهم ربع بس هو مو من شلة الاستراحة ابتسمت اول ما شفته تذكرت على طول هباله هو وخالد ايام كانوا يرقصون سامري فالصف كانوا أجرأ اثنين وكيف جتهم تهزيئة من المدير خلتهم ينسون الرقص كله وسبحان الله وشلون تغير هالنواف وصار شي ثاني رغم ان خالد لازال على جنونه ..
ما قال شي عن الموضوع لكن جيته صدقوني كان لها اثر في نفسي ذكرتني باشياء كثير واظن ان هذا مقصده من الزيارة ..
إظهار التوقيع
توقيع : جزائرية تركية
#5

افتراضي رد: قصة حقيقية مؤثرة جدااااا عن الصداقة

يسلموووو على مجهودك
إظهار التوقيع
توقيع : Nada Ndod
#6

افتراضي رد: قصة حقيقية مؤثرة جدااااا عن الصداقة

طويلة بزاااااااف بس روعة
#7

افتراضي رد: قصة حقيقية مؤثرة جدااااا عن الصداقة

رد: قصة حقيقية مؤثرة جدااااا عن الصداقة
إظهار التوقيع
توقيع : رحيق العفة
#8

افتراضي تنبيه اداري

تم نقل الموضوع من قسم فرفشة عدلات.
بواسطة : مونه الامورة
#9

افتراضي رد: قصة حقيقية مؤثرة جدااااا عن الصداقة

شكراااااااا للجهد المبذول


قد تكوني مهتمة بالمواضيع التالية ايضاً
الموضوع كاتب الموضوع المنتدى
أسئلة للبنات أسئلة للجريئات فقط♣ لمعة الالماس دردشة عدلات
كلام عن الصداقة angl lina حكم واقـوال
اشهر 20 قصة حب في التاريخ مختصرة البرنسيسة2000 قصص - حكايات - روايات
قصة رائعة عن الصداقة ابكت كل من قرأها عاشقة كتاب ربي قصص - حكايات - روايات
قصة حقيقية مؤثرة جداً تلامس المشاعر بريق الحب حكم واقـوال


الساعة الآن 02:19 AM

الاتصال بنا - عدلات - أعلي الصفحة

جميع المشاركات تمثل وجهة نظر كاتبها وليس بالضرورة وجهة نظر الموقع


التسجيل بواسطة حسابك بمواقع التواصل