السلام عليكم
كتير مننا بيعشق النضافة بس مش عارف ينظم وقته او يمشى على جدول معين بيه يكون على طول البيت منظم ومرتب
مثلا واحدة تمسك الشقة يوم او اتنين تنضف وترتب وتغسل سجاجيد وتفضل اسبوع تعبانة ولما يخلص اسبوع تعبها يرجع البيت اسواء مما كان او واحدة بنقابلها كتير تقول طلبات البيت مش بتخلص اعمل ايه ؟او واحدة بتشتغل ومفيش وقت لنفسها او لبيتها او لولادها .تعالى اقولك تعملى ايه
اولا .....لازم ورقة وقلم وفيهم تعملى جدول يومى وجدول اسبوعى وجدول شهرى وجدول لكل شهرين وجدول سنوى تخيلى فيه حجات بتتعمل كل سنة وحجات تتعمل كل يوم ...هديكى مثال المواعين تتعمل كل يوم وكل اسبوع الشبابيك تتنفض وكل شهر الدواليب تتنظم وكل شهرين الشقة تتنضف تنضيف عميق وكل سنة تغسلى كسوات الالحفة والبطاطين وما شابه دى امثلة بس .
الجداول اللى هكتبها بتختلف من واحدة للتانية يعنى مثلا واحدة عندها اطفال هتغسل سجاجيدها كل شهر او اتنين وفيه غيرها بيغسلها كل سنة وفيه سجاجيد نوعها بيتغسل كل اربع او خمس سنين ..........وفيه مثلا واحدة بتنضف تنضيف عميق كل شهرين وواحدة معندهاش تراب كتير ولا دوشة بيبيهات بتنضف تنضيف عميق كل ست شهور يعنى من الاخر حورى جدولك حسب احتياجات بيتك اهم حاجة تعملى حساب كل حاجة وتعملى وقت معين وليكن ساعة او ساعتين كل يوم تركزى فيهم على جزء معين من شقتك علشان لما تنضفى تنضيف عميق ميكونش تعب عليكى يلة بينا على الجداول
الجدول اليومى
كل يوم هتصحى اول حاجة تدخلى الحمام وتتوضى وتصلى عشان تبدئى يومك بطاعة بس طبعا الفجر فى ميعاده انتى هتصلى ركعتين الضحى وتكونى صاحية بدرى ومستعدة ليوم جديد كله نشاط وتفاؤل
شغلى الغسالة
افطرى فطار صحى وانتى مشغلة قرءان وفاتحة شبابيك شقتك
البسى طرحتك وامسحى البلكونة ولمى الغسيل الناشف ونشرى الغسيل اللى اتغسل
وانتى لسة بالطرحة والعباية نضفى ادام باب الشقة
هفكرك بلاش الهدوم الغريبة القديمة اللى بتلبسيها اول اليوم وتقولى لما اخلص ابقى اغير والبس كويس انتى اصلا مش هتبنى السد لازم يكون لبسك مقبول شكلا عشان لو حد خبط عليكى وعشان كمان متنسيش نفسك وتقضى اليوم كله بيه
لفى على سراير البيت نظميها
اجمعى كل حاجة متنتورة فى الشقة ورجعيها مكانها
طبقى الغسيل
اكنسى الشقة كلها
امسحى الغبار على السريع
ادخلى الحمام نظميه ورتبيه
المطبخ اخر حاجة اغسلى المواعين وابدئى اعملى الاكل
اخر حاجة و(اهم حاجةبعد ما خلصتى ترتيب الشقة وعملتى الغدا خدى ساعة واحدة دى اللى هتفرق معاكى عارفة هتعملى فيها ايه؟هتختلف الحاجة اللى هتعمليها حسب ايام الاسبوع يعنى لو السبت يبقى هتروقى الدواليب ولو الاحد هتسيقى السلم او تجيبي حد يسيقه ولو الاتنين يبقى مشوار السوق ولو التلات يبقى تغيري ملايات السراير وتطلعى حاجتك الشمس
ولو الاربع تنفضى شبابيك الشقة او تغسليها ولو الخميس يبى مسح الغبار عن الشقة كلها مسح عميق تجيبي فيه كل خبايا الشقة من تراب ولو الجمعة ؟؟؟لاء الجمعة اجازة رسمية ههههههه وافتكرى انى قلت الجدول بيختلف من واحدة للتانية
.
.الجدول الاسبوعى هو الجدول اللى دخلناه فى الجدول اليومى من غير ما نحس يعنى حاجة بنعملها مرة واحدة فى الاسبوع زى مشوار السوق او غسيل الشبابيك
.
.الجدول الشهرى
وفيه بتعملى حاجات محتاجة تعمليها كل شهر بس زى ايه؟
ممكن لو مشغولة باطفالك الصغيرين تخلى مشوار السوق مرة كل شهر بدل كل اسبوع والناقص زوجك يجيبه اثناء رجوعه من الشغل
كمان تفريز خضار ولحوم لشهر كله
كل شهر بتشوفى لو عندك عتب او مشايات عايزة تنفيض او غسيل
كى الملابس
تنضيف المطبخ تنضيف عميق لانهة من الاماكن اللى بتبقى محتاجة تنضيف دورى وخاصة السيراميك والبوتاجاز من الداخل والخارج
جدول لكل شهرين
وفيه بتنضفى الشقة كلها من خروج كل حاجة للشمس وغسيل حيطان وغسيل سجاد او تنظيفه حسب حالته ونوعه وعشان متتعبيش هتمسكى كل يوم اوضه واحدة تعمليها من غير ما تنسى اى حاجة فيها حتى النجف يتلمع مكانه وفوق الدواليب تتمسح وتتفرش باقمشة مستهلكة وتقريبا هاتخدى اسبوع كامل للتنضيف العميق كل يوم قطعة واحدة من المنزل مش هتاخد معاكى اكتر من ساعتين تلاتة لانك ملتزمة بالجدول اليومى والاسبوعى والشهرى اللى سهلوا عليكى عملية التنضيف العميق
الجدول السنوى
فيه بتغسلى بطاطين والحفة
بتغسلى كساوى المخدات ...هتجيبي المخدة تشيلى منها الابواز اللى على الحرفين وبعدين تفكى خياطة طرف واحد من كيس المخدة الداخلى وتدخلى نفس البوز اللى فكتيه فى كيس مخدة عادى وتشدى الكيس الداخلى عشان القطن بتاع المخدة يفضل زى ما هو بداخل الكيس الخارجى وتغسلى كل اكياس المخدات اللى عندك (الداخلية )بنفسس الطريقة ومش تنسكى تفكى العقد اللى المنجد عاملها فى نص وطرفين المخدة وبعد كده رجعيهم تانى بنفس الطريقة وخيطى الحرف واعملى ثلاث عقد فى القطن بالكيس عشان القطن ميتحركش ويكلكع وبرضه هتفتحى سوستة المرتبه وتشيلى الكسوة تغسليها وترجعيها تانى
هتطلعى كل الهدوم اللى عندك وتحددى اللى استغنيتى عنه
هتعيدى ترتيب الدواليب بطريقة مختلفة وتفرشى مفارش للدولاب جديدة
هتنظمى النيش بطريقة جديدة
هتدورى على جميع ما يجب اصلاحه زى كرسى عايز مسامير او نجفه عايزة تتفك وتتلمع او اشياء قديمة يجب التخلص منها
هتنزلى البراقع تنضفيها وترجعيها مكانها
اغسلى ستاير البلكونة
غيري حبال الغسيل
ويا ريت كل ده يكون قبل عيد من العيدين
.وكده اكون خلصت موضوعى ...لو افادك قيمى
بارت 4 من حملة مع بعض مشاكلنا محلولة
قد تكوني مهتمة بالمواضيع التالية ايضاً