نصائح مطبخية مهمة للمبتدئين
نصائح مطبخيةمهمةللمبتدئين
المشاكل الشائعة التى تقابل ربات البيوت والفتيات فى المطبخ عند الطبخ المشكلات وبعض الحلول لها
المشكلة الأولى
زيادة الملح في الطعام
ساعات وإنتِ بتطبخي والأكل لسه على البوتاجاز بعد ما تحطي الملح وتدوقي الأكل تلاقي إن الأكل طلع ملحه كتير شوية.. طبعا بتزعلي وبتبقي مش عارفة تعملي إيه بالرغم من إن الحل بسيط جدا وكل الحكاية إنك والأكل لسه على النار تجيبي بصلة وتقشريها وتقطعيها إلى قطع صغيرة جدا وتحطيها في الحلة اللي فيها الأكل ده وهي هتمتص أي ملح زيادة.
أو إنك تضيفي معلقة صغيرة من السكر وهي هتضيع لك أي ملوحة في الطعام.
المشكلة التانية
دموع البصل أكيد لو سألت أي بنت وقلتِ ليها إيه هي الحاجة اللي مش بتحبيها في المطبخ هتقول لك على طول البصل لأنه بيسبب دموع وحرقان في العين...
والحل هو إنك تحطي البصل قبل ما تنظفيه في حلة فيها مية لمدة نصف ساعة وبعد كده هاتيه ونظفيه وقطعيه وإن شاء الله مش هيبقى فيه دموع نهائي.. دي طريقة، وفيه طريقة تانية وهي إنك تحطي البصل بعد ما تقشريه في الفريزر لمدة نصف ساعة.
المشكلة الثالثة
الأكل لزق على النار
ممكن وإنتِ بتعملي الأكل تلاقي جرس الباب رن وتروحي تفتحي وترجعي تاني للمطبخ تلاقي إن الأكل لزق في الحلة.. طبعا مش معقول إنك ترمي الأكل..
علشان كده أحسن حل هو إنك تطفي البوتاجاز بسرعة وتجيبي حلة تانية وتحطي فيها الأكل ما عدا الجزء اللي لزق.
المشكلة الرابعة
تغير لون الفاكهة أو الخضار
دي حاجة كلنا عارفينها وهي إن فيه أنواع من الخضار لونها بيتغير بسرعة وبيسود بعد ما بتتقشر زي البطاطس والباذنجان، وحل الموضوع ده إنك تقشري البطاطس وتقطعيها وتحطيها في مية بملح ونفس الشيء مع الباذنجان الأسود.
المشكلة الخامسة
للتخلص من رائحة السمك في المطبخ
دي بقى مشكلة ناس كتير بتعاني منها لدرجة إن فيه ناس مش بتحب إنها تقلي أو تشوي سمك في البيت بسبب موضوع الريحة اللي بيسببها السمك....
وعلشان تتخلصي من الريحة دي
حطي شوية خل أو عصير ليمون في زيت القلي بين كل سمكه بتشيليهاوالتانيه أو ضيفي شوية من قشر الليمون الطازج للزيت وعلى فكرة الحركة دي بتدي للسمك طعم حلو قوي، وبكده يبقى إنتِ ضربتِ عصفورين بحجر واحد، خلصتِ من ريحة السمك وحصلتِ علي طعم حلو.
المشكلة السادسة
كسر البيض أثناء السلق
ساعات كتير وإنتِ بتسلقي البيض ممكن إن البيض يتعرض لحدوث شرخ أو كسور أثناء السلق...
علشان تتغلبي على المشكلة دي يبقى ياريت تحطي معلقة صغيرة خل في المية أو معلقة ملح.
كمان خدي بالك إنك لو لقيتِ إن البيضة اللي هتسلقيها مشروخة يبقى حطي عصير ليمونة في مية السلق أو غلفي البيضة المشروخة بورق الفويل.
المشكلة السابعة
الحفاظ على الخضروات الورقية من التلف
ممكن إنك تجيبي خس وبقدونس وعلى آخر اليوم تبصي عليه تلاقي لونه بدأ يصفر..
علشان تتخلصي من المشكلة دي يبقى ياريت بعد تجيبيهم وتغسليهم كويس وبعد كده تجففيهم وتحطيهم في فوطة وتحطيهم في كيس نايلون وبكده تضمني إن الحاجات دي هتقعد معاكِ لمدة عشرة أيام ده غير إنها هتكون نظيفة وجاهزة على الاستعمال
المشكلة الثامنة
شوي اللحوم والفراخ والسمك
فيه بنات كتير قوي بتعتبر شوي اللحوم أو الأسماك مهمة صعبة تكاد تكون مستحيلة بالرغم من إن الشوي ده مافيش أبسط منه. وكل الحكاية إنك تاخدي بالك من شوية الحاجات البسيطة دي:
1- شيلي الدهون الموجودة في الفراخ أو اللحمة قبل الشوي.
2- ماتستخدميش شوكة لتقليب اللحمة أو الفراخ المشوية علشان اللحوم ماتتجرحش منك ويبقى شكلها مش لطيف أثناء التقديم.
3- ماتقلبيش اللحمة أو الفراخ أثناء الشوي كل شوية يعني كفاية مرة واحدة لكل ناحية.
4- خدي بالك وإنتِ بتشوي السمك إن فيه أنواع من الأسماك زي البلطي مثلا لازم تحطي فيها ردة علشان ماتلزقش في الشواية وفيه أنواع تانية يفضل لفها بورق حراري علشان ماتلزقش.
المشكلة التاسعة
تحمير اللحمة والفراخ والسمك
زي ما الشوي مهمة صعبة برضه التحمير والقلي في الزيت مهمة صعبة علشان اللحوم أو الأسماك دي ممكن إنها تلزق أو الزيت ممكن إنه يتطاير عليكِ أثناء القلي. علشان كده لازم تاخدي بالك من شوية الحاجات دي اللي لو عملتيها يبقى إن شاء الله مش هتلاقي مشكلة. 1- اتأكدي الأول إن الصينية اللي هتقلي فيها مافيش فيها أي آثار للمية ولو حتى مية بسيطة ومن الأحسن إنك تحطيها الأول على النار لمدة 3 دقائق، وبعد كده تحطي الزيت وبكده تضمني إن الزيت مش هيتطاير عليكِ.
2- اتأكدي إن الزيت سخن كويس قبل ما تحطي أي حاجة فيه علشان لو حطيتِ قبل ما الزيت يسخن هتلاقي إن السمك أو الفراخ لزقت فيه.
المشكلة العاشرة
سلق اللحمة أو الفراخ
أنا عارفة إن سلق اللحمة أو الفراخ مافيش فيه مشكلة بس معلش فيه شوية حاجات بسيطة خدي بالك منها وهي:- 1- قبل ما تحطي اللحمة أو الفراخ في المية اتأكدي إن المية دي وصلت فعلا لمرحلة الغليان.
2- ماتحطيش الملح بعد ما تحطي اللحمة والفراخ على النار... استني شوية وقبل ما اللحمة أو الفراخ تستوي بربع ساعة حطي الملح والتوابل.
3- لو لقيتِ إن اللحمة أخذت وقت طويل جدا على النار من غير ما تستوي يبقى ضيفي إليها معلقة صغيرة من السكر وهي هتستوي على طول.
اخيرا -معلومه صغيره احب اقولهالكم- الموز ضعيه في قصدير(ورق المونيوم) حتى لا يسود .
إظهار التوقيع
توقيع : نورهان 2
التوقيع لا يظهر للزوار ..
رد: نصائح مطبخية مهمة للمبتدئين
إظهار التوقيع
توقيع : حياه الروح 5
التوقيع لا يظهر للزوار ..
قد تكوني مهتمة بالمواضيع التالية ايضاً
|
||||
| الموضوع | كاتب الموضوع | المنتدى | ||
| نصائح مطبخية من تصميمى2024 نصائح مطبخية مميزة 2025نصائح مطبخية جديدة لكل سيدة | ام سيف 22 | استشارات ونصائح مطبخية | ||
| نصائح مطبخية هامة من تصميمي . صور نصائح مطبخية خطيرة . نصائح مطبخية 2 | τнє τɪмє σf sυиsєτ | استشارات ونصائح مطبخية | ||
| نصائح مطبخية هامة من تصميمي . صور نصائح مطبخية خطيرة . نصائح مطبخية | τнє τɪмє σf sυиsєτ | استشارات ونصائح مطبخية | ||
| [من مطبخي] كروت نصائح مطبخية جديدة من تصميمى صور مطبخية الجزء السادس | ندى ام | استشارات ونصائح مطبخية | ||
| [من مطبخي] كروت مطبخية مختلفة نصائح مطبخ منوعة صور معلومات مطبخية الجزء الرابع | ندى ام | استشارات ونصائح مطبخية | ||
الساعة الآن 05:58 PM
جميع المشاركات تمثل وجهة نظر كاتبها وليس بالضرورة وجهة نظر الموقع