مشكلتى

اول حاجه يا قمر صلي علي النبي كدة و استغفري ربنا كتير

شعور القلق والخوف بيجي للانسان لما يكون مقصر مع ربنا شويه

هاقولك علي حاجه قومي دلوقتي اتوضي و صلي ركعين لله بنية الفرج و بعد لما تخلصي اقرأي صفحتين من القرآن وادعي باللى نفسك فيه

و هاتي خاتم التسبيح و اقعدي استغفري و سبحي عليه كتير هتلاقي لسانك اتعود علي طول علي ذكر ربنا و هاتحسى براحة صدقيني و عن تجربة

ثانيا بقي اقفلي موبايلك شويه و ابعدي عن مواقع التواصل و خلافه لان ليها اكيد جانب في النفسية

عندك رواية افتحي اقرأي فيها شويه حتي لو صفحة بس بس يبقي خرجتي من المود و اعملي حاجه جديدة

كلمي صحباتك ظبطي خروجة معاهم اخرجي غيري جو طول ماانتي قاعدة في البيت مع نفسك دماغك هاتقعد تفكر وتفضلي متوترة و قلقانة

اخرجي حتي اتمشي شويه حوالين البيت حتي مع اخوكي او مامتك منها تغيير جو ومنها حبه رياضة

شغلي اي قرآن جمبك و افضل شئ سورة البقرة و افضلي اسمعي فيها قبل ما تنامي هتنامي عليها وانتي مطمنة ان شاء الله

شوفي ايه اللي مضايقك و احولي تخرجي منه او علي الاقل تمنعي التفكير فيه و لو لمدة صغيرة

اكيد كلنا عندنا مشاكل بس لو فضلنا حاطين الموضوع في دماغنا و محاولناش نتعايش مع مشاكلنا هانتعب كتير

انتي لسه صغيرة و قدامك لسه ايام جايه كتييييرة حلوة ان شاء الله

ربنا يهدي بالك و يروق دمك و يبعد عنك شتات العقل و التفكير

يلا قومي اتوضي و صلي ركعتين زي ما قولتلك مستنية ايه ؟