جروب "انا مـــوزة مش تخينة وبـكـبـوزة"
انا بقالى كتير اوى بفكر اعمل دايت بس عشان المرة دى قررت اكون جد استنيت اجمع كل حاجة عشان امشى عليها خطوة خطوة
ان شاء الله قررت ابدأ من بكرة يوم السبت 17/11/2023 وهستمر فى الرجيم لحد يوم 31/12/2023 باذن الرحمن
يعنى من يوم 17/11 لـيوم 31/12 كدة 45 يوم
لو خدنا منهم 4 ايام فرى بعد كل 10 ايام هيتبقى 41 يوم لو خسينا كل 10 ايام 5 كيلو وطبعا دة مش ثابت عشان فى ناس معدل الحرق عندها عالى ودة بيختلف من جسم لجسم
يعنى 4 فترات كل فترة 5 كيلو 4*5=20 ها كويس ولا مش كوبس
كويس طبعا
طب لو 15 كيلو حلو ولا مش حلو ردوا عليا خسرنا 15 كيلو فى شهر ونص برضو جميل
طب لو وصل ل 10 كيلو حتى ها برافو ولا مش برافو
ماتبرقيش كدة وقوليلى برافو ولا مش برافو
فى ناس محتاجة ال 10 كيلو دول عشان توصل للمثالى
طب لو انتى مش محتاجة 10 ومحتاجة , أكتر ال 10 دول هيفرقوا معاكى وفى شكلك ولا لا
أكيد هيفرقوا يا حبايبى
طب اية انظمة الرجيم اللى هنمشى عليها؟
بصوا يابنات انا مش عاوزة رجيم يدمر صحتنا وبدل اما نخسر وزننا نخسر نفسنا وندخل بقى فى دوامة الحرمان والذى منة ونكسل نكمل ونضيع الدنيا
انا هكتب على نظام حلو اوى ان شاء الله نمشى عليه كلنا
بس فى الاول كدة اهم حاجة نتأكد من
1- ان عندك ارااااااادة وهتكملى ومش هتسيبينا فى السكة
2- انك باذن لله خاليه من الامراض اللى تمنعك من اتباع نظام معين
3- اعرفى وزنك كااااااام بالظبط
طيب والقواعد بتاعتنا
احنا عاوزين نسميها عادات أكتر منها قواعد
1- نمنع الاكل تماماااااا بعد الساعة 8
طب واللى هتخلبص كده ولا كدة منا عارفة ومجربة ههههههههههه
الكلام دة ليا قبلكوا
هيكون فى عقاب تانى يوم الله اعلم هيكون اية ممكن فى الاكل وممكن فى التمارين لسة هنشوف حسب كل واحدة ووزنها
2- شرب لتر ونص ماء يوميا
يعنى هنشرب 6 كوبايات ماية دة اقل حاجة يابنات طبعا المية لها دور فعال فى الرجيم والتخسيس
بكل بساطة عند التحدث عن التخسيس فأن الماء هو أهم عنصر غذائي في هذه العملية و عند تطبيق الحمية أو النظام الغذائي للتخسيس الذي سنذكره لاحقا أن شاء الله يجب شرب على الأقل 6 كوب من الماء يوميا و هذه نقطه مهمة جدا لهذا النظام و عليكم عدم اتباع الأفكار القديمة التي تقول أن الماء يخزن بالجسم. سوف يخزن الجسم الماء في حالة عدم شربة لأن الجسم سيحاول على حمايتك من الجفاف فأذا وجد الجسم بأنك تشرب كميات كافية من الماء فلن يخزنها لزيادة وزنك أنظروا هنا أخواني و أخواتي قدرة الله عز وجل. شرب الماء لا يجعل الجسم يتخلص من الماء الزائد بالجسم فقط بل يحفز الجسم ايضا على امتصاص الغذاء فبالتالي يحفز عملية تخسيس الوزن, لذلك عليكم شرب ال 6 كوب ماء يوميا دون استثناء.
3- الوزن مرة واحدة بس مرة واااااااااااحدة اهو تانى وياريت نتخلص من جنون الميزان اللى عندنا دة هههههههه
4- فى حالة الجوع الشديد بقا وخلاص مش قادرة وهتموتى وتاكلى لا غلط دة مش جوع
دة ممكن يكون نوع من الاتنين اما جوع وهمى ناتج من انك حاسة بالحرمان او انك مشتاقة لنوع معين من الاكل او عطش ايووووووووون مش تبرقولى كدة عطش الجسم مش بيعرف يحدد هو جعان او عطشان دى انا كنت قريتها فى مرة على موقع طبى فأول ما تحسى بكدة بالجوع الشديد دة فى حاجتين هنعملهم
1.هتشربى كوباية مياه
2. هتنامى على ظهرك وتسترخى وتاخدى نفسك وتكتمية 10ثوانى كدة وتخرجية بهدوء تعمليها 3 مرات ل 5 مرات وان شاء الله مش يبقى فى نفس الشعور انما لو فضل موجود يبقى تاخدى خيارة او خساية انما لو طول تعالى اديكى انا كلمتين يفكروكوا اد اية انتى بكبوظة ههه " مع تحيات حملة فكرهم وعكنن عليهم"
فيه حاجة مهمة بقااااا لازم نواجه بيها نفسنااااا :
ايه اللى بيخلينا كل مرة بنعمل فيها داااااايت بنضعف ونبوظ الدنيااااا ؟؟؟؟
غالبا لاننا بنعمل برنامج غذائى باكل معين ... طيب افرضى الاكل دة ماكنش متوافر لاى سبب اعمل ايه ؟؟؟؟؟
ابوظ الدنيا واقول مش مشكلة ابدا من بكره بقااااااااااا .... صح مش دة اللى بيحصل ؟؟؟؟
ويوم بعد يوم بننسى اننا كنا قررنا نعمل دايت اصلاااااا ... وبنضعف واكل ماما ولا الاكل بتاع جوزك بيفتح نفسك ومن غير ما تحسى بتسيبى اكلك وتقولى طيب ما اخد لقمة صغيرة مش هيحصل حااااااااجة ... وبردو هنا ثغرة بتوقعنا ويبوظ الدايت ؟؟؟؟
ولو جينا على نفسنا وماكلناش مرة على مرة بنتعب نفسيا وبندايق ...
انتو تعرفو ايه الحكمة اننا بنحس برغبة تجاه نوعيه معينة من الاكل ؟؟؟؟؟
ببساطة لان جسمنا بيكون محتاجهااااااا ... طيب ليه نحرمه ؟؟؟
عشان كدة عاوزين نااااااكل كل حاااااااااااجة
مفيش حرماااااااااااان
بس فيه تظبيط ... وفيه اساسيات لا غنى عنها فى نظامنا اليومى
اولا :احنا اتفقنا اننا هنحسب وزننا الاول ... وبعدين نبدا الدايت ...
ومش هنوزن تااااااانى غير بعد 7 ايام ان شااااااااااء الله ... محدش يوزن قبل كدة
ثانيا : لازم يكون عندنا فى البيت باستمرار
( بيض - لبن - شاى اخضر او نعناع او ينسون - زبادى )
( خيار - طماطم - جزر )
قبل اما هقول النظام بتاعنا هنعمل اية
1- هاتى ورقه تكتبوا فيها كل شىء حساه دلوقتى وانتى سخنه كده اى موقف محرج اتعرضتى ليه اى هدف نفسك تحققيه والوزن الزايد مانعك منه واكتبى هى الوجبه اللى هاكلها هيجرالى حاجه لو قاومت علشان هدفى لو كلتها هضيع كل شىء الورقه مهمه علشان لما تضعفى تجرى تطلعيها هترجعى تقاومى وترجع عزيمتك.
2-صوره ليكى كده وانتى حلوه كده ورفيعه او صوره لفرحك عوزاها قدامك علطول هههههههههه بقلب عليكى المواجع انا ههههه علشان تحاولى ترجعى زى ماكنتى
3-هى فكرة مجنونة بس حلوة هتكتبى اتعهد انا / ...... ان اخس .... كيلو من وزنى وابذل اقصى جهدى فى الرجيم خلال الفترة من 17/11/2023 الى 31/12/2023 لتحقيق افضل الرغبات وان لم احقق هدفى خلال هذة الفترة سأستمر على هذا المنوال حتى أحصل على لقب انا مـــوزة مش تخينة وبـكـبـوزة
4- قبل اما نبدأ الرجيم هتكتبى وزنك قد اية بالكيلو فى نفس الورقة اللى كتبنا فيها الموقف والتعهد وهتجيبى مازورة طبعا كلنا عارفينها وهنقيص الصدر والبطن والهانش والارداف والذراع طب لية هنعمل كدة؟
عشان الطريقة دى ادق من الميزان
5- فى نفس ذات الورقة اللى طلع عينها معانا ههههههههه هنكتب نظام الرجيم بتاعنا وتعلمى على ايام الاسبوع فى الجنب والله هتحسى بعزيمه لما الايام تقل
6-طقم بقى حلو كده مش على قدك خليه قريب منك على الشفونيره على الكومدينو اى مكان قريب منك وقولى ان شاء الله هخس وهلبسك انا جىىىىىىى فراكيكوووو
7- تقريرك اليومى يتكب صراحتا بدون ماتخبى شىء
وعاوزاكوا بقى تفتحوا لى دماغكوا كدة وواحدة واحدة هقول هنعمل اية
احنا أكلنا بينقسم الى نشويات وبروتينات وكربوهيدرات وخضروات
ولازم ناكل من كل دة
الفطار
اول اما نصحى هنشرب كوباية مية وبعدها بربع ساعة كوباية كمان وبعد ربع ساعة هناخد معلقة عسل نحل "ودة عشان الانيميا وشحوب الوجة وسقوط الشعر"
ونبدأ نفطر
ملحوظة
الفطار لازم يكون بعد اما تصحى علطول واقصى حاجة لو هتأخرية يكون بعد اما تصحى بساعة واخرررك الساعة 10 فى الفطار
يعنى لو صحيتى بعد كدة ماتفطريش بس دة هيأثر على الميزان انا حظرت اهو
هناخد ربع رغيف + بيضة مسلوقة او 3 ملاعق فول بدون زيت او قطعة جبنة قريش
او 2 فاكهه
بعد الفطار ب 3 ساعات
فى خلال ال 3 ساعات دول هنشرب كل ساعة او كل نص ساعة كوباية مية واللى يقدر يزود يبقى تمام اوى زى اما اتفقنا زيادة المية مفيد جدا
وبعد اما نخلص من وصلة المية دى هههههههه هناكل
سمعاكى ياللى بتقولى هيييييه
ماتفرحيش اوى كدة ههههههههههههه
احنا هناخد واحدة ثمرة او واحدة خضروات
طب اية فايدتها دى؟
عشان الاكل بيسرع معدل الحرق
طب ازااااااااااااى
الحرق في جسمك بيحتاج لطاقة عشان يبتدي ومافيش حاجة هتمده بالطاقة غير الاكل والحرق ده ليه وقت صلاحية وبعدين بيقف وده معناه اننا لازم نلحق ناكل حاجة ولو بسيطة قبل وقت الصلاحية ماينتهي عشان الحرق يفضل شغال في جسمنا اليوم كله
طب ياترى الوقت ده قد ايه
تلات ساعات يا جماعة!!
تلات ساعات وبعدها الحرق هيبتدي يقف ولازم نلحق نديله طاقة بسرعه
بعد 3 ساعات هنتغدى
النشويات
- ربع رغيف عيش بلدى
- 4 ملاعق رز
- 4 ملاعق مكرونة
البروتينات
- 2 بيضة مسلوقة
- قطعة لحمة
- ربع فرخة
- تونة مصفاة من الزيت
- سمكة متوسطة
الخضار
- خضار مسلوق
- شوربة خضار
- طبق سلطة
بعد الغدا ب 3 ساعات وبرضو شغالين بالمية كل ساعة او نص ساعة على قد مانقدر
هناكل ثمرة فاكهه او خضروات وعرفنا السبب
العشاء
- علبه زبادى
- كوب لبن خالى الدسم
- قطعة جبنة قريش
- بيضة مسلوقة
- 2 ثمرة فاكهه
اللى عاوزة تاكل اى اكل تانى مفيش مشاكل وممكن نستعين بوصفات الدايت
هنعمل اية تانى اية تانى اية تانى
احنا لو خسينا وقعدنا كدة هنلاقى بقى شكلنا وحش وفى ترهلات مخلي شكلنا اوحش من اما كنا تخان
فلازم لازم لازم تمرينات
ودى التمرينات اللى هنلتزم بيها ان شاء الله
فى تمارين المشى فى البيت هنلاقيها على اليوتيوب للى عاوزاها او ممكن المشى العادى ودة اختيارى
التمارين بتاعتنا بقى ودة اجبارى
واللى يحب يزود مفيش مشاكل وكلة فى صالحة وهنبدأ ب 10 مرات لكل تمرين وكل اسبوع هنزود 5 مرات عشان منتعبش ناخدها واحدة واحدة
ممنوع نهااائي السكريات والحلويات
وممنووووووووووع اضافة سكر للمشروبااااااااااات
وممنوووع الدلع
ومفيش واحدة تيجي تتفلسف وتقولي الجسم محتاج لسكريات
اه هو محتاج لسكريات بس السكريات الطبيعية مش الجاتوهات والبسبوسة والعصاير والسكر الابيض اللي يودي في داهية ازاي بقي
اولا- النشويات بتتحول لسكريات جوه الجسم بيمتص منها السكر اللي محتاجه يعني العيش والرز اللي بتضربوة يا حلوين كله بيتحول لسكريات
وكمان طبق السلطة كله سكر طبيعي في الخضروات الخضروات اللي في سكر طبيعي زي
جرجير
خس
جزر
خيار
طماطم
وكمان البطاطس ماهي نشويات مش حلويات بالاسم لكن في جسمك بتبقي سكر والمكرونة نفس القصة الاسم مانعة نفسك من الحلويات والسكريات لكن جسمك بياخد كل السكر الطبيعي اللي ربنا خلقه من اكلك العادي مش معني كده واحدة تتفجع في المكرونة و المحشي و البطاطس والفتة و تقول بعوض لاء ماحنا قولنا طبق السلطة كل محتوياته بتحتوي علي سكر طبيعية
وده يخلينا نستنتج ان طبق السلطة اساسي في النظام الجديد قبل كل وجبة وانتي قاعدة كده بعد كوبيتين المية طبق حلو سلطة كده وهتلاقي بطنك اتملت والله والاسم مش حارمة نفسك لكن بتضحكي علي معدتك وبتاكلي اكل صحية
ممنوووووووووع المخللات بانواعها
ليه يا حجة انتي حد مسلطك علينا لاء ياستي بس المخللات والاملاح الكتير في الاكل بتتحول لمية في الجسم وجسمك يبقي معبي مية وانتي فاكراه تخن اتاريه من اكل المخللات والملح الكتير
كمان المخللات بتفتح النفس اكتر علي الاكل وده احنا مش عايزينه
يعني لو غارفة 4 معالق رز ومقدرتيش تاكلي منهم غير 3 معالق حتة مخلل هاتخليكي تاكلي المعلقه الفاضله وده احنا مش عايزينه خاااااالص
التلخيص بقى عشان الناس اللى تاهت منى
1- كوبايتين مية قبل كل وجبة يعنى كوباية وبعد ربع ساعة كوباية تانية وبعد ربع ساعة ناكل
ولازم كوبايتين الفطار يكونوا على الريق يعنى تكون دى اول حاجة دخلت معدتنا
2- الوجبات بتاعتنا
فطار
ومايعديش الساعة 10
بعد 3 ساعات
وجبه خفيفة
بعد 3 ساعات
غدا
بعد 3 ساعات
وجبة خفيفة
بعد 3 ساعات
عشا
3- فى ال 3 ساعات اللى بين الوجبات نقسمها كل ساعة او كل نص ساعة ناخد كوباية مية
4- الممنوعات
ممنوع الاكل بعد الساعة 8 خالص حتى لو فاكهه او خضار لكن مسموح بالمشروبات بس من غير سكر
ممنوع السكر والملح والمخللات
5- لازم نعمل التمرينات اللى قولناها يوميا على الاقل نص ساعة
واللى يزود يبقى فى صالحة طبعا
6- الميزان كل 7 ايام فقط
7- محتاجين ورقة نكتب فيها
الموقف والتعهد والرجيم والوزن بالكيلو "الميزان" و بالسم "المازورة"
وكل اما تحسى انك هتضيعى الدنيا بصى فى الورقة دى واقرايها هتتشجعى من تانى
اللى حابب يشترك معايا طبعا هينورنى بس بشرط الجدية
فـ الى شايفة نفسها قوية بما فية الكفاية انها تخس وتساعد وتكون عضو ايجابى يبقى اهلا اهلا اهلا بيها انشالله اكون انا وهى بس
انما التانية اياها بتاعة هييييييييييه
جروب انا وزنى ... وطولى .. وهوب تتبخر وتختفى فى ظروف غامضة ومحدش بيعلن مسئوليتة عن اختفائها دى بلاش الله يخليكوا
انا مش عاوزة خيبة امل تانى وفشل تانى اصل الموضوع نفسى اوى بالنسبالى ومحتاجة حد جدى يكون معايا
وياريت القى تفاعل ووقتها هنرغى ونقول كلام كتييييييييييييير
الى حابة تبقى معايا ياريت تحط الموضوع فى المفضلة عشان ميضعش لان كل يوم لازم نكتب يومنا مشى ازاى من اكل ومية وتمارين وهطلب منها حبة حاجات
1.طولها ووزنها
2. معاد اخر مرة عملت فيها رجيم كانت امتى
3.لو عندها اى مرض عضوى لقدر الله
4. سبب عاوزة تخس عشانه
5. سيستم الاكل بتاع حياتها بعيد عن الدايت اية
6. حالتها اية يعنى متجوزة انسة عروسة وقربت تتجوز كدة يعنى
وربنا يوفق الجميع تقبلوا مرورى عليكم
رد: جروب "انا مـــوزة مش تخينة وبـكـبـوزة"
رد: جروب "انا مـــوزة مش تخينة وبـكـبـوزة"
رد: جروب "انا مـــوزة مش تخينة وبـكـبـوزة"
رد: جروب "انا مـــوزة مش تخينة وبـكـبـوزة"
إظهار التوقيع
توقيع : Tota Just Banota
التوقيع لا يظهر للزوار ..
قد تكوني مهتمة بالمواضيع التالية ايضاً
|
||||
| الموضوع | كاتب الموضوع | المنتدى | ||
| ابتكر منزلك مع وايت هاوس جروب | نانا محمد مطر | سوق عدلات النسائي العام | ||
الساعة الآن 10:28 AM
جميع المشاركات تمثل وجهة نظر كاتبها وليس بالضرورة وجهة نظر الموقع