عوزة اتجوز

دي سلسلة حكايات ساخرة منقولة عن العرسان والعروسة مخبوطة يا رب تعجبكم
الحلقة الأولى

جائني يا قراء يا كرام .. نوادر وحكايات وكلام
عن بنت ثلاثينية .. غارقة في الظلام
وعرسان مقشفين .. غرقانين في الاوهام
وعن امهات العرسان المفترية..اللي بتاكل اللحمة نية
وبتشرب عصير زلط في الصبحية
تعبوا البنية وشلفطوها ..وبجهلهم خبطوها
احكي يا بت يا مخبوطة عن النكسة
والعرسان اللي جابتلك الوكسة

اول عريس.........
جائني يا قراء ياكرام ... أنه وفي احدى الأيام
كانت البت مخبوطة .. لسة صغننة ومبسوطة
لحد ما جه اليوم التعيس .. اللي اتقدملها فيه عريس ..
بيقولوا دكتور ومتعلم .. وابن ناس ومتهندم
فندهلها ابوها وسألها ..
وخدلها موعد عشان العريس يقابلها
بابا- شوفي يا بنتي ..
مخبوطة- ايوة يا بابا
بابا- الشاب كويس .. دكتور وبيحضر ماجستير .. وحالته المادية ماشاء الله واخلاق عالية ومهذب اوي لا عمره كلم بنت ولا عمره مشي مع بنت ... وسنه مناسب لسنك عنده 26 يعني اكبر منك بـ3 سنين ... قلتي ايه ؟
مخبوطة- ؟؟؟؟؟؟
بابا- اقوله ييجي بكرة ؟؟
مخبوطة- اللي تشوفه يا بابا
هيييييييه هتجوز

ماما : انتي هتخرجي للعريس كده ؟
مخبوطة- ماله كده يا ماما ...
ماما- حطي حاجة على وشك ... شوية كحل شوية روج !
مخبوطة- حطيت يا ماما بس مش كتير .. يقول عليه ايه ما صدقت !
ماما- طب يلا ادخلي ..
مخبوطة طبعا مكسوفة
مش قادرة .. وقفت على باب الصالون ... مش قادرة بجد .. موقف وحش اوي
اختي : ادخلي بقى .....
ايد زقتني من ورا ... لقيت نفسي في الصالون .. تحت الأمر الواقع
فاضطريت اكمل : أأ ... السلام عليكم ...
العريس وقف : وعليكم السلام ورحمة الله ... بسم الله ماشاء الله
مخبوطةبتكلم نفسهاوعمالة تقرب .. هو ده ! .. هو في حد وحش كده !!
طب هو كده واقف كله ؟ كامل يعني ؟ ... قصير اوي ..!
يلا معلش مش مشكلة الطول
طب هو اقرع ولا انا بيتهيألي ؟
قربت اكتر ....
آه اقرع يا مخبوطة ... اقرع وبالثلث ..
يلا معلش مش مهم القرعة
بتحصل كتير
انما ايه اللي هو لابسه ده ؟ ..
كرافتة كاروهات ! .. قميص كاروهات ! .. بدلة مقلمة !
ايه تضارب الالوان ده ! .. كنت هصرخ في وسط الصالون بصوت مجلجل واقول :
جتنا نيلة في حظنا الهباب
لا يا مخبوطة ..اعقلي .. الراجل مش بشكله ولا لبسه ..
الراجل بأخلاقه .. يلا معلش ... بكره هعلمةازاي يلبس .. المهم يكون طيب .. ولا ايه ؟
ايوة صحيح .. المهم يكون طيب .. هحاول ابلع منظره
قعدت على الكرسي بعد ما خيبة الأمل تغلغلت جوايا ...
العريس : ازيك يا انسة مخبوطة ؟
انا بصوت مبحوح من كتر الاحراج : الحمدلله
العريس : ايه مالك زعلانة ليه ؟
مخبوطةفى نفسها( هو باين عليا اوي كده ! .. انما هكون زعلانة من ايه ! .. من وسامتك المفرطة )
بابا : اصلها كانت تعبانة النهاردة شوية ... ها ها ها
مخبوطة( انا كنت تعبانة ؟ امتى ده )
بعد السلام والتحية وشوية المجاملات ...
العريس : قوليلي يا آنسة مخبوطة .. حضرتك ليه اخترتي كلية الاقتصاد والعلوم السياسية ؟
مخبوطة- انا كنت اتمنى ادخل صيدلة بس مجموعي في الثانوية العامة كان ....
بابا قاطعني : احم .. هي اختارت الكلية دي عشان كانت شايفة انها مناسبة لشخصيتها اكتر ...
العريس : برضو مافهمتش انتي اخترتيها ليه يعني ؟
مخبوطة : .... عشان .. شفت انها ملائمة ليا
العريس بيتساءل بحيرة : .......... يعني اخترتيها ليه ؟
مخبوطةفى نفسها(.. سلامة الفهم ! )
بابا : ... آآآآ .... على فكرة يا دكتور .. مخبوطة بترسم ...
العريس : اووووه بجد ! طب يا ريت نشوف شوية من رسوماتك يا آنسة مخبوطة ...
مخبوطة : طب عن اذنكوا .. ثواني ..
مشيت وعيون العريس عمالة تخبط فيا زي الرصاص
جبت الرسومات بتاعتي واديتهم للعريس .. راح مسكهم من غير ما يبص فيهم وحطهم جمبه على التربيزة ...
مخبوطةفى نفسها(ايه قلة الذوق دي ..
مش عايز تشوفهم اومال قومتني اجيبهم ليه طيب ! .. آآآآآآآآه ... ده كان عايز يتفرج على جمال خطوتي بقى !!
هاهاها .. انت عريس خلبوص صحيح
العريس : صحيح كنتي بتدرسي ازاي وسط القصف واللي بيحصل ده ..
انا : والله حاولت اتأقلم عشان ..
قام مقاطعني ومدور وشه لبابا : شارون ده بجد ياعمي لا يمكن يكون معاه مفاوضات ...
مخبوطةفى نفسها(( ايه يا ابني انت مش قاعدة بكلمك ! )
العريس : عايز اسألك سؤال يا آنسة مخبوطة بس محرج شوية ..
بابا : اتفضل يا ابني خد راحتك ...
العريس : هو انتي لما كنتي في الجامعة .. كنتي بتخرجي القصة بتاعتك برا الايشارب زي ما البنات بيعملوا ؟
مخبوطة- هاه ؟ لا ...
العريس : طب كنتي بتقعدي مع شبان ؟
( ده انت زودتها اوي )
بابا : يا ابني احنا بناتنا مش بتوع الكلام ده ! انت هتزعلني منك ولا ايه ؟
العريس : انا آسف يا عمي والله مش قصدي اللي فهمته ارجوك ما تكونش زعلت مني ...
بابا : هففففففف ... خلاص حصل خير
العريس : معلش هتعبك معايا ممكن بس مناديل كلينكس اذا تكرمتي ..
مخبوطةفى نفسها(( انت كل شوية هتقومني .. ما تحترم نفسك ياد انت ! )
اوكي .. ثواني
و لسوء الحظ ( او يمكن لحسن الحظ ) كان عندنا قبلها بيوم عزومة وكل الكلينكس اللي عندنا خلص بدور مالقيتش .. لقيت في اوضتي علبة كلينكس حجم كبير .. بس مافيهاش الا 3 ورقات في آخرها ... اعمل ايه ! ..

اختي قالتلي خديهم في ايدك واديهم له ..عيب تاخدي العلبة الكبيرة دي وهي فاضية كده ... رحت طويتهم في ايدي كده زي الشطار ورحت للعريس مديتله ايدي :
مخبوطة- اتفضل ..
بصلي من فوق لتحت وقال : لا متشكر .. معايا
مخبوطةفى نفسها(( لا لا لا .. انت الظاهر كده عندك انفصام في الشخصية ! ... )
استغربت من تصرفه ده .. وحطيت الكلينكس على التربيزة بعصبية وقعدت .. نقول ايه .. لو بينفع نشتري الذوق كنا اشتريناه
العريس بمنتهى الحداقة : ما سألتينيش يعني يا آنسة مخبوطة ... خليتك تيجيبي الكلينكس ليه مع ان معايا كلينكس
مخبوطةفى نفسها(( يا واد يافتك !!! )
اصل انا عندي ذوق وما بحبش احرج حد
بابا : ايه يا ابني مالك كده في ايه ؟؟؟
العريس : مش قصدي حاجة يا عمي بس كان قصدي اوجهها واقولها غلط الطريقة اللي قدمتلي فيها الكلينكس دي !
مخبوطةفى نفسها(( ده انت نهارك مش فايت النهاردة !! )
بابا : خشي انتي جوة يا مخبوطة
ماكدبتش خبر وجريت على اوضتي .. ايه الخيبة القوية ديو انا اللي فرحت ان جالي عريس

اختي : هاه ايه الاخبار ..

انا : لا مستحيل اتجوزه ... انا عمري ما شفت حد قليل ذوق بالشكل ده ! ... ده مريض نفسي !
- يعني خلاص ! .... جت الحزينة تفرح !
- لقت واحد عفش في المطرح

بعد شوية جه بابا : الراجل روح .. ايه رأيك فيه ؟ هو غبي بس يعني لو ...
مخبوطة : لا يا بابا انا مش موافقة ...لا يمكن
بابا : طب اصبري انا كلمته وفهمته ان ده غلط واعتذر لأنه كان مرتبك وقعد ساعة يتأسف ...
انا : لا لا .... دي حركات مقصودة ...
بابا : عموما .. هو قال هيتصل بعدين .. وانتي حرة
انا : لا مستحيــــــل !!
في المساء : ترررن تررررن
- آلو .. أهلا يا ابني مساء النور ... اه الحمدلله ... آه .. ممممم
انت شاب محترم يا ابني وكل حاجة بس .. البنت مش موافقة .... مصممة ايوة ..... ايوة ممكن تكلمها .... يا مخبوطة ... مخبووووطة .... تعالي الدكتور عايز يتكلم معاكي ...
اداني بابا السماعة وهو بيشاورلي اخلص بسرعة
- آلو .. مساء النور
- ايه يا آنسة مخبوطة زعلانة ليه
- مش زعلانة .. بس كل شيئ قسمة ونصيب
- وليه قررتي بالسرعة دي ان مفيش نصيب ؟
مخبوطةفى نفسها(( يادي الاحراج ! بتدققوا في السؤال ليه ؟ لازم نقولها في وشكوا يعني .. اننا ما بنتجوزش مجانين ! )
- اصل بصراحة حسيت ان مفيش بينا تقارب او تفاهم و ...
العريس- ليه مفيش بينا تقارب .. هو انا بصلي الصبح ركعتين وانتي بتصليه خمس ركعات !
- ايه دخل الصلاة في الموضوع ! كل المسلمين بيصلوا زي بعض !
- يبقى مفيش اختلاف في الأمور الجوهرية .. انا مسلم وانتي مسلمة
مخبوطة- يا سلام ! ... شوف يا دكتور بصراحة انا آسفة اوي و
العريس مقطع مخبوطة وقال- شوفي يا آنسة مخبوطة .. انا لما كنت بدرس كنت بحفظ العملية الجراحية من اول مرة يعملها الجراح قدامي .. وكنت بحب اوضة العمليات اوي .. لدرجة اني كنت ببات فيها .. ومرة واحدة ست كانت بتولد قيصري و ...
مخبوطة- حضرتك بتقولي الكلام ده ليه دلوقت دخله ليه في موضوعنا ؟
العريس- اصل انتي شايفة ان مفيش بينا تقارب في الشخصية عشان انا دارس طب وانتي اقتصاد بس احب اقولك بالعكس ده شيئ تكميلي مش محل خلاف و ...
قاطعتة مخبوطة- حضرتك ايه دخل الدراسة انا مش قصدي كده !
العريس- اومال ايه ؟
مخبوطةفى نفسها(( اقوله ايه ده !!! )
- انا فكرت كويس وخدت قراري وكل شيئ قسمة ونصيب
العريس- ازاي يعني قررتي .. اذا كنت انا موافق وابوكي وامك موافقين يعني احنا كده تلاتة موافقين يعني الاغلبية
مخبوطةفى نفسها(( اغلبية ايه ياد هي انتخابات ؟ )
- انا اللي هتجوز مش بابا ولا ماما ...
مخبوطةفى نفسها(- وانا !؟؟؟
مخبوطة- انت انسان كويس بس الجواز قسمة و نصيب .. ممكن بعد اذنك عشان عايزة انام ؟
- آنسة مخبوطة ممكن اسألك بصراحة ...
مخبوطةفى نفسها(( اللهم طولك يا روح )
- اتفضل اسأل ..
العريس- انتي بتحبي حد تاني مش كده ؟
مخبوطة- تصبح على خير ...
و قفلت مخبوطة سماعة التليفون
في وش هذا العريس المجنون ...
للأسف ما بقتش تنفع الشهادة ... اللي مش محسنة لصاحبها عادة
هو فاكر نفسه جاي يخطب بنت ناس
ولا يشتري سجادة !
وحطت مخبوطة ايدها على خدها .. بتفكر في الاشكال اللي بتتقدملها
داعية ربها يريحها من هذه النوعية
اللي كانت السبب .. في خيبتنا العربية القوية
واستنوا مخبوطة مع خيبة جديده
اولا يا قمر (الروايه جميله جدا )
ثانيا يا عسل (هو فعلا قليل الذوق لان مينفعش انه يقومها ويوقفها ويعمل الحركات دي)
ثالثا يا سكر (هي غلطت لما قفلت السكه في وشه كان لازم تسمع كلامه للاخر)
رابعا يا عدوله (عيزه اطلب منك طلب تبعتيلي كل لما تنزلي بارت جديد علي الخاص )
والكلام ده مش معنا ان الروايه مش عجبتني لا دي جميله جدا وعجبتني جدا بس انا بكلم علي الي في خيالي هو ده بس بجد الي كنت اقصده شكرا يا قمر علي تعبك