بحبك
حبيبتى يالى بحبها من جوه جوه القلب
اللى فى عنيه مش نينى اللى فى عنيه حب
بصى كده واتأكدى ده مش كلام وبس
بحبك بكل المعانى وبكل نبض وحس
ياحلوة يالى القمر ميل على نيلك
بيلالى ضيه فى ميتك 00يكسر ظلام ليلك
صوت السواقى مجلجل كانه خلاخيلك
احلامنا الصغيرة ساكنه فى حضن نخيلك
انا اتولدت على ارضك وعليها ياما حبيت
يعنى بمعنى اصح بترابك اتحنيت
فيا شبه منك 00سمرة على لونك
وهبنى ربى شعر 00سواده من ليلك
وضفايرى ع الجنبين كانهم فرعين زى فروع نيلك
وقلبى ابيض وصافى لون ضى قنديلك
وشفايفى زى العسل حافظه مواويلك
من كتر ما ترددوا نقط على طينيك
طينك اللى بيطرح شجر ونخيل وثمار
ورمالك اللى قوت شباب صبحوا رجال
يقفوا فى وش العدا والخونه والاندال
صقور من فوق جبالك صاينه التراب والمال
صاينه العهود والشرف وكل شئ يتصان
وولادك الفلاحين مع كل طلعة شمس يخدوكى بالاحضان
بيغزلوا فستانك الاخضر باديهم السمرا بعزيمه واطمئنان
وشبابك اللى تعمر وتبنى وتكبر لجل ما يعلى الشان
بينحتوا فى الصخر ويصنعوا حضاره نورها فى كل مكان
نوصف بقى بستانك اللى على فستانك
عليه ورود وزهور وفى كل زهرة نور
دى زهرة فيها تفسير لايات من القران وقصص وحكاوى
كلام نحب نسمعه على لسان شيخنا الشيخ الشعراوى
شايفة كمان محفوظ اللى صحيح محظوظ لانه على توبك
وفيه على توبك نجمه جميله بديل شقت ضلام الليل بعالم اسمه زويل
وياما غيرهم كتير من علما وفنانين فرسان على راسهم واقف صلاح الدين
وفيه جواهرغاليين واقفين مترصعين على توبك الاخضر
اعلام وبترفرف موجوده على توبك لحد يوم الدين
ربى يخليكى يا حضارة ليها سنين ويخلى فرسانك من كل مله ودين
لو هوصفك مش هقدر000ميكفنيش دواوين
ميكفنيش عمرى لو حتى فوقه سنين
انتى الحبيبه الغاليه نور الفؤاد والعين
اللى ما دقش ميتك بقول عليه مسكين
واللى يفكر يجرحك هنقفلو بالسكين
ونتمنى من ربنا يفضل كئيب وحزين
اللى راحوا كتير واللى جايين ملايين
وانتى اللى صامده وحاضنه لولادك العاشقين
يحرسك رب العباد م الخونه والخاينيين
ويخلى نيلك فى حضنك عريس طيب وزين
يعشق فيكى سمارك ونور فوق الجبين
وتعشقى فيه ميته والخضرة ع الجنبين
واخيرا اسمحولى فى حب مصر اقول
لو خيرونى ما بينك انتى وبين روحى
هقول لهم دى حبيبتى ريقها دوا جروحى
بحبك يا ست الكل وافديكى انا بروحى
ومعاكى فى حلوك ومرك ومكان ما هتروحى
***- ***- ***- *انا اسفه انى طولت لكن وعهد الله انا نفسى اقول اكتر
اصل الكلام عنها له طعم ومذاق تانى احلى من السكر
منصورة دايما يا بلدى وعلمك فى السما شامخ وبيرفرف
بحبك
رد: بحبك
قد تكوني مهتمة بالمواضيع التالية ايضاً