تجربتي بالتفصيل مع دكتور/*ومركز دار المرأة لتأخر الإنجاب

ذهبت أمس للدكتور .... وحدث ما حدث وأقسم زوجي على نشر تفاصيل ما حدث وإليكم سرد للتفاصيل كما يرويها زوجي


سمعت كثيرا عن د/ وأنه يظهر كثيرا في التلفزيون وبحثت عنه
فوجدت الناس بتقول عليه شاطر ولذا سأسرد القصة كاملة ومفصلة

في البداية أود إخباركم بأن زوجتى حامل في الشهر السادس حمل طبيعي وكنا نتابع مع أحد أساتذة الجامعة الكبار منذ بداية الحمل
وعندما قمنا بعمل السونار الفوردي الحمد لله طمئننا على الجنين ولكنه قال أنه صغير بالنسبة للمطلوب ونصحنا بالتغذية الجيدة ومعاودة عمل السونار فوردي بعد أسبوعين
ومنذ فترة ونحن نسمع عن د/ ونشاهد برامجه وإعلاناته كما أن نسيبي كثيرا ما نصحني به لأن زوجته كانت تتابع معه منذ 3 سنوات وركز مع على تلك الجملة " منذ 3 سنوات"
وكان ممتاز معه وعنايته فائقة
مشكلته فقط إنه بيطلب تحاليل كتير جدا وده علشان يكون مطمئن على كل حاجة

وبعد تفكير قولنا مفيش مشكلة زي ما يطلب وزي ما يتكلف المهم طفلنا يكون بخير إن شاء الله وعقدنا العزم أنا وزوجتي
على الذهاب إلى الدكتور وهنا تبدأ القصة الفعلية

بحثت عن رقم المركز بالإنترنت وإتصلت بهم يوم الأحد
ردوا عليا وقلتلهم عايز أحجز مع دكتور عمرو الحسيني طلبوا مني إسم زوجتى والسن ورقم التليفون وحجزت على يوم الأربعاء الساعة واحدة
لغاية هنا تمام

وفضلنا متنظرين ليوم الأربعاء بفارغ الصبر ومنتظرين أن نذهب للمركز الفخم ذو العناية الفائقة والنظافة التي لا مثيل لها كما يذكر في إعلاناتهم وأكثر من ذلك منتظرين الطبيب البروفيسور الذي يعطيك وقتك في الحديث والكشف ويقدم لك أفضل ما يمكنه

وأتى يوم الأربعاء ووصلنا إلى المركز الساعة 12 ظهرا

في البداية صعدنا بالأسانسير وهو الأسانسير الأيمن
فكان أسانسير متهالك كثير الرجات والترنحات فقلنا عادي دي عماير قديمة وكده
لكني شعرت بأن تلك بداية غير مبشرة
طلعنا الدور الثامن وهما واخدين دور كامل مفيش نظام في أي حاجة كل ما ندخل شقة يقولولنا العيادة من هنا لأ من هنا لغاية ما وصلنا

طيب دخلنا العيادة

وصف العيادة : ريسيبشن عادي بل أقل من العادي مثل أي عيادة ممتلئة بالزبائن شاشتين تليفزيون أمام أنتريهين
وفي غرفة مكتوب عليها مخزن مليان ممرضات طالعين داخلين واحدة خدت كوبايتين من فوق الكولدير ودخلت مليتهم كلور وطلعت بيهم عادي وناس بتزعق جوا عادي وعمال داخلين وطالعين عادي
إنما اللي مش عادي وجود كانتين في الريسيبشن وبييجوا وسطنا يعملوا شاي ونسكافيه
وواحدة من الزبائن طلبت من الممرضة تعملها نسكافية لإنها طبعا تعبت من الإنتظار فالممرضة قالتلها "بس ده مش من ضمن العيادة يعني بفلوس لوحده" قالت لها أوكيه منا عارفة

قلة أدب مش كده؟

أنا حسيت إننا قاعدين في مستوصف حكومي قولت يا سيدي ما تبقاش حمبكي أوي كده بلدك كلها كده المهم ما علينا

وقفت أمام السكرتارية علشان أحجز وكده إليكم الحديث

أنا : لو سمحتى فيه حجز بإسم .......النهاردة الساعة واحدة
السكرتيرة: بعدما كتبت إسمها في الكشف وكإني ما أتصلتش ولا حجزت أصلا قبل كده
سألت : أول مرة؟
أنا: أيوه
السكرتيرة : السن والتليفون و200 جنيه
أنا : طلعت ال200 جنيه بسرعة لإن في واحد جنبها مد إيده بسرعة علشان ياخد ال200 جنيه ويرميها في الدرج
أنا : طيب أنا رقم كام لو سمحتي
السكرتيرة: رقم 11
أنا : طيب إزاي أنا حاجز بالتليفون وجاي قبل معادي بساعة كاملة
السكرتيرة : لا الحجز من عندي بالفلوس بس

المهم قعدنا في وسط المرستان والريسبشن اللي كله دوشة وناس رايحة وصنايعية جايه وحاجة تقرف


طيب أثناء الإنتظار الطويل اللي إمتد لغاية الساعة 5 نعم لغاية 5 وأنا رايح هناك الساعة 12
المهم أثناء ذلك قرأت بعض الأوراق الإرشادية معلقينها في العيادة مكتوب فيها ما يلي

قيمة الحقن المجهري لا تسترد إن لم تنجح العملية
كافة النفقات تدفع قبل البداية ولا تؤخر ولا تسترد
لا حاجة لبيع الذهب أو عفش المنزل لأن في حالة فشل الحقن المبلغ المدفوع لا يسترد
وأحقر جملة معلقة على الباب بتقول " نظرا لرغبة العملاء يوجد الآن كشف مستعجل ب 300 جنيه"

كل الورق ده عادي ممكن الواحد يشوفوا في أي مكان لكن كلمة لا تسترد المعلقة بكل مكان والإعلان عن الكشف المستعجل فهمت منها إن الناس دي كلاب فلوس وما بيفكروش في أي شىء إلا الفلوس

بعد مرور ساعة وبتزايد إشمئزازنا من المكان وبعدما أيقنا أن الواقع الفعلي مختلف تماما عن ما كنا نتوقعه ونسمعه ونشاهده في الإعلانات
أردت أن أسأل عن سعر متابعة الحمل خاصة إننا رايحين له في بداية الشهر السادس يعني المفروض ندفع تلت متابعة أو بالكتير نص متابعة....آه نسيت أقولكم إنهم في التليفون قالولي متابعة الحمل بألف جنيه أو نظام تاني إنك كل مرة تدفع 100 جنيه

المهم سألت السكرتارية قولتلها
دلوقتي إحنا في الشهر السادس هدفع كام متابعة
وقبل ما أكمل الجملة
قالتلي : المتابعة مش هتدفعها المرة دي هتدفعها المرة الجاية
قلت : يعني ال 200 جنيه بتاعة النهاردة مش هتتخصم منها
قالتلي : آه ال 200 بتوع النهاردة دول كشف والمرة الجاية هتدفع ألف
قلتلها : أدفع 1000 إزاي إحنا مش في أول شهر حمل إحنا في السادس يعني هما 4 شهور بس
قالتلي : أنا ما عنديش كده لازم تدفع الباكيتج الكامل 1000
أو تدفع كل كشف 100 وسونار
قلتلها: كده إنتي عايزاني أدفع قرب 1400 لإن في آخر شهر هاجي كل أسبوع وفي السابع الثامن كل إسبوعين
قالتلي: معنديش غير كده

المهم زاد قرفي من المكان وزاد إستحقاري للناس دي وقد إيه هما فعلا كلاب فلوس
المهم جت الساعة 2 ومفيش لا دكتور جه ولا حد دخل سألت هو الدكتور فين قالولي بيعمل عملية تحت
طيب إزاي بيعمل عمليات وفيه كشوفات وناس منتظراه
قالولي هو كده بيطلع من العمليات ممكن ياخدله كشفين بسرعة وينزل تاني

المهم فضلنا بردو قاعدين ورغم إني فكرت أمشي من المكان المقرف ده إلا إني قولت طالما قعدنا ده كله خلينا قاعدين لما نشوف أخرتها




وشويه وجه برنامج له على المحور التلفزيونات عليت علشان الناس تتفرج والحقيقة إن ده مش برنامج زي ما كتير فاكرين دي ساعة إعلانية مدفوعة من فلوسنا وكلها إعلانات عن المركز بتاعه ونظافته وتطوره ويطلع ومعاه مذيعة تسأله عن بعض الحاجات وهو يرد عليها حاجة عادية ممكن أي دكتور يعملها حتى لو كان مجرد أخصائي
ما بيقولش حاجة غريبة أو مفيش دكتور يعرفها
لكن فيه ناس متصورة إن ده برنامج بيستضيفه لعلمه الفز
ورغم إني عارف إن الزمالات اللي كاتبه في إعلاناته ماهي إلا فلوس بيدفعها وبياخد بيها الزمالة وكده إلا إني قولت خلينا للآخر

المهم لما الدكتور جه لاحظت إن بيدخل حالتين مع بعض زي دكاترة الدايت كده وما بيطولوش أكتر من 10 دقائق المهم جت الساعة 5 وربع ولو تفتكروا إحنا قاعدين من 12 الظهر

دخلنا على الدكتور كان لابس لبس العمليات علشان أي ولادة تيجي ينزل علطول أصل الولادة ب 9000 جنيه وتعقيم عمليات إيه وكلام فاضي إيه بس
المهم
طبعا معانا مجموعة من التحاليل السابقة وسونارات عادية وسونار فوردي معمول من إسبوع فات خد بالك معايا سونار فور دي وبدأنا الكلام
أنا : ده يا دكتور سونارفوردي عملناه الإسبوع اللي فات لكن الدكتور قالنا الجنين حجمه صغير شوية ومحتاج تغذية كويسة
هو: "بص فيه التقرير بسرعة ومكاملوش لإن معندوش وقت وجه دكتور جنبه فرفور شكله عيل لسة متخرج" خده منه علشان يكمل قرايته علشان البروفيسور معندوش وقت يقرأ
أنا : طيب يا دكتور ده نظام التغذية اللي مشينا عليه الأسبوع اللي فات لما عرفنا إن الجنين صغير
هو : بص عليه ثانيتين بالعدد والله ثانيتين ويمكن أقل لم يقرأ أكثر من كلمتين على أقصى تقدير
وبعدين سأل آخر دورة كانت إمتى
فردينا عليه

المفاجئة : الدكتور الصغير وقف يعد له على صوابعه يعني حتى مفيش كلندر اللي مترمية في العيادات
وبعدين سأل: في عندك حساسية من دواء معين
زوجتي : ردت آه دوا كذا
هو : كتب على الكومبيوتر
سأل : إنتم قرايب ولا حاجة
أنا : لأ
ولا طلب يبص على تحاليل ولا طلب حتى تحاليل
هو:طيب إتفضلوا على السونار وأنا جاي وراكم

ذهبت زوجتى مع الممرضة لغرفة مجاورة وأنا إنتظرت معه لكي أستفسر منه أكثر لكنه قال لي هنشوف كل حاجة في السونار ...قصده يعني خلص لإن في كشف تاني هيدخل ويخلصه وبيعدين يجيلنا على السونار

دخلت زوجتي مع الممرضة غرفة السونار وطلبت منها الوقوف على الميزان وهو ميزان قديم ومتهالك لا يليق حتى بعيادة طبيب عادي
والممرضة وهي بتجهز السونار قالت لزوجتى قوليلي الميزان عامل كام
زوجتي قالتلها تعالي إنتي شوفيه أنا مش عارفة أوطي علشان الميزان بيتهز
الممرضة قالتها : إنتي تأمري
عامل 85 والميزان ده مزود 3 كيلو يعني 82 كيلو
وخدت ضغطها وكتبته في ورقة رمتها على المكتب اللي جنب السونار

حاجة تقرف صح

فضلنا نص ساعة 30 دقيقة كامل زوجتى معرضة مباشرة للتكييف وعليها الجيل الخاص بالسونار
نادتهم أكتر من مرة وتقولي الدكتور جاي وهو عمال ياخد كشوفات ويدخل سونار تاني في أوضه تانية
والآخر قولت لزوجتي نزلي الملاية يلعن أبو الجيل دي ملاية متسخة أساسا
بعد النص ساعة البروفيسير جه بدون حتى أي إعتذار

قعد على السونار اللي هو أساسا أقل من العادي بالظبط زي السونار اللي موجود عند أقدم دكتور ولكنه مشغله على 3 شاشات إل سي دي وده عادي أي سونار فيه كده

المهم بدأ الدكتوريتكلم بيقول إيه

الكومبيوتر حاسب إنك في الإسبوع 23
والسونار بيقول 22

ماشي أهلا ما إحنا عارفين كده مفيش جديد المهم إنت بتقول إيه
بص على الأرجل بصوا دي الرجلين ودي الركب

أهلا هو حضرتك نسيت إن إحنا جايبن لك معانا سونار فوردي وده كله شوفناه قبل كده بوضوح كبير مش زي النغمشة اللي إنتي جايبها دي

بصوا دي المعدة ودي الرأس

يارب صبرنا المهم خليه يخلص وبعدين نشوف

وقولناله يا دكتور بناخد فيتامينات كذا وكذا وهو مسألش أصلا وما علقش
وبعد ما خلص سونار زوجتى قالتله يا دكتور ساعات ضغطي بيعلى شويه البروفيسير ما كانش بص أصلا على الورقة اللي كانت مرمية على المكتب فبص عليها وقال عادي

سألته طيب يا دكتور أخبار الجنين كده إيه
قال : مش بطال
سألته: مش بطال يعني في حاجة وحشة ولا إيه
قال : لا كويس

المهم إستحملت قرفه ده وقولت لما نخلص سونار هنشوف هيقولنا إيه
آه نسيت أقولكم وقت السونار اللي أخد 3 دقائق فقط دخل علينا الدكتور الفرفور وقاله فلان عايز يعمل معرفش إيه في السقف اللي جوا قاله ماشي وبعدين قاله طيب دقيقة واحدة وأركز معاك
وفعلا هي دقيقة وفعلا حسيت أد إيه إني غلطت إني دخلت المكان ده

المهم بعد ما خلص السونار إستنيته يتكلم قال حاجة واحد هكتبلها على إسبرين تاخده هيحسن تدفق الدم أكتر
سألته هو فيه تجلط
قالي لأ بس ده هيحسن وصول الغذا أكتر سلام عليكم

وقام جري راح الأوضه التانية علشان ياخد كشف تاني


أنا عارف إن القصة طويلة وإنها ممكن تكون مملة لكني حبيت أحكيها بالتفصيل علشان الناس تعرف إن فيه دكاترة الفلوس صعرتهم رغم إنهم في الأول خدوا سمعة كويسة

وخصوصا إني دورت على النت ما لقيتش غير إعلاناته وكلام كويس عنه يمكن الكلام ده كان زمان قبل الصرع
لكن أنا هنشر تجربتي دي على كل المكان أنا مش زعلان على ال200 جنيه دول في داهية إنما أنا زعلان على الخمس ساعات وزيادة اللي ضيعناهم من وقتنا منتظرين البني آدم ده
اللي أنا عارف إنه أكيد هيشوف أو حد هيقوله على الموضوع ده
وحسبي الله ونعم الوكيل فيك يا عمرو يا حسيني