اعرفى الغلط فين واتناقشى معانا

مزاج الفل على عدوووووولاتى

معادنا انهاردة مع الحلقة التانية من مسلسل اعرفى الغلط فين

كانت الست عزيزة تجلس على الكنبة
وتمرر يديها على قطع الاثاث حولها
وكأنها تريد أن تشتري قطعة منها
وتتساءل عن مدى جودتها .... أو ربما
تقول : من فين بتجيبي يامفيدة
الحاجات الحلوة دي ؟؟


بدت شاردة الذهن ولم تلحظ أن مفيدة
قد عادت وكانت تسألها .... فبادرت
تسأل لتخفي توترها :

عاملة ايه يا مفيدة يا حبيبتى

مفيدة : بخير الحمدلله

عزيزة : بقالك كام يوم مش باينة قلت اجى اسأل عليكى

مفيدة : صاحبة واجب يا عزيزة اهلا وسهلا يا حبيبتى
تشربى ايه؟

لم تكن عزيزة تفكر ... حين قالت بسرعة البرق :
عندك عصير جوافة؟

اندهشت الست مفيدة قليلا :اشمعنى عصير جوافة

عزيزة : اصل شايفة جوزك طالع بكيس جوافة امبارح

مفيدة : اااااااااااه
طيب يا حبيبتى هقوم اجيبلك كوباية
عصير جوافة ... من عينيا


صورة


كان لدى الست عزيزة كثيرا من الأسئلة
تنتظر الاجابة عليها .... وبشغف

_ الا هى اختك اطلقت ليه يا مفيدة

_ قسمة ونصيب يا عزيزة

_ اه يعنى اطلقت ليه

_ مااتفقتش مع جوزها

_ يختى انتى بتردى بالقطارة ليه نشفتى ريقى
ماتقولى اختك اطلقت ليه هو سر ولا سر

_ يعنى عايزانى اطلع اسرار اختى برا

_ هو انا غريبة يا مفيدة ماهى زى اختى بردو

_ فيكى الخير يا حبيبتى

_ اه يعنى اطلقت ليه قولى قولى

_ اووووه شربتى العصير يا حبيبتى

_ اه جميل تسلم ايدك يختى




بدى على الست مفيدة الانزعاج :
بقولك ايه يا حبيبتى انا جوزى زمانه جاى وعايزة اقوم احضرله الغدا

كانت الست مفيدة تظن أنها ستنتهي من هذا
ولكن السيدة عزيزة وجدت لها منه سبيلا اخر لاشباع فضولها:
انتو هتاكلوا ايه انهاردة

_ اللى ربنا قسمهولنا يا عزيزة

_ اه يعنى ربنا قسملكو تاكلو ايه انهاردة

_ شوربة عدس

_ يختى هاتاكلو عدس فى الحر ده هو انتى ماعندكيش لحمة ولا فراخ فى التلاجة

_ لا ماعنديش

عقدت عزيزة حاجبيها : انتى بتضحكى علية يا مفيدة
انا شيفاكى خارجة من عند بتاع الفراخ امبارح
ومعاكى شنطة كبيرة اد كدة

_ لا حول ولا قوة الا بالله يا حبيبتى دى كانت لاختى

_ واختك ماتشتريش لنفسها ليه

_ عشان عيانة ومش قادرة تتحرك طلبت منى اجيبلها فرختين

_ اااااااااااااه





أكملت عزيزة شرب كوباية العصير
فظنت الست مفيدة أنها ستنعم بقليل من الهدوء
لكن عزيزة ... خلصت الكوباية وعادت لتسأل :

_ هو انتى زعلانة مع جوزك يا مفيدة

_ ليه كمان

_ اصل سمعته خرج الصبح ورزع الباب وراه

_ لا ياعزيزة دا كان مستعجل والباب اترزع غصب عنه

_ غصب عنه اه
هو جوزك امبارح رجع متأخر عن معاده ليه

_ امه اتصلت بيه عشان يوديها عن الدكتور

_ ليه يختى هى امه مالها

لم تعد مفيدة تحتمل أكثر من ذلك وقالت وكأنها تعبر عن ذلك :
مرارتها اتفقعت يا حبيبتى مرارتها اتفقعت
فى حاجة تانية؟؟؟؟؟؟

هنا ... أخييييييييرا أحست السيدة عزيزة فلملمت أغراضها وهي تقول:
_ يختى لا تانية ولا تالتة ... انا هقوم دلوقتى واجيلك مرة تانية

وقفت الست مفيدة خلفها تودعها : بالسلامة

وما إن أغلقت الباب حتى تنهدت :
_ اوف يا ساتر





وخلصت حكايتنا يا قمرات

عايزين بسرعة نشوف الاجابات


سؤالنا بقا : ايه الغلطة اللى حصلت فى حكايتنا ؟؟؟