كيف نحب القراءة؟

طبعا كلنا عارفين ان القراءة مهمة و لازم نقرأ الخ الخ الخ و الكلام اللي بيوجع نفوخنا ده
هو احنا بنحب القراءة؟
طب هو احنا بنكره القراءة ليه؟
طب هو احنا بنقرا ليه اصلا؟
طيب بنبقى مستمتعين و احنا بنقرا؟



(اعتقد كل اللي في المنتدى بيحب يقرا لانه في المنتدى بنتواصل بالكتابة و القراءة اصلا و لا ايه؟)

بنكره نقرا ليه؟

ممكن نكون من و احنا صغيرين ما اتعودناش على القراءة بسبب اقتصار اهتمام الاسرة على الاكل و الشرب و النوم و تنمية اي مهارات اخرى غير القراءة

او بسبب نوع الحاجة اللي بنقراها

يعني ممكن تكون بتقرا حاجة مش حاببها او مش من اهتماماتك

الواحد ينقي الحاجة اللي بيحبها

في خطأ شااااائع بينرفزني

ان الواحد يحكم على الموضوع من العنوان

محدش يعمل كده ابوس ركبكوا ( اقتباس من اللاعب ***- * من برنامج ***- * عشان محدش يفتكر يا جماعة ان دمي خفيف و لا حاجة )

اللي حتعمل كده حعرفها و حتلاقيني سكعتها قفا

لان مش دايما العنوان بيعبر عن الموضوع و اكيد قابلتنا حاجات كتير من دي

اهم سبب بقة

الكسسسسسسسسسل

انك تبقي كسلانة تقرا

شايفة الموضوع متعب

مع انه لا متعب و لا حاجة

اختاري قبل ما تقري مكان هادي عشان تعرفي تركزي في ضوء كافي عشان عينيكي ما توجعكيش

انا بقةمختلفه يا جماعة

بركز في القراءة لما بيكون في دوشة

عشان الدوشة بتمنعني من اني اسرح

طبعا وضعية الجلوس مهمة

ما فيش واحدة تقرا و هي نايمة او هي بتاكل او و هي بتتفرج على التلفزيون

يعني بذمتك انك حتقري و لا حتاكلي و لا حتتفرجي على التلفزيون؟

كل ده مش عشان حاجة ، ممكن تقري اه

بس عشان اللي بتقريه يثبت كويس في دماغك

امال بتقري ليه؟ مش عشان تستفيدي؟

حتى لو بتقري قصة

حتستفيدي من المواقف اللي فيها

طيب احنا بنقرا ليييييه؟

اول ايه نزلت على الرسول

لا مش اول اية





دي اول كلمة نزلت على الرسول

من المعروف ان القراءة وسيلة اساسية للحصول على المعلومات

خاصة في العصر الحديث اللي انتشر فيه ثقافة الانترنت

يعني تقري عشان ما تكونيش جاهلة

و بصراحة اللي متابع المنتدى هنا اكيد مية مية في المعرفة بأي شئ لانه بصراحة المنتدى مش أي كلام

كمان لما تقري بتبقي بتشغلي نفسك عن اي حاجة مش كويسة

يعني تقري احسن ما تتفرجي على فيلم من افلام الايام دي

تقري احسن ما تسمعي اغنية تضيع وقتك و ما طلعتيش منها بحاجة

احسن لما تكوني واقفة في البلكونة ما وراكيش شغلة و لا مشغلة

لان ربنا قالنا ما نضيعش وقتنا

فياريت تستفيدي في كل فيمتو ثانية

وصدق المتنبي حيث قال:

أعز مكان في الدُنى سرجُ سابحٍ

وخير جليس في الزمان كِتَابُ.

اللي بقة يا جماعة قرت الكلام ده كله و شايفة ان المشكلة ما اتحلتش


احب اقولها












نطي من الشباك يختي ، ما فيش امل فيكي


و انا بقة اللي حنط من الشباك لو ما حطيتوش تقييم ( انا اصلا ساكنة في دور الارضي يعني ما عنديش مشكلة في النط)

و احب نتذكر مع بعض سورة العلق

و السلام عليكم و رحمة الله و بركاته