العادات السبع للأشخاص الأصحاء عاطفيا.. تعرف على العادات السبع للسيطرة على حالتك النف
معظمنا بنهتم جدا بصحتنا الجسمانية و بناخد بالنا من أى تهديد ممكن يسبب لنا مشكلات صحية أو أمراض جسدية ، فبنلبس تقيل لما نحس بالبرد ، وبناكل كويس عشان مناعتنا تكون أقوى و بنخلى بالنا واحنا بنتعامل مع النار أو أى ألة حادة عشان ميحصلناش حروق أو جروح و بنستخدم مطهرات أو معقمات عشان ننضف الجروح كويس ، لكن على الرغم من إن صحتنا النفسية مهمة جدا وهى كمان معرضة للمرض و الجروح إلا إننا مش بنديلها الاهتمام المطلوب ، فى المقالة دى هنعرفك على ال 7عادات إللى بتدل إنك شخص سليم عاطفيا و نفس العادات دى لو اهتميت بتنفيذها نفسيتك هتتحسن وهتحافظ على نفسك من الأمراض و الجروح النفسية
يارب تكون عجبتكم
- السيطرة على الأفكار و المشاعر بعد الفشل :
تجارب الفشل إللى بتمر بيها خلال حياتك ممكن تؤثر على أفكارك و مفاهيمك عن نفسك و عن حياتك و هدفك و بالتالى تؤثر على مشاعرك وتبدأ تحس بالإحباط و روحك المعنوية تنخفض ، و ممكن تبدأ تحس إن قدراتك و إمكانياتك أقل من الهدف إللى إنت عايز توصله . حاول تخلى عندك عادة تجاهل رد الفعل دة ، ابدأ فكر و استرجع كل المؤهلات و المواصفات إللى عندك و إللى تقدر تساعدك على تحقيق الهدف و افتكر كل الخطوات الإيجابية إللى عملتها فى طريق تحقيقك لهدفك و فكر إزاى تقدر تحسنها أكتر وتستفيد بيها ، لو عملت كدة مش بس هتتغلب على الأفكار و المشاعر الانهزامية إللى ممكن تقابلك بعد تجربة فشل لكن كمان هتكون من الناس المرشحين للنجاح بقوة فى المستقبل
- البحث عن المعنى فى وقت الخسارة و الصدمات :
واحدة من العوامل المميزة للأشخاص إللى بيقدروا ينجحوا و يزدهروا بعد مرورهم بتجارب قاسية هى قدرتهم فى النهاية على اكتشاف المعنى و الدروس إللى يقدروا يتعلموها فى أوقات الحرمان أو الألم ، بالتأكيد الوصول للمرحلة دى أمر مش سهل و بياخد وقت و مجهود ، زى ما الحزن و التكيف على الأوضاع الجديدة بياخد وقت و مجهود ، محاولة اكتشاف المعنى وسط المعاناة مش بس بيخليك تكتشف إللى خسرته لكن كمان بيساعدك تكتشف حاجات تانية اكتسبتها و اتعلمتها أو ممكن تكتسبها و تتعلمها فى الوقت دة ، وبالتالى هتقدر تقدر حياتك أكتر و الناس المحيطين بيك و هتقدر تعمل تغييرات ايجابية و تكتشف معنى و قيمة لحياتك حتى فى أوقات الحزن
- محاربة الرغبة فى التفكير و اجترار الألم :
لما بتفكر كتير فى الأحداث و المواقف المؤسفة إللى حصلت فى حياتك مش بتقدر تتعلم من المواقف دى أو تشوفها بنظرة أعمق لكن بيكون عندك رغبة فى الشعور بالشفقة على نفسك ، وعشان كدة مهما كانت قوة رغبتك فى إنك تفتكر المواقف و الأمور إللى بتضايقك حاول إنك تحارب التفكير دة و تشتت نفسك عنه بأى نشاط ذهنى يشغلك زى مثلا إنك تنشغل فى لعبة مسلية زى السودوكو أو الكلمات المتقاطعة أو تحاول تفتكر ترتيب محطات المترو أو الأتوبيس أو تتفرج على فيلم يشد انتباهك و ياخد كل تركيزك
- تقدير الذات :
تقديرنا لذواتنا هو شعور متذبذب فبنشعر أوقات بتقدير لذواتنا لما بنحقق إنجاز معين أو الناس تتكلم علينا كلام حلو و أوقات تانية بيقل تقديرنا لذواتنا لما بنغلط أو بنفشل فى تحقيق شئ معين أو الناس تنتقدنا ، عشان صحتك النفسية تكون أحسن ، لازم تعرف إن تقديرك هو حائط الصد و الجهاز المناعى إللى بيحمى نفسيتك من الجروح و الإنهيار و بالتالى مينفعش تسيبه يتدمر و لازم نحاول نعالجه و نغذيه لما يكون مريض ، دة هيجى بطريقة واحدة بس إنك تتعلم تحب نفسك ، لما تكتشف إنك بتنتقد نفسك طول الوقت و بتحبطها ، تخيل إن صديقك عنده نفس مشكلتك واكتب كل عبارات الدعم و التشجيع إللى ممكن تقدمها ليه فى إيميل ، وارجع اقراه مرة تانية واعتبر إن الكلام دة موجه ليك شخصيا
- الحفاظ على القيمة الذاتية بعد تجارب الرفض :
المرور بتجارب الرفض شئ مؤلم جدا ، و رد الفعل الطبيعى للإنسان بعد المرور بتجربة رفض هو استنتاجه إن هو سبب الرفض لسبب مشكلة معينة أو عيب فيه ، الرفض مؤلم لكن مش بسبب إن المشكلة فيك لكن بسبب طريقة تفكيرك بعد مرورك بتجربة رفض معينة ، أفضل طريقة تساعدك علشان تتغلب على الشعور بالرفض هى إنك تفكر نفسك بالصفات الكويسة إللى بتمتلكها و المميزات إللى بتقدرها فى نفسك زى الوفاء و العطف و الحنان و الإبداع و أخلاقيات العمل ، اكتب قائمة فيها الصفات إللى إنت شايف إنك بتمتلكها وممكن تستعين بشخص قريب منك عشان يساعدك كمان ، وركز على صفة أو اتنين و اكتب فى ورقة ليه هم مهمين بالنسبة لك و ليه إنت محظوظ إنك بتمتلك الصفات دى
- مقاومة الشعور بالوحدة :
الشعور بالوحدة أصبح شئ شائع و مألوف جدا ،و تأثيره سلبى على صحتنا النفسية و الجسمانية ، مشكلة الشعور بالوحدة هى إنها بتخليك تتقوقع حوالين نفسك و تدخل فى دايرة الأمان الخاصة بيك و فى نفس الوقت بتخليك تتجنب أى فرصة للاختلاط بالناس و توسيع دايرة معارفك أو أصدقائك أو حتى تقوية علاقتك مع أصدقائك الحاليين ، أفضل طريقة لمحاربة الشعور بالوحدة هى إنك تكتب فى ورقة فاضية قايمة تتضمن كل الأسباب و الأعذار إللى بتقولها دايما عشان تتجنب الدخول فى علاقات اجتماعية جديدة وفكر فى مدى جديتها ، و فى ورقة تانية اكتب أسماء أشخاص استمتعت بصحبتهم حتى لو من فترة كبيرة واختار شخص أو اتنين يوميا عشان تتواصل معاهم مرة تانية عن طريق الموبايل أو مواقع التواصل الاجتماعى ، اتحدى نفسك إنك مش هتستخدم أى عذر فى القايمة بتاعتك لما تبدأ تشعر بالقلق من الدخول فى العلاقات الاجتماعية المختلفة
- التعبير عن الشعور بالذنب بإصلاح العلاقات المكسورة :
الشعور بالذنب بيجى من أفعال غلط عملناها أو أفعال صح معملنهاش نتج عنها أذى لأشخاص معينين ( وخصوصا الأهل و الأصدقاء) ، فى المواقف إللى زى كدة فى شئ مهم جدا بخلاف الاعتذار لازم نعمله و لكن بننساه كتير ، الشئ دة هو صفة مميزة للشخص السليم عاطفيا و هو إظهار التعاطف مع الشخص إللى تعرض للإيذاء ، الاعتذار الفعال بيستلزم إظهار مشاعر التعاطف و الأسى مع الشخص إللى غلطت فى حقه ، وقتها هيكون الشخص إللى أخطأت فى حقه قادر يسامحك من قلبه، وبالتالى هيختفى شعورك بالذنب
يارب تكون عجبتكم 
رد: العادات السبع للأشخاص الأصحاء عاطفيا.. تعرف على العادات السبع للسيطرة على حالتك ا
مشكوورة ع الموضوع
إظهار التوقيع
توقيع : sηfoorћ♪'
التوقيع لا يظهر للزوار ..
رد: العادات السبع للأشخاص الأصحاء عاطفيا.. تعرف على العادات السبع للسيطرة على حالتك ا
إظهار التوقيع
توقيع : الملكة نفرتيتي
التوقيع لا يظهر للزوار ..
رد: العادات السبع للأشخاص الأصحاء عاطفيا.. تعرف على العادات السبع للسيطرة على حالتك ا
المشاركة الأصلية كتبت بواسطة الملكة نفرتيتي
مشكوووووووووورة
رد: العادات السبع للأشخاص الأصحاء عاطفيا.. تعرف على العادات السبع للسيطرة على حالتك ا
رد: العادات السبع للأشخاص الأصحاء عاطفيا.. تعرف على العادات السبع للسيطرة على حالتك ا
الساعة الآن 02:11 PM
جميع المشاركات تمثل وجهة نظر كاتبها وليس بالضرورة وجهة نظر الموقع