السلام عليكم ورحمة الله وبركاته
ازيكم حبيباتى
أنا عارفة انى بعرض مواضيع عدا عليها كتير بس أنا كنت بصور وبقول وقت ماربنا يسهل وأدخل أنزل وصفاتى عشان اللى حابب يستفيد
موضوع النهاردة عن عزومة كنت عملتها في رمضان وأنا متعودة من زمان ان بيتنا بيت العزومات عشان كده لما اتعلمت من والدتى ووالدى كمان آه ماتستغربوش والدى شيف تمام عشان اللى ربنا كرمها بولد تعمله برضه مافهاش حاجة وتحببه في الطبخ عشان يساعدك ويوم ماربنا يكرمه ويتجوز يساعد مراته ومافهاش حاجة دي ليها ثواب عند ربنا على فكرة
وكمان أكبر الشيفات في العالم رجال يعني ماتستعيبوش الموضوع
المهم عشان ماتتوهوش منى
العزومة عندنا بيبقى عدد الموجودين عندنا كبير لينا قسمين بالعيلة عيلة بابايا وعيلة مامتى
وأكيد كل واحدة بتعمل عزومة بتعرف اللى بييجوا أذواقهم ايه؟
يعنى لما بييجى عندنا عيلة مامتى بنسألهم عايزين تاكلوا ايه؟
وهما بيجابوا باللى حابين يدوقوه من إيدي أنا أصلي والحمد لله بيسمونى كبير الشيفات في العيلة فاللي بييجي على بالهم بيطلبوه من إيدي
العزومة دى كانت لعيلة مامتى
الصور فيها ماحطتش فيها انا قدمتها ازاى ؟ واعذرونى لان ببقى مجهزة أطباق كتير وبحط الأكل من هنا وبيتنسف من هنا
أنا مش ببصلهم في الأكل والله بألف هنا وشفا على قلوبهم
فانا صورت الطريقة وكمان وهي في المطبخ بس
المهم زى مانتوا عارفين العزومة دى مقدرة لكل بيت بعنى بتعملى اللى على قدرتك المهم ماتعمليش اللى مش ضامنة انهم حياكلوه كمان بلاش التجارب في العزومات يعنى بلاش تجربي تعملى وصفة لأول مرة لانها ممكن ماتظبطش معاكى ويبقى كسفة وحشة قوى
العزومة في رمضان بتتطلب مشروب عصير/شوربة ويفضل نوع واحد/السلطة وغالبا بتبقى الخضراء/الطبق الرئيسي وبيبقى نوعين عشان تناسبى كل الأذواق يعنى نوع طيور ونوع لحوم/طبق جانبى وبيبقى الأرز والمكرونة وفيه الجلاش باللحمة المفرومة او نوع الحشوة اللي بتحبيه/الحلويات الشرقية أو الفواكه وابتعدى عن المشروبات الغازية لأثرها السئ
شوية نصايح عالماشي
1)لما بتيجي تعملى العزومة طبعا بتعزمى الضيوف من قبلها بأسبوع عشان يرتبوا حالهم.
2)ابدأى إكتبى الوصفات اللى حتعمليها على حسب عدد المدعوين ومتحاوليش تكتري لكن اعملى حساب انك تهادى جيرانك برضه ليهم حق عليكى.
واعملى حسابك في تنظيف البيت من قبلها بيومين عشان يكون جاهز لاستقبال الضيوف يوم العزومة ترويقة عالماشي وخلى ولادك يساعدوكى باللي يقدروا عليه.
3)اكتبى خطة عمايل وصفاتك وبالخطوات بالضبط وحطيها على تلاجتك ولما تخلصي خطوة خطوة اشطبي عليها.
4)ماتخليش كل وصفاتك في يوم العزومة ممكن تعملى من قبلها بيوم الحاجات اللى ينفع انها تتعمل قبلها زى تعصيج اللحمة مثلا أو تسبيك الطماطم وتحضير العصاير أو الخشاف وتجهيز اللحوم في تتبيلتها او الفراخ في تتبيلتها.
5)ابدأى عمل اكلك في يوم العزومة من بدرى شغلي القرأن او انتهزى الوقت في الاستغفار والتسبيح.
6)قبل الضيوف ماييجوا جهزى السفرة حطى السلطة وجهزى أكواب العصاير في صينية وجهزى أكواب الشاي وماجات النسكافيه في صينية تانية وجهزى أطباقك وحاولى قدر الامكان تحطي الحاجة في أطباق فوم طبعا اللى ينفع يتحط وبس.
7)خدى شاور لجسمك بسرعة والبسي عبايتك أو إسدالك عشان تبقى مستعدة لإستقبالهم.
8) اوعى ماتصليش صلواتك في ميعادها.
تقريبا دي النصايح اللى كنت عاوزة أكتبهالكم
ندخل عالتقيل بقى
العزومة عندى كان فيها
1)العصاير( تمر هندى وخروب وجوافة كنت شايلاها في الفريزر عندى).
2)الشوربة (شوربة شعيرية وعدس).
3)الطبق الرئيسي: بالنسبة للحوم عملت لحمة مشوية مع البص المكرمل والبطاطس ولحمة مشوية عالشواية ودى بابا ساعدنى في شواها بعد ماجهزتها بتتبيلتها من قبلها بيوم.
وبالنسبة للطيور عملت فراخ مشوية بتتبيلتى الخاصة وكان عندى ديك رومى مسلوق وحمرته بتتبيلة مخصوصة في الفرن ودى عملتها حاجة فانتازيا بس مابرميش حاجة خالص فضلت زى ماقلتلكم جيرانى بهاديهم وكمان ببقى دايما عاملة حساب اليوم التالى ماهو أنا برضه مش بعد التعب ده حعمل أكل لتانى يوم كمان.
3) الأطباق الجانبية:أرز بالكركم ومكرونة وعملت جلاش باللحمة المفرومة وجلاش بالسوسيس ولحمة مفرومة بانيه بالسمسم.
4)بعد الأكل بشوية بقدم الفاكهة والشاي والكوفي ميكس كل واحد ومزاجه.
حتقولولى انتى ليه ماعملتيش صنف خضار بصراحة كنت بعمل لكن كنا بنتدبس في الخضار لان الغالب بيحب نواشف في رمضان وطبعا زى ماقلت انتى بتعملى حسب ذوق ضيوفك.
تابعونى في الجزء الثانى للوصفات