وحشتيني
ف كل مكان ف ذكرى معاكي متسابة
ايديا ف ايدك الطفلة باعدي معاك ف الشارع
ملامحك وانتي بتسمعي فيروز
نهارك وانتي بتواجهيه بشاي بحليب
وحكاياتك على صحابك
فلانة بتكرهك جداً
فلانة قالتلي ماتشوفيهوش
كلام قولتيه وكان لازم
ف وقت الجرح ماتقوليهوش
اكيد دلوقتي بتقولي
زمانه مولع الدنيا
بيغلط كل يوم عادي
خلاص فاكك بقا ومرتاح
وانا والله ف قيودك
كطير من كتر ما اتقيد
طلعله جناح
انا ف البعد متحاوط بطيف ريحتك
ولسه لحد هذا الوقت فاكر شكل تسريحتك
وتنهيدك
وشكل الساعة علي ايدك
طريقتك وانت بتغني
بعيد عنك حياتي عذاب
حياتك ايه بعيد عني
يا دنيا عرفتها فجأة
وارض لمستها بشويش
يا أطهر من رقم فلكي
ف عداد اسمه أكل العيش
بتحكمي ليه على غيابي
وف حضوري بتنسيني
رفضتي ان انتي تتسابي
وفجأة انتي اللي سيبتيني
وحشتيني
كانك ف الغياب اقرب
وجود بيزيد اذا بعدتي
رصيد ناقص ف كل حضور
ووحدك ف الغياب زيدتي
عرفتي ازاي تشاركيني غنا التفاصيل
بقيت متساب لكن شبطان
شيطان طيفك ملاك ف شيطان
مخليني ف وسط الناس لكن وحدي
باشوف العمر بيعدي
وحاسدينني البشر علي ايه وانا بدونك
وايه الدنيا سوى عيونك
سوى حضنك ف وقت الخوف
ياعم الحاسد الطامع تعالى وشوف
طلل راجل ف عز الليل
بيسرد قصته لروحه
ويشكي جروحه لجروحه
ويظهر للبشر باسم
يعيش وكإنه متطمن
وهو ف قلبه يتم عجيب
شوفيلك حل ف غيابك
يا اما رجوع من المبدأ
يا اما تقولي كيف ابدأ
ف أي طريق ينسيني
وحشتيني
الجزاء التاني.بتحكمي يه علغيابي؟.وفي بعادي بتنسيني.رفضتي ان انتي تتسابي.وفجاء انتي ال سبتيني
قد تكوني مهتمة بالمواضيع التالية ايضاً