موضوع يساعدك فى تجهيز شقتك ..

كل بنت قربت من الجواز بتحلم إنها تخلي بيتها جنة وعلى الموضة ونفسها تعرف دايماً أحدث خطوط الموضة لديكور البيت..

واحنا النهارده حبينا نحقق لك كل أحلامك وجبنا لك أحدث صيحات الموضة لغرف النوم السنة دي..

غرف على كل شكل ولون




















































































أول حاجة هنبتدي بيها هي موديلات غرف النوم واللي هتلاقي إنها بتتنوع ما بين الموديلات المودرن والكلاسيك، وده هيساعدك في إنك تقدري تختاري اللي يناسبك ويلائم ذوقك وماتبقيش مقيدة بذوق أو استايل واحد بس، يعني هتلاقي إن:
التصميمات المودرن: لها أكثر من شكل وبتجمع ما بين الأناقة والعملية الشديدة واللي بتظهر أكثر في تصميمات السراير، فهتلاقي مثلاً سراير متقسمة من تحت لأدراج علشان تقدري تشيلي فيها الملايات أو المفارش أو أي حاجة عايزة تخزنيها وبكده هتوفري مساحة أكبر داخل الغرفة، وكمان تصميمات السراير اللي بتكون على الأرض تماماً والمرتبة اللي بتكون فوقه هي اللي ليها ارتفاع، وعلى فكرة النوع ده من الموديلات بيليق على أي مساحة لغرفة النوم.

التصميمات الكلاسيك: واللي بتتميز بإنها قمة في الشياكة والذوق لكن معظم الموديلات الكلاسيك بتحتاج لغرف نوم مساحتها كبيرة؛ لأن معظم السراير الكلاسيك بتكون من الخشب ولها "أويمة كبيرة" والشغل اللي فيها كثير، وهنلاقي كمان سراير من الفيرفورجيه وسراير نحاس بأعمدة واللي ممكن يتركب فيها ناموسية أو ستائر خفيفة علشان تضيف رومانسية على غرفة النوم.

ألوان الحوائط على حسب شخصيتك

تاني حاجة هنتكلم فيها هي موضة ألوان حوائط غرف النوم واللي بتتحدد على حسب مساحة الغرفة وكمان على حسب طبيعة شخصيتك يعني مش لازم تمشي وراء الموضة وتحاولي تقلديها وخلاص؛ ودلوقتي تعالي نشوف مع بعض إزاي شخصيتك ممكن تحدد لون غرفة نومك.. يعني مثلاً:

لو كنتي شخصية هادئة: هيناسبك الألوان اللي تتماشى مع شخصيتك وتحسسك بالراحة والهدوء زي الأبيض والرمادي ودرجات البيج والروز والبنفسجي الفاتح واللبني.

لو كنتي شخصية جريئة: هتناسبك أكثر الألوان الصريحة زي الأزرق الغامق والأحمر والبرتقالي والأصفر والبني والأخضر الغامق وممكن تمزجي ما بين الألوان اللي فاتت وما بين الألوان الفاتحة بإنك تعملي حيطة بلون فاتح مثلاً وباقي الحوائط باللون الأغمق.

لو كنتي شخصية محايدة: يعني بتتكيفي مع أي بيئة حولك فإنت هيناسبك أي درجة من درجات اللون الرمادي أو اللافندر، وعلى فكرة الدرجات دي موضة جداً السنة دي.

أما بالنسبة لمساحة الغرفة فلو كانت مساحة غرفتك صغيرة فيفضّل إنك تكتري من الألوان الفاتحة وتقللي من الغوامق، أما لو كانت مساحة غرفتك كبيرة فإنت ممكن تنوّعي وتختاري الألوان الغامقة والنقشات اللي أنت عايزاها؛ لأن المساحة هتساعدك على ده.

سجاجيدك شيك وعلى الموضة


موضة سجاجيد حجرات النوم السنة دي ما اتغيّرتش كتير عن موضة السنة اللي فاتت، فهنلاقي السجاجيد اللي فيها رسومات مجسمة أو السجاجيد المربعة واللي بيكون لها لون واحد، وكمان السجاجيد اللي لها وبرة أو شعر كثيف وطويل واللي مشهورة باسم "فلوكاتي" منتشرة جداً السنة دي.

لكن بشكل عام أكثر حاجة بتميز موضة السجاجيد السنة دي هي تداخل أكثر من لون مع بعض وبأكثر من درجة في السجادة، ده غير إن السجاجيد بقت بتتميز بخطوط وتصميمات أبرز وأجرأ.

بالإضافة إلى إن الموضة اقتصرت على السجاجيد اللي مساحتها صغيرة واللي هتكتفي بإنك تحطيها في منتصف الحجرة أو في أبرز مكان فيها زي المساحة اللي بتكون أمام السرير.

كمان موضة المخدات الصغيرة اللي بتتحط على الأرض رجعت تاني، والمخدات دي بتكون بنفس لون السجادة أو أي درجة من درجات لون السجادة؛ وتقدري تحطي المخدات دي على طرف السجادة أو ممكن على الأرض جنب السجادة.















































































بالنسبة لإضاءة غرف النوم فهي لازم تكون متوزعة كويس؛ علشان تزيد من جمال وشياكة الغرفة، وعلشان تعرفي توزّعي الإضاءة داخل حجرة النوم لازم الأول تعرفي أنواعها ومنها:

الإضاءة العامة: واللي بتكون متوزعة بالتساوي داخل الحجرة علشان تنورها وتوفر إضاءة كويسة في كل مكان في الغرفة والنجف هو اللي بيقوم بالدور ده.

الإضاءة المركّزة أو المسلّطة: ودي بتكون مركزة الإضاءة على حاجة معينة وهتلاقي إن الاسبوتات أو الأباجورات أو اللامبادير "البديل المودرن للأباجورات". هما اللي بيقوموا بالدور ده.

وخذي بالك من نقطة مهمة جداً؛ فيه بنات كثير ممكن تنساها وهي إنك إذا اخترتي موديل حجرة النوم مودرن فلازم النجفة والأباجورة يكونوا مودرن، أما إذا اخترتي الغرفة كلاسيك فلازم تكون النجفة والأباجورات كلاسيك.

وبشكل عام فوحدات الإضاءة السنة دي اختلفت تماماً وبقى ليها أشكال جريئة ومبتكرة بشكل كبير؛ وأفضل حاجة إنك توفري كل أنواع الإضاءة في الغرفة بحيث إنه يكون عندك نجفة رئيسية واسبوتات وأباجورات أو لمبادير علشان يكون عندك أكثر من اختيار تقدري تنوعي ما بينهم.

ودي بعض النصايح اللي ممكن تتبعيها علشان تمتلكي حجرة نوم مثالية زي اللي بتحلمي بيها:
1- حاولي توفّري الهدوء لغرفة نومك بإنك تختاري غرفة النوم بعيدة عن الصالة والمطبخ وحجرة المعيشة، وتكون هي أبعد غرفة في البيت علشان يتوفر فيها الهدوء اللازم للراحة.

2- لما تيجي تفرشي الغرفة اختاري الأول ألوان الحوائط والدهان وعلى أساسه ابدئي حددي ألوان الفرش والأثاث.

3- يفضل إن نقشات ستائر حجرة النوم تكون مقاربة لنقشة وألوان السجادة والمخدات الصغيرة سواء اللي هتحطيها على السرير أو على الأرض.

4- مهم أوي إنك تغيري من ترتيب الغرفة كل فترة علشان تعملي تجديد دايماً، ويبقى فيه نوع من البهجة وده بإنك تغيري من مكان السرير أو التسريحة مثلاً.

5- لازم تغيري فرش السرير على الأقل مرة كل أسبوع؛ علشان الحشرات والفطريات بتعيش فيه وممكن تسبب أمراض خطيرة.

6- من أهم النصايح اللي لازم تعمليها واللي كان جداتنا بيعملوها زمان وهي إنك تعرضي الفرش كل يوم للشمس، وده على فكرة مفيد جداً للقضاء على البكتريا والفطريات الضارة وكمان حشرات الفراش.

7- ما تزحميش غرفة النوم بالأثاث وقطع الديكور وده لسببين أولهم إن مافيش أي حد هيشوفهم غيرك أنت وأفراد أسرتك، والسبب الثاني إن بكده الحجرة هتكون زحمة جداً وده هيؤثر على راحتك وحرية حركتك داخلها.

8- خرّجي التليفزيون خارج غرفة النوم؛ لأنها مش المكان المناسب ليه والأفضل إنك تحطي جهاز التليفزيون في حجرة المعيشة، علشان مشاهدة التليفزيون في السرير بتسبب أرق ونوم متقطع وكمان شكله مش بيكون مناسب.


أرجو ان ينال الموضوع إعجابكم .. منقول للامانه