بسم الله الرحمن
شوف كم طريقه ومتقولش ايه ده دى طويله:::::::
جيب هدية لحد بتحبه من غير مناسبة و إديهاله في عدم
إهتمام كأنك معملتش حاجة غريبة وشوف تعليقه هيبقى ايه
اشترى علبة شوكولاتة مستوردة غالية و كلها كلها لوحدك
إلعب لعبة مالعبتهاش من و إنت صغير
بص لأهلك و عرفهم قد إيه بتحبهم بس متأفورش عشان ميحسوش انك اهبل
بص للي تحتك و إعرف قيمة كل حاجة معاك
بص للي فوقيك و إعرف إن رغبتك إنك تبقى زيهم هي اللي مدية طعم لحياتك
إستمتع بشمس الصيف بصلها و قولها إنك مش كارهها حتى لو عرقتك و لزقتك
روح أقعد على البحر وقوله كل اللى جواك بصوت عاااااالى
في الشتا إنزل تحت البطانية و حط كوباية الشوكولاتة السخنة او النسكافيه جنبك و غمض عينيك و نام
إشتغل لحد ما تحس إنك ميت نام تاني و إشحن و روح موت نفسك تاني..
وإعرف إنك زودت حاجة للدنيا ماحدش كان هيزودها غيرك
لما تكون بتاكل حاجه وانت ماشى ف الشارع وطفل بصلك اوى اديهاله حتلاقيه بيضحك وانت كمان هتضحك
إعرف إنك كائن مهم و في كل لحظة بتغير إتجاه التاريخ
لما تلاقى الدنيا بتشتى اقف تحت المطر ومد ايدك ليه وادعى من قلبك هتحس ساعتها احساس تحفه
امسك ايد بيبى صغير وخليه يضم ايدك بايده الصغنونه هتحس احساس رهييييب
بص لشحات واقف جمبك ماتديلوش ولا نكلة بس سلم عليه و إضحكله و قوله
“عامل إيه تمام؟ طب الحمد لله وسيبه وامشى
بص لبنت وحشة و عاكسها بنظراتك و إعرف إنها هترجع البيت مبسوطة جداااااا
بدون سبب إبعت رسالة لأي حد بتحبه قوله حاجة حلوة
خلى اللي يكره يكره و اللي يشتم يشتم وإعرف إنهم مضيعين وقتهم
حب جامد قوي حتى لو حبك مش هيستمر لحد بليل
كل أكلة حلوة اوي بس ماتخليهاش تشبعك
افتكس مشروب لنفسك واشربه و لو ماعجبكش إرميه في الحوض و إشرب حاجة ثانية بتحبها
أكسب نفسك و حب حد بيكرهك
إكسب نفسك ثاني و حب حد بتكرهه
إكسب نفسك ثالث و إنسى حد لسه بتحبه من غير ما تكرهه
شجع صحابك الزملكاوية لما يكسبوا او على الفيس حتى لو إنت مش زملكاوي
شجع صحابك الاهلوية لما يكسبوا او على الفيس حتى لو إنت مش اهلاوى
لما تقابل واحد مش فاكر إسمه و مش بتسلم عليه عادة خده بالحضن و قوله واحشني جدا يا معلم
جرب أكلة جديدة في مطعم فخم ثمنها يخرب البيت و روح و إنت مبسوط جدا المهم راحه البال والنفس
إلبس أحلى لبس عندك و إنزل إمشي في الشارع و إنت فارد ظهرك و ماتحطش إيديك في جيبك خليهم أحرار
إرقص حتى لو في أوضتك و إنت قافلها بالمفتاح ممكن تغني كمان و إنت ماسك الفرشة على إنها ميكروفون
إفتكر قبل ما تنام كل الكلام الحلو اللي سمعت الناس بتقوله عنك
كل ما تلاقي حد بيحكي عن مشكلة دورله عن الجانب المشرق فيها مهما كانت صعبة. طلعله فيها فوايد و باركله على حلها قريب
كل ما حد يقولك إزيك عامل إيه؟ قوله الحمد لله مبسوط قوي قولها بسرعة من غير ماتفكر و إبتسم لوحدك هتتبسط فعلا
شوف إيه أكبر مشكلة في حياتك.. فكر في أسوأ حاجة ممكن تحصل بسببها و هتلاقيها مش هتموتك و هتفضل برضه في الآخر فوق الأرض مش تحتها و إن الدنيا هتمشي و إحمد ربنا
لو انت ف مكان مع اصحابك اتصوروا كتيييير اوى واتفرج على الصور دى بعد كده هتلاقى نفسك بتضحك لوحدك
إستحمى في نص ساعة او ساعة خلى المية تنزل على وشك و إسمع صوتها كويس
جيب لنفسك هدية و إستنى لحد عيد ميلادك و إديها لنفسك
أشكر كل الناس بسبب و من غير سبب
لو حد إتريق عليك إضحك حتى لو من جواك بتضحك عليه
لو الناس بعدت عنك إعرف لأنكم مش زي بعض لا هما وحشين و لا إنت وحش إنتم بس مش زي بعض و إتبسط إنك مش بتضيع وقتك معاهم
لو لقيت نفسك لوحدك شوية ده معناه إنك فريد و نادر من نوعك و مين في الدنيا يقول إن نوعك غلط أو وحش بس إنت تقدر تتأكد إن ده النوع المناسب ليك و إتبسط بيه و لو نفسك تغيره غيره مافيش حاجة بتلزق
بص لإمبارح و شوف إتعلمت منه قد إيه
خطط لبكره بس إوعى تخاف منه إزاي تخاف من حاجة إنت اللي بتبنيها أصلا بعد فضل ربنا حاجة لسة ماحصلتش و ماحدش في الدنيا يقدر يعرف إيه اللي هيحصل فيها
إستمتع بالنهاردة كويس لأن كل نهاردة هيبقى إمبارح بتاع بكرة زي ما كان بكرة بتاع إمبارح
إسمع أغنية مدحت صالح وانا ويايا بعيش زي المليونيرات و إضحك منها أو عليها بس في الحالتين هتضحك
لما حد يحكيلك حاجة مملة علشان يبين مواهبه في الحياة إعمل نفسك مهتم آخر حاجة و لما يخلص إعمل نفسك منبهر آخر حاجة برضه و كمان إسأله عن تكملة الحكاية بس ماتعملش كده كثير مرة كل فين و فين
إفتكر أيام لما كنت بتصحى بدري علشان المدرسة و لما كنت بتذاكر فيزيا أو تاريخ و أهلك مانعينك من النزول و إتبسط إن ده كله خلص و مش راجع ثاني او فاضله كم شهر ومش هيرجع تانى ابدا ولا كم سنه ومش هيبقى له اثر
إتبسط .. و لو مش عايز تتبسط .. مش هتعرف تعكنن عليا
برده لأنى مبسوط
نفسك تبقى مبسوط من غير سبب .. اتفضل
رد: نفسك تبقى مبسوط من غير سبب .. اتفضل
قد تكوني مهتمة بالمواضيع التالية ايضاً