عزيزاتي العدولات محتارة ارجع لحياتي الماضية ازاي مش عارفة اتعامل مع جوزي بعد ما اتجوز عليا احنا اتجوزنا علي حب واستمرت حياتنا 6 سنين خلفنا ولدين وكان في مشاكل كتير بينا بس كانت بتعدي وكنت بسامح على حاجات كتير مهينة ليا ولكرامتي بحجة الصبر والحفاظ على البيت بس جوازه كان بمثابة كسر لكل شيء بينا وكمان غير فشخصيتي حاجات كتير اولها احترامي ليه وخوفي على حياتنا وبيتنا اللي مش موجود دلوقتي وبقيت بفضل اهلي عليه ومفيش ابدا سر بحكيهوله ولا اي حاجة مشتركة نتكلم فيها غير المصاريف والمدارس والكسوة الصيفي والشتوي كل شيء بينا تاني معنوي اختفى حاولت انا وهو نرجع نحب بعض تاني ونقرب من بعض وطبعا التانية لسة على زمته وخلفتله ولد ويادوبك هما يومين مش اكتر نقعد كويسين بس مجرد كلمة واحدة بتقلب الدنيا على بعضيها ونفتكر كل المأسي اللي حصلت بينا لغاية يومنا دة وكأننا اعداء هو يقولي انتي عملتي كذا وكذا وانا اقوله وانت عملت كذا وكذا ونستمر كدة لغاية كل واحد فينا ميطلب الطلاق ودي اخر طلقة بس العيال هتعمل ايه وهتتربى ازاي غير كدة مفيش
بس النهاردة بقى المشكلة كبرت وصارحني واحنا بنتخانق ان الراجل مستحيل يرجع لواحدة غدرت بيه وانه راجعلي بس علشان الاولاد وطبعا مش بيستبعد اني اعمله عمل وأأزيه او انتقم منه بعد اللي عمله معايا وانه متأكد اني رجعتله علشان المصاريف والاولاد وتربيتهم مش زي مابقوله اني رجعتله لاني بحبه وبيقولي اني مادية وبمووت على الفلوس وده كل اللي عاوزاه منه انا مغدرتش بيه بالعكس هو اللي غدر بيا وكان بيهددني انه هياخد اولادي مني لو ماوافقتش على جوازته وعلشان كدة اخدت ورق اولادي من وراه لانه كان بيهددني اني مش هاعرف ادخلهم مدارس بدون الورق دة هو بقي بيقول كدة انا سرقته وغدرت بيه انا دلوقتي فبيت اهلي لانه مسافر بره وعنده مشاكل فشغله تمنعه من النزول لغاية مايستلم جواز سفره ومحدش من اهلي يعرف اني بكلمه فالتليفون واني رجعتله لاني كنت مصرة على عدم الرجوع ليه بس خفت على العيال وفعلا مش هاعرف اصرف عليهم ولان طريقة معيشتي مكلفة ومدارس اولادي خاصة بمصاريف كتير وانا مبشتغلش
اللي مضايقني انه علطول بيقولي اني اول حب فحياته ومحدش هياخد مكاني فقلبه وانه رجعلي بس لانه بيحبني وميقدرش يعيش من غيري مش علشان الاولاد وكمان لاني اول بخته وعشت معاه اول بدايات شغله وحياتنا البسيطة واستحملت منه كتير وصبرت عليه اكتر وده اللي خلاني فعلا افتكر ايامنا زمان وبدأ قلبي يصفى من ناحيته وشوية شوية ارجعله بس كلامه النهاردة خلاني اشك فكل دة واحس ان حياتي معاه ملهاش قيمة وكل الحكاية تربية الاولاد بس لانه مقتنع ان الاولاد مستحيل حد يخاف عليهم غير امهم مش مرات ابوهم
انا مش عارفة هو رجعلي ليه علشان بيحبني ولا علشان الاولاد وخايفة ارجع احبه ويصدمني تاني ومش عارفة ائتمنه على سر فحياتي ولا حتي بعرف عن حياته اي شيء احنا بقينا بعيييييييييييد عن بعض جدا دلوني اعمل ايه يخلينا نرجع نثق فبعض ونحب بعض زي زمان لاني فعلا مش عارفة اتماشى مع وضعنا الجديد
محتارة نرجع ازاي
قد تكوني مهتمة بالمواضيع التالية ايضاً