أو

الدخول بواسطة حسابك بمواقع التواصل

#1

مميز .*.إعرفي إمتى تبدأي تأكلي طفلك وازاي؟ وتبدأي بإيه؟ معلومات هامة (

كيف حالكم يا عدلات يا قمرات ويا كل الأمهات.
موضوعي دة محتاجاه كل أم عندها طفل أقل من سنة, وكل حامل لأن كتير من الأمهات بيسألوا إبني 4شهور أأكله إيه؟ بنتي 5شهور أبدأ معاها إزاي؟
مرحلة بداية الأكل مع الطفل مرحلة مهمة جدا وجسمه بيتبني فيها فلازم تديله الأكل الصحي والمناسب لعمره؛ علشان جسمه يكون كويس وصحته سليمة.
إن شاء الله في الموضوع دة هتلاقي كل المعلومات اللي حابة تعرفيها عن أكل الطفل. إمتى تبدأي وبإيه وازاي؟ وإيه ينفعه وإيه يضره؟

عاوزة أقولك حاجة مهمة قبل مانبدأ يا عدوله : هتسمعي كلام كتير ونصايح من حماتك ومامتك وأصحابك عن أكل النونو كلهم عاوزين يفيدوكي, لكن مع الأسف البعض ممكن يضر غصب عنه بمعلومات غلط. فأنا عاوزاكي يا حبيبتي مش كل حاجة تسمعيها أو حتى تقريها على النت تنفذيها.
أنا بفضل الله تعالى لما بنتي (جنى) كانت في الشهر التالت بدأت أدور كتير جدا على النت عن الأكل المناسب للطفل وكل المعلومات المتعلقة بالموضوع, قريت حاجات كتير وشوفت امهات على منتديات بتدي وصفات أكل في منتهى الضرر على الطفل فقررت أعرف الصح فين ودخلت على مواقع وصفحات طبية وكمان انا عندي مرجع كبير معروف للبعض إسمه (د. سبــــوك) ودة إسم مؤلف الكتاب, جمعت منهم المعلومات وربطت الكلام ببعضه, وقارنت واستخلصت نتايج ومعلومات هايلة بفضل ربي وعرفت حاجات كتير حبيت أنقلهالكم بطريقة مختصرة وهتفيدكم.
ومحتاجة منكم التقييم مش لمجرد التقييم والله لكن لعل الموضوع يتثيت وتستفيد منه امهات كتير ممكن يكونوا بيدوا أولادهم أغذية غير مفيدة أو مضرة.
ونصيحة لله ... الموضوع دة مرجع إحفظيه عندك على الجهاز هتفيدك.

[IMG]https://files2.***- ***- *.com/2012/3/13315103191573.gif[/IMG]إمتى أبدأ أأكل طفلي؟
_في مدرسة في الطب بتقول تبدأي بعد نهاية الشهر الرابع, وفي مدرسة بتقول بعد الشهر السادس.
يعني لو مستعجلة وعاوزة تبدأي بدري يبقى بعد ما طفلك يتطعم تطعيم الأربع شهور ويفوق منه (لو سخن مثلا) تبدأي معاه مش قبل كدة أبدا يا عدولة
[IMG]https://files2.***- ***- *.com/2012/3/13315103191573.gif[/IMG] إزاي نبدأ نأكل الطفل ونبدأ بإيه؟
_أيا كان العمر اللي هتبدأي تأكلي طفلك فيه فلازم تبدأي معاه بالتدريج وبكميات بسيطة, ولازم تبدأي بنوع خضار واحد تستمري عليه 5 أيام بدون ماتغيريه علشان تشوفي النوع دة هيسبب حساسية للطفل ولا لأ, بعدها تبدأي بنوع تاني تستمري عليه بردو كام يوم بعدها نوع تالت وهكذا.
_تغسلي إيدك كويس جدا وتغسلي الخضار كويس جدا والأدوات اللي هتحتاجيها, وتسلقي الخضار كويس وتضربيه في الخلاط مع مية السلق بتاعته, ويكون في درجة حرارة الجسم يعني يادوب دافي بسيط, وبمعلقة الأطفال أو بمعلقة صغيرة تبدأي تأكليه بعد ماتسمي الله طبعا.




_إبدأي بمعلقتين مثلا بالنهار, وزيهم آخر النهار واستمري يومين على الكمية دي. تالت يوم ممكن تزودي شوية لو حسيتي أن الطفل متقبل الأكل وعاوز تاني.
_وياريت يكون الطفل جعان علشان يرضى ياكل, ويكون مغير الحفاضة ومفيش حاجة مدايقاه, وتلاعبيه وانتي بتأكليه.
_بعد كام يوم ممكن تديله نوع تاني وتفضلي على التاني دة كام يوم وهكذا بنفس الطريقة.
أبدأ بإيه؟
_يفضل البدأ بالخضار وبعد فترة نعطي الطفل الفواكه.
_جميل إنك تبدأي بالكوسة لأنها خفيفة وطعمها حلو, بعدها الجزر(بس ممكن يعمل إمساك فلو عمل مش تديهوله لوحده لأ خليه مع الكوسة) بعدهم بطاطس مسلوقة, بعدين رز, بعدين بسلة, فاصوليا خضرا.
_الفواكه الآمنة اللي نبدأ بيها هي ( تفاح, بطيخ, كنتالوب, جوافة, كمثرى, برقوق, مشمش, خوخ, قرع عسلي, موز)
_من الشهر التامن (برتقال, يوسفي, جريب فروت, أناناس, فراولة, مانجو, رمان معصور ومتصفي, جوز هند, عنب)
_وطبعا تكون عصاير طبيعية تعمليها في البيت مش معلبة, وبدون سكر ولا عسل قبل عمر السن

[IMG]https://files2.***- ***- *.com/2012/3/13315103191573.gif[/IMG] طيب إزاي هعرف إن نوع الأكل دة عمل حساسية؟
_ممكن تلاقي الطفل شفايفه إحمرت أو ورمت, ولسانه إحمر.
_ممكن تظهر بقع حمرا في جسمه.
_ممكن يحصل قئ أو إسهال أو إمساك.
وطبعا مش أول ماتحصل حاجة غريبة نقول إن دي حساسية من نوع الأكل دة. لأ إحتياطي توقفي النوع دة وتروحي للدكتور هو اللي يحدد سبب العرض دة.
[IMG]https://files2.***- ***- *.com/2012/3/13315103191573.gif[/IMG] حاجات بنديها لأطفالنا في بداية الأكل مع إنها مضرة:
في بعض الأطعمة مضرة للأطفال قبل سن معين, وممكن تكوني بتديها للطفل وانتي مش عارفة زي إيه؟؟
_ على رأسهم الزبادي. عارفة إن كتير هيستغرب لكن فعلا هو مضر وليه مشاكله اللي مش بتظهر دلوقتي لكن بتظهر مع مرور الوقت.
الزبادي مش قبل 9شهور. ويكون زبادي طبيعي اللي من عند اللبان مش المعلب وطبعا بنشيل الوش الدهني منه.
_ السكر مضر جدا للأطفال قبل عمر سنة مفيش نقاش, والعسل كمان, والملح.
_ البيض مش قبل 8شهور.
_ اللبن الحليب والأجبان بعد سنة.
_ البسكوتات والعصاير حتى لو بسكوت سادة, لأنك بتلاقي عليه في مكوناته مكتوب (زيوت نباتية مهدرجة) ودي خطيرة جدا, دة غير المواد الحافظة, إذا كانت هي مضرة للكبار فما بالكم بالأطفال الرضع.
[IMG]https://files2.***- ***- *.com/2012/4/13347383321496.gif[/IMG] في نقطة مهمة جدا جدا كل الكلام اللي فات دة مبني عليها:
_ ممكن عدولة شاطرة تقرا الكلام تقوم تقول (طيب ما فلانة بتأكل ولادها كذا وكذا من عمر شهرين ودلوقتي هما زي الفل) وواحدة تقول (دا أنا كنت بشوف فلانة بتلحس ولادها من الطبيخ ومن كل حاجة بتاكلها علشان يعرفوا الأكل من صغرهم ومش يرفضوه بعدين)
_أو واحدة مثلا تشوفك بتأكلي بنتك أو إبنك عنده 5 أو 6شهور أي نوع خضار مسلوق بدون ملح تقولك (حرام عليكي حطيله شعرة ملح, إنتي ممكن تاكلي الأكل ماسخ كدا؟) أو تفاحة مهروسة مثلا تقولك (إيه دة حطيله معاها سكر ولا عسل علشان يرضى ياكلها)
_ أو واحدة تقولك (أنا بدأت بالذبادي من عمر 4شهور وبسكوت مع شاي وموز وعسل) و... و... و... 0
[IMG]https://files2.***- ***- *.com/2012/4/13347383321496.gif[/IMG] طيب بالعقل كدا هرد عليكم بكام نقطة:
أولا: ولنفرض جدلا إن الكلام دة صح ودي حاجات مش هتضر, طيب ماهو لو أنا أخرتها شوية عنها بردو مش هيضر ولا إيه؟
ثانيا: ماتقوليش ماهو أنا عاوزة أنوع في الأكل لبنتي, هي لو عمرها 6شهور بس في أنواع خضار وفاكهة كتير هي ممكن تاكلها زي (التفاح, الجوافة, البطيخ, الموز, الكوسا, الجزر, البطاطس ). ولو أكبر من كدا الأنواع هتكون أكتر وأكتر.
ثالثا: ممكن تقولي إبني بيرفض الأكل بدون ملح ولاسكر علشان ماسخ, هقولك أثبت علميا إن الأطفال عندهم حاسة التذوق بتكون قوية جدا في وقت معين بمعنى ( إن حاجة زي التفاح والجزر بيحسها مسكرة بوضوح, ومثلا الكوسا والبطاطس والخضراوات بيحسها مالحة بوضوح, لذلك لو حطيتي ملح أو سكر ولو بسيط جدا هتكون شديدة عليه) إنتي بس حاولي وماتزهقيش هو علشان متعود على طعم لبنك بيستغرب أي حاجة تانية وبيرفضها في البداية, وساعات بيرفضوا دلع.
رابعا ودي مهمة: مش معنى إن في حد كان بيأكل ولاده (لحاجات اللي بنقول عليها مضرة) وولاده كويسين مش معنى كدا إن الحاجات دي آمنة.
1_ مين قالك إن إبنها ولا بنتها كانوا كويسين فعلا أكيد مناعتهم ضعيفة,وبيتعبوا كل شوية, ويمكن جالهم أعراض الحساسية من نوع معين من الأكل وهي ماعرفتش سبب دة أو افتكرتها حاجة تانية.
2_ الأضرار دي مش شرط تبان فورا, لأ دي حاجات بتظهر مع الوقت.
3_ هديكم مثل هو صعب شوية سامحوني, لكن عاوزة أبينلكم خطورة الأمر وإنه مش هين زي ماحنا فاهمين:
إنتوا عارفين إنه من سنين عندنا تلوث في الميا وفي الجو وفي الأكل حتى المزروعات كلها مواد مسرطنة بسبب السماد الفاسد وغيره, والهوا الفاسد بسبب دخان المصانع المضر وغيره وغيره, هو معنى إن أنا شخصيا (عنان) مش عندي سرطان ولا فشل كلوي ولا مرض وحش؛ هل دة معناه إن الحياة بمبي والدنيا بخير ومفيش تلوث في الهوا والميا والأكل؟؟؟
طبعا لأ, لأن فيه مئات الآلاف غيري عندهم فشل كلوي وغيره من الأمراض الوحشة دي حتى إن الأطفال الصغيرين ماللين مستشفى السرطان (ربنا يعافينا)بسبب التلوث. قولتلكم سامحوني على المثل.
[IMG]https://files2.***- ***- *.com/2012/4/13347387121456.gif[/IMG]يعني تاني بكرر إن مش معنى إن فلانة ولا علانة أكلت ولادها الحاجات دي وكانوا كويسين إني أعمل كدا.
بالله عليكم يا أمهات ولادنا دول أمانة وأكيد نفسنا يكونوا أحسن ناس صحيا ونفسيا واجتماعيا وكل حاجة, فلازم ناخد بالنا, مش هنخسر حاجة لو نظمنا لهم أكلهم وأخرنا عنهم حاجات قد تكون مضرة ليهم, وحتى لو نافعة تأخيرها مش هيضر.
يعني بالله عليكم إحذروا السكر والعسل للأطفال قبل سنة واللبن كمان والحاجات التانية اللي في بداية الموضوع.
والبسكوت والكيكات (بيكون فيها زيوت نباتية مهدرجة ودي مادة مضرة جدا) والزبادي المعلب زي جهينة وغيره وكل حاجة فيها مواد حافظة, المواد الحافظة دي مواد مضرة ووحشة والله وبيحذروا منها الكبار؛ تيجي إنتي تديها لبنتك اللي بترضع.
يارب تستفيدوا بكلامي ويباركلنا في أطفالنا ويكونوا في أتم صحة وعافية.


إظهار التوقيع
توقيع : ام جنى وبس
#2

افتراضي رد: .*.إعرفي إمتى تبدأي تأكلي طفلك وازاي؟ وتبدأي بإيه؟ معلومات هامة (

شكرا ليكى
#3

افتراضي رد: .*.إعرفي إمتى تبدأي تأكلي طفلك وازاي؟ وتبدأي بإيه؟ معلومات هامة (

ربنا يحفظ اولاد المسلمين جميعا
تسلمى ام جنى الف شكر
جزاكى الله خير
إظهار التوقيع
توقيع : حسناء
#4

افتراضي رد: .*.إعرفي إمتى تبدأي تأكلي طفلك وازاي؟ وتبدأي بإيه؟ معلومات هامة (

الله يعطيكـِ العآآفية
#5

افتراضي رد: .*.إعرفي إمتى تبدأي تأكلي طفلك وازاي؟ وتبدأي بإيه؟ معلومات هامة (

مشكورة
#6

افتراضي رد: .*.إعرفي إمتى تبدأي تأكلي طفلك وازاي؟ وتبدأي بإيه؟ معلومات هامة (

السلام عليكم اختي عجبني جدا موضوعك وانا قررت انفدو ان شاء الله مع ابني الي عندو 3 شهور بس انا ليا عندك طلب ممكن تدليني على مواقع او كتب تساعدني اكثر لو سمحتي وشكرا
#7

افتراضي رد: .*.إعرفي إمتى تبدأي تأكلي طفلك وازاي؟ وتبدأي بإيه؟ معلومات هامة (

مشكورة
#8

افتراضي رد: .*.إعرفي إمتى تبدأي تأكلي طفلك وازاي؟ وتبدأي بإيه؟ معلومات هامة (

اختى نفحة ايمان
انتظرينى وان شاء الله اقدر افيدك
إظهار التوقيع
توقيع : حسناء
#9

افتراضي رد: .*.إعرفي إمتى تبدأي تأكلي طفلك وازاي؟ وتبدأي بإيه؟ معلومات هامة (

كتاب مصور لوجبات الطفل
عباره عن وصفات للاطفال من عمر الولاده حتى عمر ثلاث سنوات و اكثر من ثلاث سنوات
هذا الرابط

https://www.4shared.com/document/kTe...3_wa_tefl.html


ان شاء الله يفيدك
وباذن الله انزله فى موضوع مستقل للجميع
إظهار التوقيع
توقيع : حسناء


قد تكوني مهتمة بالمواضيع التالية ايضاً
الموضوع كاتب الموضوع المنتدى
بدء الطعام لطفلك الرضيع اوزاريس العناية بالطفل
تغذية طفلك ملف هام لكل ام شوشو السكرة العناية بالطفل
مراحل تطور الطفل: المشي ، كيف تساعدين طفلك على تعلم المشي ، مراحل مشي الطفل نَقاء الرُّوح العناية بالطفل
اعرفى احتياجات الطفل لكى ينمو 2025 الاميرة النائمه العناية بالطفل
طفلتي تعاني من المغص الحاد ماذا افعل لولو حبيب روحي العناية بالطفل


الساعة الآن 10:23 PM

الاتصال بنا - عدلات - أعلي الصفحة

جميع المشاركات تمثل وجهة نظر كاتبها وليس بالضرورة وجهة نظر الموقع


التسجيل بواسطة حسابك بمواقع التواصل