مكرونة بالبشاميل من مطبخي بالصور

صباحكم مساكم فل يا عدولاتي
علشان مسابقة تحدى العضوات قلت لازم ادخل مطبخي واجيب لكم حاجة مخصوصة من عمايل ايدى .
اتفضلوا معايا يا قمرات
مكرونة بالبشاميل
المقادير
كيلو مكرونة قلم
كيلو لحمة معصجة
بشاميل لتر ونصف انا بحب البشاميل كتير
انا بستعمل بشاميل ماي واي طعمه رائع والتتبيلات عليه حلوة جداً
الطريقة
اولا :اللحمة
بصلتين مفرومين وبدبلهم علي النار ثم اضيف لهم اللحم المفروم وملح وفلفل اسمر وحبهان مطحون وورق لورا مطحون وشوية جنزبيل واقلبهم واسيبهم يستوا ثم اضيف عصير طماطميتين واسيبهم لما يشربوا السوائل خالص.
وده شكلهم بعد ما اتعصجوا

ثانيا البشاميل
البشاميل 1.5 لتر لبن
واضيف عليه 6 ملاعق من البشاميل علي البارد وارفعة علي النار واقلبه بمضرب سلك
علشان ميكلكعش 5 دقائق بيكون تمام
وفي الأخر بضيف 2 بيضة واقلبهم كويس
وده بيزود القيمة الغذائية وبيديهم طعم جميل.

ثالثا صينية المكرونة المتينة

الاول انا بحط حوالي ربع البشاميل علي المكرونة المسلوقة واقلبهم فيها ثم اضع نصف كمية المكرونة في صينية مدهونة سمنة وافردهم فيها

ثم نضع اللحمة المعصجة ونوزعها ثم نضع باقي المكرونة ونضع البشاميل علي الوجه ونوزعه بظهر الملعقة






ونكون مسخنين الفرن ونحط الصواني ونسيبها لما تحمر وبألف هنا وشفا.


انا قدمت معاها سلطة خضرا وباذنجان مخلل.