الكفتة المشوية عالفحم فى البيت كفتة مشوية فوق البوتجاز طريقة بسيطة لشوى الكفتة بالبيت

انا بعشق الكباب والكفتة بس للاسف موش ممكن اكلهم من برة لانى اتعودت من صغرى ان بابا الله يرحمة كان دايما هو اللى يشويها بنفسة .. ودلوقتى يا اما زوجى بيشويها فى البيت او عند عمى غير كدة لأ ..
لاقيت طريقة بسيطة عالنت ممكن اى حد يشوى فى بيتة من غير ما يشترى مستلزمات الشوى وجاه واسياخ وغيرة ..
قلت اجرب لما اتزنق فيها وجوزى ما يرضاش يشوى لان البيت بيتملى دخاخين بصراحة وخو عندة حساسية فى عينة ..

المهم طولت عليكم الفكرة ببساطة بنجيب صينية ونبطنها كويس بالفويل ان بطنتها 3 طبقات و نولع شوية فحم عالبوتجاز ونحطهم فى قلب الصينية ونحط الصينية على نار هادية وفوقها شبكة او شواية لحمة لو عندك ونرص فوقيها اسياخ الكفتة ..
انا استخدمت سيخ واحد كنت بصبع علية الكفتة و اسحبها منة واحطها عالشيكة ونهوى عليها علشان الفحم يدخن وممكن نحط عالفحم نقطة زيت ..

الكفتة نفسها حسب انتو بقى ما بتحبوها عننا دايما بنعملها لحمة جملى حمرا على قطعة دهن يفرمها الجزار فرم خشن مع شوية ملح وفلفل اسود وبهارات وموش بنحب نضيف اى حاجة تانية ..

اهم حاجة وانتى بتصبعيها عالسيخ يكون جنبك طبق فية مية بصل او ماء عادى علشان تملسى منةبايدك عاللحمة علشان تمسك عالسيخ .. وشوفوا الصور ..











انا علشان استخدمت شواية اللحمة كان سهل انى اقلبها عالناحية التانية قفلت عليها الشبكة وقلبتها انتوا لو ها تستخدموا شبكة عادية اقبوا اقلبوها بشوكة وخلوا بالكم ..

وبألف هنا