.gif)
حكايات الست عدلات(الحكايه الثانية)
(الحكايه الثانية)
حسنى انا قلبى واجعنى اوى
ليه بس يا فاطمة
يعنى انت مش شايف حال البنت اللى لا يسر عدو و لا حبيب
انهى بنت فيهم
يعنى هاتكون انهى بنت هالة طبعا
مالها هالة
البنت عدت التلاتين و لسه قاعدة من غير جواز
و فيها ايه يعنى ده كل شىء قسمة و نصيب
ما قلناش حاجة بس برضه ربنا بيقول اسعى يا عبد و انا اسعى معاك
و ده هانسعى له ازاى ان شاء الله هادور ادلل عليها
تدلل يعنى ايه المثل بيقول اخطب لبنتك و لا تخطبش لابنك
اخطب لمين يا فاطمة انتى اتجننتى
يا حسنى البنت العمر بيجرى بيها و انا خايفه تفضل كده من غير جواز
لا حول و لا قوة الا بالله العلى العظيم يا ستى دى حاجات بتاعة ربنا لو كاتب لها تتجوز هاتتجوز ان شاء الله
ما هو لو كنت طاوعتنى و اقنعتها توافق على العريس الاخرانى اللى جالها كان زمانها فى بيتها دلوقتى
عريس ايه عايزانى اوافق اجوز بنتى المتلعمة المثقفة لواحد ما بيعرفش يفك الخط حتى
يا اخويا بلا علام بلا زفت خدنا ايه من التعليم ده الراجل كان كسيب و كان هايهنيها
يا فاطمة اتقى الله فى بنتك بكرة ربنا يبعت لها نصيبها لحد عندها
يارب
------
فاطمة ونعمة
باقولك ايه يا فاطمة
ايوه يا نعمه
انا جايبة لهالة عريس انما ايه بقى لقطة
بتتكلمى جد يا نعمه
و هى الحاجات دى فيها هزار برضه
طب و ده ظروفه ايه
ده يا ستى يبقى اخو صاحب مؤمن ابنى امهم ماتت من فترة
و عادل العريس ده يا حبة عينى الوحيد اللى ما اتجوزش فيهم
فاخوه قال لمؤمن يشوف له عروسة بنت حلال علشان مش عايزينه يفضل عايش لوحده
و خصوصا و انهم مالهمش اخوات بنات يقضوا له طلباته
يا صلاة النبى يعنى يتيم
مش باقولك لقطة يعنى بنتك لا هايبقى ليها حما تقرفها و لا حتى اخت جوز تناقرها
طب خلاص خليه يجيى يشوف البنت و يكلم ابوها
يعنى موافقة
ايوه طبعا موافقة
خلاص حددى ميعاد مع ابو هالة و بلغينى علشان اقول للعريس
------
حسنى وفاطمة
طب و العريس ده بيشتغل ايه يا فاطمة
مش عارفة و الله يا حسنى
طب عنده كام سنة
لا و الله مش عارفة
طب مؤهله ايه
اعدمك يا اخويا ما اعرف
أمال وافقتى على اى اساس انه يجيى
الله و فيها ايه يعنى لما يجيى و نبقى نسأله على كل اللى عايزين نعرفه
افرضى يا وليه طلع مش مناسب ليها
و هو حد هايضربنا على ايدينا لو طلع مش مناسب خلاص يبقى كل شىء قسمة و نصيب
خلاص يا فاطمة خليه يجيى بكرة بعد صلاة العشاء
------
و فعلا عادل جه و معاه اخوه و معاهم مؤمن ابن الست نعمة
حسنى
و انت بتشتغل ايه بقى يا ابنى
العريس
انا يا عمى محاسب قانونى
جميل و بالنسبة بقى للشقة
اخوالعريس
عادل يا عمى هايقعد فى شقة بابا و ماما انا و اخواتى اتفقنا و هانسيبها له
حسنى
طب الحمد لله
ام هالة قومى اندهى لهالة
و جت هالة و شافت عادل و سابوهم قاعدين لوحدهم شوية و ابتدوا يتكلموا مع بعض
------
و بعد ما الضيوف مشيوا
حسنى
ايه رأيك يا بنتى
هالة
مش عارفة و الله يا بابا هو كلامة مش مريح خالص
حسنى
مش مريح ازاى يعنى ان شاء الله
هالة
مش عارفة حاسه فى اسلوب كلامه انه مش مظبوط
فاطمة
مش مظبوط ازاى يا ست هالة
حسنى
لو سمحتى يا فاطمة سيبى البنت تتكلم كملى يا حبيبتى
هالة
يا بابا و الله مفيش حاجة معينة بس انا ما ارتحتش للكلام معاه
فاطمة
شوف برضه البت ما ارتحتيش يعنى ايه
هالة
يعنى مش حاسه بقبول ناحيته يا ماما
فاطمة
يعنى ايه قبول
حسنى
استنى يا فاطمة بعد اذنك مش يمكن علشان دى اول مرة تشوفيه ايه رأيك نخليه يجيى تانى و تعملى صلاة استخارة
هالة
حاضر يا بابا
و فعلا بعد ما عادل ابدى موافقته على هالة طلبوا منه يجيى مرة تانية
و بعد المقابلة التانية و صلاة الاستخارة هالة فضل رأيها زى ما هو
هالة
مش قادرة يا ماما انا مش حاسه انى ممكن اعاشر الراجل ده
فاطمة
طب قولى لى سبب معين للرفض
هالة
مش مرتاحة للكلام معاه حاسه انه جاى يتجوزنى علشان اخدمه مش اكتر يعنى جوازة و السلام
فاطمة
يا بنتى حرام عليكى انتى عايزة تموتينى ناقصة عمر
هالة
ليه بس يا ماما
فاطمة
يا حبيبتى افهمينى اى ست بتخدم جوزها
هالة
و هو انا اعترضت بس ما يبقاش ده السبب الوحيد اللى هايخليه يتجوزنى
ده واحد طول قعدته معايا يقول لى مواعيد شغلى كذا
اصحى من النوم الاقى الفطار متحضر
ارجع الاقى الغدا و الاقى الشقة زى الفل
ما بحبش الصوت العالى
الرغى و الكلام الكتير بينرفزنى
فاطمة
و فيها ايه يعنى لما يفطمك على طبعه من اولها
هالة
مش عارفه يا ماما بس طريقة كلامه معايا ناشفه اوى
فاطمة
بصى يا هالة انا هاكلمك بصراحة يا حبيبتى انتى دلوقتى مش صغيرة علشان تقعدى تتبغددى و تتدلعى
يا حبيبتى مش عايزاكى تزعلى منى يا بخت من بكانى و بكى عليا
انا اكتر واحده فى الدنيا تهمها مصلحتك يا بنتى احنا مش هانعيش لك العمر كله
و اخواتك كلهم اتجوزوا خلاص و بعدين عايزاكى تلحقى تجيبى لك حتة عيل تفرحى بيه
هالة
بس يا ماما
فاطمة
من غير بس يا هالة بصى بقى لو ما وافقتيش على العريس ده اعرفى انى هابقى مش راضية عنك
هالة
خلاص يا ماما اللى تشوفيه
------
و فعلا تمت الجوازة و توقعات هالة كلها طلعت فى محلها
جوزها طلع راجل بارد من غير اى مشاعر و بيعاملها زى ما تكون خدامة فى البيت
مفيش كلمة حلوة و لا لمسة حنينه على طول اوامر و شخط و نطر
عادل
عايزة ايه
انا كنت عايزة ازور ماما بكرة
ليه ان شاء الله
اصلها تعبانة اوى و هاتتحجز فى المستشفى و كانت عايزانى ابقى مرافق معاها
تبقى مرافق مع مين
مع امى يا عادل
و انا مين هايشوف طلباتى
طلباتك يا حبيبى هاعملها قبل ما امشى و ليك عليا اجى كل يوم اشوف كل طلباتك و اقضيها لك
لا
لاا ليه بس
هو كده مفيش مرواح شوفى حد تانى يقعد مع امك
حد مين ما انت عارف ان اختى هبة مسافرة بره و غادة لسه والده من شهر يعنى مش هاينفع
برضه لأ
يا عادل علشان خاطرى دى امى و مالهاش غيرى و ابويا مش هاينفع يقعد معاها مرافق فى المستشفى
باقولك ايه يا بنت الناس هو ده اللى عندى و لازم تعرفى انى ما بحبش اللت و العجن الكتير
انا قلت لأ يعنى لأ بيتك مش هاتسيبيه تحت اى ظرف
انا متجوزك علشان تشوفى لى طلباتى و انتى عارفه
مش متجوزك علشان تسيبينى و تروحى بيت اهلك
عادل
مفيش عادل الكلام خلص لحد كده امك هابقى اوديكى تزوريها فى ميعاد الزيارة و غير كده مالكيش عندى حاجة
------
الله يسامحك يا ماما انتى السبب فى الجوازة دى ما انا كنت قاعدة فى بيت ابويا و مبسوطة بحياتى
و المثل
( المشى جنازة ولا المش فى جوازة )
[/size][/B][/SIZE][/COLOR][/FONT]
إظهار التوقيع
توقيع : مانوlove
التوقيع لا يظهر للزوار ..
رد: حكايات الست عدلات(الحكايه الثانية)
رد: حكايات الست عدلات(الحكايه الثانية)
إظهار التوقيع
توقيع : شقاوة آنثى
التوقيع لا يظهر للزوار ..
رد: حكايات الست عدلات(الحكايه الثانية)
إظهار التوقيع
توقيع : الملكة نفرتيتي
التوقيع لا يظهر للزوار ..
رد: حكايات الست عدلات(الحكايه الثانية)
إظهار التوقيع
توقيع : ريموووو
التوقيع لا يظهر للزوار ..
رد: حكايات الست عدلات(الحكايه الثانية)
إظهار التوقيع
توقيع : ريموووو
التوقيع لا يظهر للزوار ..
رد: حكايات الست عدلات(الحكايه الثانية)
إظهار التوقيع
توقيع : بحبكm
التوقيع لا يظهر للزوار ..
قد تكوني مهتمة بالمواضيع التالية ايضاً
|
||||
| الموضوع | كاتب الموضوع | المنتدى | ||
| حكايات الست عدلات مع عدلات عرافة الناس الذوات | كتكوتة | صور x صور | ||
| [ صيام الست من شوال] | أم أمة الله | فتاوي وفقه المرأة المسلمة | ||
| حكايات الست عدلات (الحكايه الاولي) | مانوlove | قصص - حكايات - روايات | ||
| حكايات الست عدلات(الحكايه الثالثة) | مانوlove | قصص - حكايات - روايات | ||
| ] من سيربح المليون مع الست اطاطا ؟؟؟؟؟؟؟؟ | ام جنى وبس | فرفشة عدلات | ||
الساعة الآن 11:54 PM
جميع المشاركات تمثل وجهة نظر كاتبها وليس بالضرورة وجهة نظر الموقع