جميع طرق عمايل المكرونة

الجزء الاول من طرق وصفات عمل جميع انواع الباستا

اول طريقة معانا طريقة عمل " مكرونة فيتوتشيني الفريدو "



المقادير :
باكيت فيتوتشيني
ربع كوب زبدة
كوبين كريمة طبخ
معلقة صغيرة ملح
ربع معلقة صغيرة ثوم بودرة
كوب الا ربع جبنة بارميزان (مبشورة)
ربع كوب جبنة رومي

طريقة التحضير :
‫اسلقي الفيتوتشيني بحسب التعليمات على الباكيت وصفيها واركنيها على جنب‬
‫ذوبي الزبدة في حلة واسعة على نار منخفضة‬ و‫ضيفي الملح والثوم البودرة وقلبي.‬
‫ضيفي الجبنة البارميزان والجبنة الرومي وقلبي على نار متوسطة لحد ما الجبنة تذوب والمزيج يتقل‬
‫ضيفي كريمة الطبخ وخلي المزيج يغلي غلوة واحدة‬
‫ضيفي المكرونة المسلوقة وقلبي لحد ما تتغطى بالصوص‬
‫قدميها ساخنة مع الدجاج المشوي أو الخضار حسب الرغبة‬
--------------------------------------------------------------------------------------
الطريقة الثانية " عمل مكرونة في الفرن بكرات اللحم "



المقادير :
400 جرام مكرونة سباجيتي او بيني
بصلة متوسطة
معلقتين زيت زيتون
ربع كوب زيت نباتي
معلقة ثوم مهروس
5 أكواب عصير طماطم
كرات لحم (400 جرام لحم مفروم)
كوب عصير برتقال
مكعب مرقة دجاج
قرن فلفل أحمر مقطع مكعبات
ملح وفلفل حسب الرغبة
اوراق ريحان طازج (اختياري)
جبنة موتزاريلا للوجه

طريقة التحضير :
١- في حلة مناسبة ضيفي زيت الزيتون والبصل مع التقليب لحد ما يذبل البصل
ضيفي الثوم وبعدين عصير الطماطم وعصير البرتقال مع مرقة الدجاج ويترك على نار هادية لمدة 20 دقيقة
نقلي كرات اللحم وتضاف للصلصة مع مكعبات الفلفل الأحمر والملح وسيبيها على نار متوسطة 10 دقائق إضافية
سخني الفرن على 350 درجة
اسلقي المكرونة بالطريقة المعتادة وصفيها واغلسيها بماء بارد وحطيها في صينية فرن مع الريحان واخلطيها بكرات اللحم والصلصلة وغطيها بالجبنة ودخليها الفرن لمدة 20 دقيقة

----------------------------------------------------------------------------------------------------------------------------------
الطريقة الثالثة " عمل مكرونة بالجبنة الشيدر "



المقادير :
باكيت مكرونة (صغيرة الحجم)
4 اكواب حليب
6 معالق كبار زبدة
نصف كوب دقيق
كوبين جبنة شيدر (مبشورة)

طريقة التحضير :
نسلق المكرونة بالماء المملح ونصفيها ونغسلها بماء بارد ونسيبها على جنب
نسخن الحليب في حلة على نار متوسطة لحد ما يبدأ يغلي نرفع الحلة عن النار
نسخن الزبدة في حلة على نار متوسطة لحد ما تذوب وبعدين نضيف الدقيق ونقلب لحد ما الدقيق يتحمص ولونه يبقى ذهبي
نضيف الحليب لخليط الزبدة والدقيق مع التحريك لحد ما قوام الخليط يبقا ناعم وكريمي
رجعي الحلة للنار المتوسطة وحركي لحد ما القوام يتقل.
تبلي المزيج بالملح والفلفل وبعدين ضيفي الجبنة الشيدر المبشورة وحركي
ضيفي المكرونة المسلوقة وقلبي كويس
اغرفي المكرونة مع الصوص في أطباق التقديم وقدميها

----------------------------------------------------------------------------------------------------------------------------------------------------

الطريقة الرابعة " عمل مكرونة بمكعبات اللحم والصلصة "



المقادير :
نصف كيلو فيليه لحم (مفروم مكعبات صغيرة)
باكيت مكرونة (صغيرة الحجم)
حبة بصل (مفروم)
كوبين عصير طماطم
3 معالق كبار معجون طماطم
معلقة صغيرة ملح
ربع معلقة صغيرة فلفل أسود
ربع معلقة صغيرة بابريكا
ربع معلقة صغيرة زنجبيل (مطحون)
معلقة كبيرة زبدة
معلقة كبيرة زيت نباتي

طريقة التحضير :
سخني الزبدة والزيت في حلة مناسبة وضيفي البصل وقلبي لمدة 5 دقائق لحد ما يطرى.
ضيفي اللحم وقلبي لحد ما لون اللحم يبقا بني وبعدين ضيفي الملح والفلفل والزنجبيل والبابريكا وقلبي لحد يتحمر اللحم
ضيفي صلصة الطماطم وعصير الطماطم وخلي المزيج لحد ما يبدأ بالغليان
ضيفي المكرونة وغطي الحلة وخففي النار وخليها لحد ما المكرونة تستوي وتتشرب الصلصة
اغرفي المكرونة في طبق التقديم وقدميها ساخنة مع رشة بقدونس حسب الرغبة
-----------------------------------------------------------------------------------------------------------------------------------------
الطريقة الخامسة " عمل مكرونة بالزبادي "




المقادير :
نصف باكيت مكرونة
نصف معلقة صغيرة ملح
معلقة كبيرة زيت نباتي
كوبين زبادي
فصين ثوم مهروسين
معلقة صغيرة ملح
معلقتين كبار زيت زيتون
نصف كوب نعناع طازج مفروم

طريقة التحضير :
‫اسلقي المكرونة وصفيها واغسليها بماء بارد‬
‫لعمل خليط الزبادي: في طبق عميق ضيفي الزبادي والثوم والملح وزيت الزيتون والنعناع وقلبي المكونات واخلطيها، وحطيها فوقها المكرونة، وقلبي تاني عشان المكرونة تختلط مع الزبادي‬
‫ممكن تحطي الطبق في الثلاجه شويه، أو تقدميها على طول
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الطريقة السادسة " عمل مكرونة سي فود "



المقادير :
باكيت مكرونة سباجيتي
2 كوب جمبرى مجمد
2 كوب شرائح سبيط
1 كوب بازلاء مجمدة
حبة طماطم مقطعة مكعبات صغيرة
فصين ثوم مهروسين
معلقة كبيرة خل تفاح
رشة زعفران
معلقة كبيرة زيت زيتون
ربع معلقة صغيرة فلفل أسود
نصف معلقة صغيرة ملح

طريقة التحضير :
فى حلة كبيرة نغلي كمية كبيرة من الماء ونسلق المكرونة لحد ماتقرب تستوي
نسخن الزيت فى طاسة على نار متوسطة، ونحط الثوم المفروم ونقلبه لمدة دقيقة ونضيف عليه الجمبري والسبيط ونقلبهم لمدة 5 دقائق
نضيف البازلاء المجمدة عليهم ونقلب كويس
نضيف خل التفاح والزعفران، ونقلب المكونات لمدة دقيقتين ونضيف الطماطم ونتبل بالملح والفلفل
نخفف النار ونصفي المكرونة من ماء السلق، وننزل بيها فى الطاسة ونقلبها مع باقي المكونات
ونسيبهم لمدة دقيقتين على الأقل لحد ما المكرونة تندمج معاهم
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الطريقة السابعة " عمل مكرونة بالتونة والجبنة "



المقادير :
100 غرام مكرونة مسلوقة
100 غرام تونة في الزيت
3 معالق كبار قشطة
3 معالق كبار جبنة كريمي
3 معالق كبار مايونيز
نصف بصلة مفرومة
2 حبة طماطم مقطعة مكعبات
3 معالق كبار زيت زيتون
مكعب مرق دجاج
3 معالق كبار بقسماط (كعك مطحون) لرش الوجه
معلقة صغيرة بهارات أو حسب الرغبة
ملح

طريقة التحضير :
اسلقي المكرونة بالطريقة المعتادة وخليها على جنب
في طاسة على النار ضيفي الزيت والبصل لحد ما يحمر البصل
ضيفي الطماطم، البهارات، المرق ورشة الملح، قلبيها لحد ما المكونات تتجانس مع بعضها وبعدين ضيفي التونة
جهزي صينية فرن وحطي فيها المكرونة المسلوقة وضيفي خليط التونة كطبقة ثانية
في طبق حطي المايونيز والجبنة والقشطة وقلبي كويس
وحطي الخلطة دي على وجه خليط التونة ورشي البقسماط عليها
دخلي الصينية الفرن من وشغلي من فوق لحد البقسماط يحمر لونه

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الطريقة الثامنة " عمل فيتوتشيني بالجمبري "



المقادير :
باكيت فيتوتشيني
نصف كيلو جمبري
كوب حليب
نصف كوب جبنة شيدر
كوب كريمة طبخ
معلقتين كبار دقيق
معلقتين كبار زبدة
معلقتين كبار زيت نباتي
معلقة كبيرة مسطردة
معلقة صغيرة ثوم (مفروم)
نصف معلقة صغيرة ملح
نصف معلقة صغيرة كمون
نصف معلقة صغيرة فلفل أسود
2 حبة فلفل الوان (متوسط الحجم)
عصير ليمونة

طريقة التحضير :
اسلقي المكرونة في ماء مغلي لحد ما تقرب تستوي
صفيها من الماء الساخن واغسليها بماء بارد
تبلي الجمبري بالثوم والكمون والملح والفلفل والمسطردة وعصير الليمون
في طاسة كبيرة على النار ضيفي معلقتين الزيت والفلفل الألوان وقلبي وضيفي الجمبري المتبل على نار عالية
لما يتغير لون الجمبري ويبقا لونه برتقالي ارفعيه عن النار قبل ما حجمه ينكمش حجمه وينزل المياه بتاعته
في طاسة تانية حطي الدقيق والزبدة وقلبي لحد ما الدقيق يتشوح وبعدين ضيفي الحليب وقلبي وضيفي رشة ملح واول يبدأ بالتماسك ضيفي الكريمة وسيبيه يغلي دقيقتين
ضيفي الجمبري والمكرونة وقلبي لمدة دقيقة مع الحرص إن الصوص يكون أخف من البشاميل لو طلع تقيل معاكي خففيه بالماء أو الحليب قبل إضافة الجمبري
اخلطي الجمبري والمكرونة مع الصوص الأبيض وسيبيهم دقيقة على النار.
ارفعيهم عن النار وقدميها ورشي عليها الجبنة المبشورة عند التقديم وقدميها ساخنة

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الطريقة التاسعة " عمل فيتوتشيني بالمشروم "



المقادير :
باكيت فيتوتشيني
كوبين مشروم (طازج ومقطع شرائح)
معلقة كبيرة كبيرة
4 اكواب كريمة طبخ
فصين ثوم (مهروسين ناعم)
نصف معلقة صغيرة ملح
ربع معلقة صغيرة فلفل اسود
ربع معلقة صغيرة جوزة الطيب
نصف كوب جبنة بارميزان (مبشورة)

طريقة التحضير :
اسلقي الفيتوتشيني بحسب التعليمات على العبوة واغسليها بماء بارد وصفيها وسيبيها على جنب
سخني الزبدة في طاسة على نار متوسطة وضيفي المشروم وقلبي لمدة 7 دقائق لحد ما يدبل.
ضيفي الثوم وقلبي لمدة 3 دقائق وبعدين ضيفي الملح والفلفل والكريمة وربع كوب من الجبنة البارميزان وحركي المزيج وخففي النار وخلي الكريمة لحد ما تبدأ بالغليان
ضيفي الفيتوتشيني المسلوقة وقلبي لمدة دقيقتين وتبلي بجوزة الطيب
اغرفي الفيتوتشيني في طبق التقديم وقدميها ساخنة مع رشة جبنة بارميزان مبشورة

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الطريقة العاشرة " عمل مكرونة بالصلصة الحارة على الطريقة الايطالية "



المقادير :
معلقتين كبار زيت زيتون
حبة بصل (مفروم ناعم)
فصين ثوم (مهروسين)
حبة فلفل حار (مقطع)
4 حبات طماطم (مقشرة ومفرومة)
معلقة كبيرة معجون طماطم
معلقة صغيرة فلفل أسود
معلقة صغيرة ملح
ربع كوب ماء
معلقة صغيرة أعشاب إيطالية
باكيت مكرونة (النوع المفضل/مسلوقة)
جبنة بارميزان (للتزيين)





طريقة التحضير :
سخني زيت الزيتون في طاسة على النار وضيفي البصل وقلبيه لحد ما يطرى ضيفي عليه الثوم المهروس وقلبيهم وبعدين ضيفي الفلفل الحار المقطع وحركي
ضيفي الطماطم المفرومة ومعجون الطماطم وتبلي بالفلفل الأسود والملح وخلي المكونات لحد ما تتسبك الطماطم وتغلي شوية صبي الماء عليها وضيفي الأعشاب الإيطالية
ضيفي كيس المكرونة المسلوقة، وحركيها مع صلصة الطماطم لحد ما يمتزجوا كع بعض.
اغرفي المكرونة بأطباق التقديم، وزيني ببرش من جبنة البارميزان حسب الرغبة قدميها ساخنة

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الطريقة الاحدى عشر " عمل مكرونة بالجبنة والكريمة "



المقادير :
كوب كريمة طبخ
كوب جبنة كريمي
ربع معلقة صغيرة ثوم مهروس
ربع كوب جبنة شيدر احمر مبشورة
3 أكواب من نوع المكرونة المفصل

طريقة التحضير :
اسلقي المكرونة بالطريقة المعتادة وصفيها واغلسيها بماء بارد
في طاسة على نار عالية ضيفي الكريمة والجبنة الكريمي والثوم مع ملح حسب رغبتك
اول ما تلاحظي إن الحواف بدأت في الغليان، اخفقي المقادير جيداً لمدة دقيقة، وخليهم لمدة 15 ثانية يندمجوا مع بعض وبعدين ضيفي الجبنة الشيدر على الخليط وامزجيهم مع بعض كويس وارفعيهم من على النار
صبي الصوص فوق المكرونة وقدميها

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الطريقة الثانية عشر " عمل بولونيز بالدجاج "



المقادير :
باكيت مكرونة (النوع المفضل)
بصلة مفرومة
معلقتين كبار زيت زيتون
كوبين صلصة طماطم
3 معالق كبار معجون طماطم
نصف معلقة صغيرة فلفل أسود
عود كرفس مفروم
2 حبة جزر مقشر ومفروم صغير
نصف كيلو صدور دجاج (مفرومة)
نصف معلقة صغيرة ملح
ربع كوب خل
ربع كوب جبنة بارميزان (مبشورة / للتقديم)

طريقة التحضير :
سخني الزيت في طاسة على نار متوسطة وضيفي البصل والكرفس والجزر وقلبي
ضيفي الملح والفلفل وقلبي لمدة 7 دقائق
ضيفي الدجاج المفروم وقلبي المزيج لمدة 5 دقائق كمان
ضيفي ومعجون الطماطم والخل وسيبي المزيج يغلي لمدة دقيقتين
ضيفي الحليب وصلصة الطماطم وخففي الحرارة وسيبي المزيج على النار لمدة ربع ساعة لحد ما يستوي ويتكاثف
اسلقي المكرونة بالطريقة المعتادة وصفيها واغسليها بماء بارد
اغرفي المكرونة في طبق التقديم ووزعي فوقها الدجاج مع الصلصة ورشي الجبنة البارميزان وقدميها

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الطريقة الثالثة عشر " عمل رافيولي بالبشاميل "



المقادير :
كيس مكرونة رافيولي
فصين ثوم مفرومين
3 معالق كبار زبدة
معلقتين كبار دقيق
كوب مشروم الفطر (مقطع)
كوبين حليب
كوب الا ربع كريمة طبخ
كوب جبنة شيدر أو بارميزان (مبشور)
معلقة صغيرة ملح
معلقة صغيرة فلفل أسود

طريقة التحضير :
نسلق المكرونة الرافيولي ونصفيها ونغسلها بماء بارد ندوب معلقة زبدة في طاسة ونضيف عليها المشروم والثوم ونقلب لمدة دقيقتين ونرفعهم من على النار.
نذوب الزبدة اللي باقية في حلة متوسطة على النار ونضيف الدقيق ونقلب لمدة دقيقة ونضيف الحليب ونخفقهم كويس ونضيف الكريمة والجبنة والملح والفلفل وكوب الا ربع ماء ونسيبهم لحد ما يغلوا
نضيف المشروم والرافيولي ونقلب كويس وبعدين نقدمها

-----------------------------------------------------------------------------------------------

تابعوا الجزء الثاني من طرق عمل جميع وصفات الباستا